1 Jisu sam aidungde rang cang dige, pa ledeukelumedung dage rangdi, 2 "Nnui ci kebam nzwa, langnane cai Kahkegwang Ngyi de gwang zieda nah Mina Nabe de gwaktsetdi kerane nim gaibeu dizie." 3 Cidau cingku kedime nah hangkiame cingku kedibe, Caiaphas lie qu kelabe ki ga gwang ngkwa bam. 4 Penui Jisu de ngkimkak eh tuilu delwe teitsetdi kera ciem ngngwa riem bam. 5 Penui hange ge dage rang eh, "Hengyi tingdau lak, iciu eh mina kakga ma kehebwak petdi melu kerane."

6 Cidau Jisu Bethany ga, ndaa mpabe kelabe Simon ki ga bamge, 7 pa matyei kebam dau, mipui ge* maca pemi kewhung alabaster bung ge pwa gwang delwe pa pe peu gage ruigai. 8 Dede pa ledeukelumedung cide ngau luge, penui rata eh ranggai, "Daitie aiciu matei ngkap lano? 9 Aide pemi yisüt eh zwa lubui delwe makegahme de rangkang peu lubui." 10 Dede Jisu, aide ci eh, penuide dage rangdi, "Daitei aipau puide de nnui kebwak zeu no? Pa a ziemne heta keyi ge teigai da. 11 Nnui makegahme de au ngngwa bam muizie, dede nnui acu ngngwa bammui lak. 12 Pa maca a pum ga ruigai kecu de, pa acu kungkera mtei bam da. 13 Ih nnui dage rangsiakte gaila, kideu pelane ga samliakeyi aide rang kegwang leu ga, mipui aide de kensung gade pa tei kegai tade de rangla dizie."

14 Cidau kereiekena bau hangge, Judas Iscariot lie qu kelabe, cingku kedimedung da mie 15 delwe rangdi, "Nang acu daipai ge peu zie no, Ih pecu nnui dage tuigai beucai?" Penui rangkang geu camrei pecu peudi. 16 Cipaude pa pecu cwa kera ziuyi keyi ge peei ladi.

17 Pecai Tsehi Kaikemak Tangku ngyi raitu benai ledeukelumedung Jisu da gwang keteugai, "Daiga ge anuide peu n ziemne kahkegwang Ngyi taktyei de tyei kera mteibeu neuno?" 18 Pa rangdi, "Namdi ga mige da mie delwe peda rang beulo, ‘Keledeube rang zeulie, "A ting nna zeu da. Ih Kahkegwang ngyi de n ki gade Ih ledeukelumedung de ngngwa mnei zielie."’" 19 Ledeukelumedung Jisu rang kebeu caisui eh kahkegwang taktyei de mteilu.

20 Tinghegi miege, pa ledeukelume kereiekena bau de ngngwa matyei kera bamlu. 21 Penui matyei kebam ge, pa ranggai, "Ih nnui dage rangsiakte gaila, nnui hangge acu tui gaibeu zie." 22 Penui suisia sütdi nah hangge ge kecu pecu, "Ih ni, Rampaubo?" de keteu kapdi. 23 Pa sam keligai, "Acu ngngwa hekwak gage peba mpung kecube de ne acu tuigai beuzie. 24 Kesanglaisiu ga pe ha raupwa kebam nzwa, Mina Nabe au tsai dizie. Dede Mina Nabe de tuigai kerabede au ainie! Pecu mna kemakbe pe ziemne yiki kerage." 25 Cu Judas, pecu tuigai beu kerabe de samkeligai, "Cide Ih ni, Keledeubo?" Pa pe dage rangdi, "Nang rang dauda."

26 Penui matyei bamge, Jisu tangku keulu, delwe samlamgai, eh teuraklu. Pa cide ledeukelumedung de peu eh ranggai, "Keulwe tyeilo. Aide a pumteih delie." 27 Pecai pa hepiak pwalu delwe samlamgai, delwe penuide peu eh ranggai, "Nnui pelane cide pwa saklo. 28 Kedanemene aide mi kekiee mau gilu kera samting samkakkelu a jailwa kegaide delie. 29 Dede Ih nnui dage rang gaila, Ih aipau kubetsidui de madaude sak dai lakta, a Pei hegwangram gade kubetsidui keheci nnuide ngngwa sak kemakta." 30 Pecai penui lei ge teigai eh penui Olive deutu reuga hangdi.

