1 "Kedanemene tinggim hegwangram au hangdeu mpaube pe gu kubeluh ziemne heta keteime zie likera tingcang nuge kemie nzwa delie. 2 Pecai pa heta tei kerame de ngngwa langnai ge ziehi dinarius* ge peu kera kesuizwa luge, pa penuide pe gu kubeluh gage langgaidi. 3 Pa tingcang bam hekui dauge tetpet dai nah heta keteime kedame litakni ga mata tei mene sap kebam ngaulu. 4 Pa penui dage rangdi, ‘Nnui de, kubeluh ga miecu, nah Ih nnuide petaube peu zie.’ 5 Cine penui miedi. Pa tingna tingding nah tinghegi bam cum daude mie cinzwa tei. 6 Tinghegi bam mengei dau pa tetpet daige, kedamedung ge matei mene sapbam eh ngaulu. Pa penuide keteugai, ‘Daitei eh nnui tingba zie pelane matei mene aika sap bam no?’ 7 Penui pe dage rangdi, ‘Kedanemene migede anuide zie likera gah kecune lie.’ Ge pa penui dage ranggai, ‘Nnui de kubeluh ga miecu.’ 8 Tinghegi miege, kubeluh mpaube pe gu kerengeibe dage rangdi, ‘Matei kelamedung de qulu delwe penui ziedung penuide peubeulo, kamtube gade ndeu eh raitube kecangde.’ 9 Bam mengei daune liteu kelamedung de gwangge, penui hangge kecu de denarius ge ngau kaplu. 10 Heta ketei keraimedung gwangge, penui ciswa ngau kieelu zie ha de eh penui cet, dede penui de denarius ge gwale ngau silu ma. 11 Penui penui zie ngau luge, penui hangdeu mpaube de ncamdi. 12 Penui rangdi, ‘Heta ketei kamtu aipaudung de au bamdakkak ket gwale mata teima, anui au tinglum lia eh mringbeting matei sapmui, dede nang penui zie anuide kepeu kieege peu.’ 13 Dede pe mpaube penui hangge pau de keligai, ‘Azangmedung, Ih nnuide magede teimau ma. Nnui acu ngngwa denarius ket gage samdaulu de meni? 14 Nnui zie keulu delwe tet dilu. Ih heta ketei kamtu aidungde de nnuide kepeu nsam ge peu kera Ih asui lie. 15 Ih akatei agu lepwane Ih asuibe tei kera a njeu meni? Mi Ih a zai keyine acu nnui riak lano?’ 16 Cine keraime kam dizie, nah kekamme rai luzie."*

17 Jisu Jerusalem ga hangla ge, pa ledeukelume kereiekena de ngngwa ntsamlu eh, lampuiki de pa penui dage rangdi, 18 "Ainie, anui Jerusalem ga hang zeuda, nah Mina Nabe de nimpwa cingku kedime nah laisiukecime ba gage kaidi zie. Delwe penui pecu mmau eh peu tsai dilo zie, 19 nah penui pecu henui tei, dap nah gwak dilo eh Gentileme de balie beu dizie. Dede lang cumne benai pa ringdai cuh luzie."

20 Pecai Zebedee nau pena kenade nzang eh Jisu da gwang. Pa pe dwa keumie pe dade mage kie. 21 Jisu pe dade rangdi, "Nang daipai luneu lano?" Pa pe dage rang eh, "N hegwangram ga a na aikena de peu hangge n ba zetle nah hangge hile peu bam kera samkai beulo." 22 Dede Jisu keli eh ranggai, "Nnai dai kie labi nnai pekie ci eh kiela ma. Nnai Ih sak zielie kebam hepiak de gade sak lubui ni?" Penai pe dage rangdi, "Anai sak lubui." 23 Pa penui dage ranggai, "Nnai a piak sak zie. Dede a ba zetle nah a ba hile bam kera Ih peu kera a mjeu ma, dede cide au tinggim kebam a Pei ne riemteu kelame ziemne zie." 24 Ge ledeukelume keda kereibau aide siu luge, cipau sina kena de penui rata sütdi. 25 Dede Jisu penuide quteu peda gwanglu eh rangdi, "Gentileme kedime ne penui peureu hegwang teikela, nah kemlang minadung ne penui peureu kengkieng teukela nnui cibam. 26 Dede nnui kakga au aide nzwadi kerabe ma. Meliene, keheibe de nnui kakga di keneube de peu nnui kila tei maisia, 27 nah keheibe de nnui kakga de raineu kelabe de peu nnui kila tei maisia, 28 Mina Nabe de mide peu pe gwatei zielie gwang ma, dede mi gwatei kera, nah mina kekiee de rilu kerane pe teilung kaibeu zielie gwang."

29 Penui Jericho* namdi gade tetdi zeuge, mina maadi ge pe caisui gwang. 30 Ainie, miakcitme hangna lampui kungga ntumbam. Penai Jisu cilambie gwang kela siu luge, penai sahbakgai, "Rampaubo, David Napei, anaide ngaunggia gailo." 31 Dede hemaabe penaide mlei helo kesiudi, dede penai sah mtei ki eh ranggai, "Rampaubo, David Napei, anaide ngaunggia gailo." 32 Ge Jisu saplu eh penaide qugai eh rangdi, "Acu peu nnai dage daipai teigai neu lano?" 33 Ge penai pe dage rangdi, "Rampaubo, anai miak teimrak beulo." 34 Cine Jisu penaide ngaunggia eh penai miak deugai. Ge zette penai ma ngaulu delwe pe caisui ladi.