31 Pecai penui Jisu dage rangdi, "Heziu nnui pelane acu gidi zie. Kedanemene Kesanglaisiu ga ainzwa raupwa bam,

‘Ih meurünkekwabe de dap gaizie

nah meurün hau pak zangra dizie.’*

32 Dede Ih ringcuh dailu kecucai, Ih nnui dwarai delwe Galilee ga mie dizie."

33 Dede Peter pe dage rangdi, "Pelane ncu gidi liede Ih madaude ncu gidi lak." 34 Ge Jisu pe dage rangdi, "Ih n dage rangsiakte gaila, heziu nruirie kwa kemak dwa nang acu pia cum mlai dizie." 35 Peter pe dage rangdi, "Ih ncu ngngwa tsai zie liede, Ih ncu mlai dilak." Ledeukelumedung kedame ciciu kapdi.

36 Pecai Jisu Gethsemane lie qu kela ni gega penuide ngngwa miedi, delwe ledeukelumedung dage rangdi, "Aika bamlu Ih mie kekie ketei tingkak." 37 Pa Peter nah Zebedee napei kena de ngngwalu nah peda suisiet nah lungrei le puidi. 38 Pecai pa penui dage rangdi, "A rabe suisiet le puipung eh tsaidi lai zeuda. Aika bamlu delwe acu ngngwa kwalu." 39 Pa ma nage tetpet silu delwe keumie pe zu nkum punglwe kiegai, "A Pei, teilu buicai, aipau keherei piakde de a dade keu mbaidi lulo. Ciulie de a suibe so, dede n suibe tei lulo." 40 Pecai ledeukelumedung da gwang ge penui zip bam eh ngaulu, nah pa Peter dage rangdi, "Nnui bamdakkak gede acu ngngwa kwa gailak zing deni? 41 Kwa eh kiebam lulo, nnui mdakkepie ga lütdi melu kerane. Rabe au neu bam kesang, dede pumteihbe au mnei." 42 Pa pekenabe mie delwe kekie teidai. Pa rangdi, "A Pei, aipaude Ih sak mene ta gailak cai, n suibe tei lulo." 43 Pa mpet dai ge penui zip bam eh ngaulu, penui zip na zu kedine. 44 Cine penuide gidai di eh, pedwa samdung nzwa eh pa mie pia pekecumbe kekie tei dai. 45 Pecai Jisu ledeukelumedung da gwang eh penui dade rangdi, "Nnui cude zip eh mtak bam reuni? Ainie, pe bamdakkak gwang nna la dida, nah Mina Nabe de tuipwa kemaumedung ba gage kaidi kera. 46 Cuhlu, anui tet cugo. Ainie, acu tuigai beu kerabe de nnala dida."

47 Pa marang kebam dau, ainie, Judas, kereiekena bau gade hangge gwang. Pecu cingkume nah hangkiamedung ne lang kegai hemaa maadi ge, kiengtie nah tsingpakdung pwa kelame nzang la. 48 Jisu de tuigai beu kerabe de, penuide pe ciem teilia gai eh, "Ih kemam kegaibe de, cide pa delie. Pecu tuilu," debeu. 49 Ge pa Jisu da kelwa gwang rangdi, "Kelum gaila, Keledeubo!" delwe pa pecu kemam gai. 50 Jisu pe dage rangdi, "Azangbo, nang tei zielie gwang kelade tei lulo." Pecai penui gwang Jisu de heraklu delwe pecu tuilu. 51 Ainie, Jisu de ngngwa kelame hangge, pe ba kezang pet pe kiengtie zütlu eh cingku kedibe kilabe de bi eh pe kwen dangdi. 52 Pecai Jisu pe dage rangdi, "N kiengtie pebung gage kaidai di, kedanemene kingtie kepwame de kingtie le ngkap dizie kecune. 53 Mi nang Ih a Pei dage kiegai cai, pa piage gage tinggimgwame reugwamaa kereiekena swade kiee eh acu langgai beugai laklie cetbam ni? 54 Dede ciciu cai, dainzwa Kesanglaisiu ga teigwang zielie de raupwa kelade tei canglu laino?" 55 Cipau tingdau Jisu maadibe dage rangdi, "Keregame gede tui kera nzwa nnui kiengtie nah tsingpakdung keu delwe acu tui kera gwangla ni? Tingnai ramsangne Ih kerecaki ga mide ledeu bam bamla, iciu de nnui acu tui ma. 56 Dede aidungde pelane aiciu kecu au caihakecime raupwa kelade teicang lu kerane." Pecai ledeukelumedung pelane pecu gidi eh pakdi.

57 Jisu de tui teu kelame pecu cingku kedibe Caiaphas taiga ngngwa gwang, cika laisiukecime nah hangkiamedung gwang ngkwa bam. 58 Dede Peter Jisu de kemdei gade pecai sui eh cingku kedibe kigu ga gwanglu. Pa dainzwa di ziebi kecu pie kerane pelung ga lütlwe kekwame de ngngwa bam. 59 Cu cingku kedime nah baudibe pelane Jisu de mmau kera kenret zierang pei bam, iciu eh penui pecu teitset lu kerane. 60 Kenret zierang keteime kekiee ge gwang liede, penui kette peei dau luma. Dede kekamle hangna gwang 61 delwe ranggai, "Aipau mina de, ‘Ih Tinggwang kerecaki de tei msiadi eh langcumne gage teidai lubui,’ de eh ranggai." 62 Cingku kedibe cuh saplu delwe pe dage rangdi, "Nang keligai kera gahni? Penui ncu kemmau zierang tei kebam de daino?" 63 Dede Jisu zing de bamdi. Cingku kedibe pe da rangdi, "Ih ringkebam Tinggwang zi gade ncu aja kaigai la, nang Tinggwang Nabe, Khrista, demi mebi kecu anui dage rang lialo." 64 Jisu pe sam keligai, "Nang kerang deda. Dede Ih nnui dage rang gaila, cu gade nnui Mina Nabe Kengkiengbe ba zetle kebam, nah tinggim hemwadung reu gade kegwang ngau zie." 65 Pecai cingku kedibe pe paini hietdi eh ranggai, "Pa Tinggwang de rang msia zeu! Daitei anui cude zierang keusi maisia bamreu no? Pielo, cu nnui pa Tinggwang de rangkemsia sam siu luda. 66 Nnui daipai cetno?" Penui sam keligai, "Pa tsaidi kerabe." 67 Pecai penui pe zu gage mcai nsuilwa nah pecu dap, nah kangge pecu kepeu eh, 68 ranggai, "Anui dage caihakecisam ranglo, Khrista. Caune ncu kepeu au no?"

69 Cidau Peter hegwa lebie kigu ga bam. Kila puina ge peda gwang eh rangdi, "Nang de Galileeme Jisu de ngngwa la." 70 Dede pa penui pelane dwagade cide mlai eh ranggai, "Nang daipai rang zeu bi Ih cima," 71 Pecai pa kirie ga mpet ge, kila pui keda ge pecu ngau eh cika kebamme dage rangdi, "Mina aipaude de Nazarethme Jisu de ngngwa lalie." 72 Pa sampet eh mlai daidi, "Ih mina cipaude de ci ma!" de eh. 73 Pecai tie mene cika sap kebamme gwang delwe Peter dage rangdi, "Nang penui kakga hangge kesanglie, kedanemene n samrang gade ncu cilu da." 74 Ge pa reset nah sampet cuh eh, "Ih mina cipaude de cima," dedi. Ge zette nrui kwadi. 75 Cidau Peter Jisu pe dage, "Nrui kwa kemak dwa nang acu pia cum mlai zie," de eh rang kebeu samdung de nsunglu. Pa hegwale petlu delwe hap sütdi.