1 Cipau tingdau Sabbath benai Jisu nah pa ledeukelume luhdung tetkah gwang. Nah pa ledeukelume mzeu di eh hereibui nriep cuhdi delwe cidungde tyei ladi. 2 Dede Phariseeme cide ngau luge, penui Jisu dage rangdi, "Pielo nang ledeukelume hezai kemakbe Sabbath benai teila dida." 3 Dede Jisu penui dage rangdi, "Pa nah pecu ngngwa kelame mzeu kedi dau, David daipai tei bi kecu nnui madaude Kesanglaisiu gade pei meni?* 4 Pa Tinggwang kiga lütlwe tangku reca tei kedi de tyei, cide pa nah pecu ngngwa kelame tyei kera hezai ma, dede cingkume rünsangne tyei lubui. 5 Mede cingkumedung kerecaki gade Sabbath benai Sabbath zai gikah liede penui maudi la kemak nnui hezai gade pei meni? 6 Dede Ih nnui dage ranggai la, kerecaki swa de diki kecu ge aika bam. 7 Nnui, ‘Ih ratakbe mene ngaugiabe luuneu lie,’ kecu aipau kiede cilie cai, nnui kemau kegahme de mmau lak nage.✝ 8 Kedanemene Mina Nabe au Sabbath Rampaube kecune."✝

9 Ge Jisu cikade tetpwa penui synagogue ga lütdi. 10 Ainie, cika mige peba tsai kedi ge bam. Phariseemedung, Jisu de keteu eh ranggai, "Sabbath benai mide teingkei kecu* hezai mi meno?" Iciu eh penui pecu mmau kerane. 11 Jisu penui dage rangdi, "Nnui kakga caube, magade pe meurün ket rünne bam eh Sabbath benai aipau meurün de hekwa kecuk ga cakmie dicai, cide heraklu delwe teu mpet kelak bam no? 12 Ciciu cai, mina au meurün swa de daikenzwa gede pemi whung ki no! Ciziemne Sabbath benai makeyi ketei au hezai lie." 13 Ge Jisu minabe dage rangdi, "N ba nzang pet gailo." Ge pa pe ba nzang petgai, nah keda lebie ba nzwa cide yi dailu. 14 Dede Phariseemedung hegwale mpetlu delwe dainzwa eh penui Jisu de teitset lubui bi kecu ciem riemdi.

15 Jisu cipau ciem de ci luge, pa cikade tetdi. Mina kekie pecaisui ladi, nah pa penui pelane de teingkeibeu. 16 Peu migede de peu pe ha ci helo pa penuide aja kaigai, 17 iciu eh caihakecibe Isaiah dage rang kegai de teicanglu kerane:

18 "Pielo, a kilabe Ih ne kedet kelube,

akube, a keringria de pecu pe suiyi kelabe.

Ih a Rabe pereu gage kaigai zie,

nah pa Gentileme dage tutiak recilia zie.

19 Pa au renia mede sah nrung lak,

mede puidikidung gade de migede pekwa siulak.

20 Pa herwabang pang kebamde de teicum dilak,

pa miheu kebam de tei mmüt dilak,

pa kesangbe de peu ngkienglu kemaktane, 21 nah pezi ga Gentileme keregui bam luzie."*

22 Ge mige herakesia ne ngngwakela pemiakcit nah pelet kegah gede ngngwa Jisu da gwang. Pa cipau dede teingkeibeu, iciu eh pelet kegahbe de maranglu nah ngaulu. 23 Hemaabe pelane penui macang eh rangdi, "Aipaude David napei meni?" 24 Dede Phariseemedung aide siu luge, penui rangdi, "Mina aipaude herakesiadung de gwa gailak, herakesia kedibe Beelzebul* kengkieng gade gwale." 25 Dede Jisu penui lungcet cilu eh penuide rangdi, "Hegwangram leune de penuikatei penui kakga ngngwa sia kedibe mtamrwa dizie, nah namdi leune mede kelak keheibe de penuikatei penui kakga ngngwa sia kedibe sap gailak. 26 Magade Satan ne Satan de gwa mpet cai, pa pekatei pecu regi dida. Iciu cai dainzwa pe hegwangram saplu lai? 27 Nah magade Ih Beelzebul kengkieng gade herakesiabe de gwa mpet cai, nnui namedungbe caube kengkieng gade penuide gwa mpet laino? Aipau kiede ziemne penui ne nnui tutiakbe teizie. 28 Dede magade Ih Tinggwang Rabe teu eh herakesiabe de gwa mpet cai, iciu cai Tinggwang hegwangram nnui reu gwangbam dida. 29 Mede mige kengkiengme gede kangrai di mene dainzwa pe kiga lüt delwe pe guniadung regalu laino? Ciciu kelu caine pa pe guniadung pe ki gade rega lubui. 30 Keheibe de acu ngngwa kemakbe acu renia la, nah keheibe de acu ngngwa hekwala kemakbe teizangla dila. 31 Cine Ih nnui dage ranggai la, kemau nah mide rangkemsia leune gi beuzie, dede Kemci Rabe de rang kemsia au gibeu lak. 32 Keheibe de Mina Nabe de sam kesia kerang au gibeu zie. Dede keheibe de Kemci Rabe de sam kesia kerang au gibeu lak, cude mede gwangkera mmi gade de. 33 Tsingbang de ngkwet mmilu delwe peu pe tsi keyi builu, mede tsingbang de ngkwet msiadi delwe peu pe tsi kesia builu, kedanemene pe tsi gade pe bang de cilu lalu. 34 Nnui neidui leuhmedung, nnui kesiame delwe, dainzwa makeyi ranglu laino? Kedanemene milung ga ma kekiee kebam gade mimui rangpet lalu. 35 Mina keyime pe lung pe mabam keyi gade makeyi li mpetla, nah mina kesiame pelung pe mabam kesia gade makesiadung li mpet lalu. 36 Ih nnui dage ranggai la, mina kemta sam kerang leune ziemne, penui tutiak benai cide rangdai kapzie. 37 Kedanemene n samdung gade nang mzeu de luzie nah n samdung gade ncu mmau de dizie."

38 Laisiukecimedung ge nah Phariseeme Jisu sam keli eh, ranggai, "Keledeubo, anui n dade marehi ge ngauneu lalie." 39 Dede Jisu sam keli eh penui dage rangdi, "Kesia nah kemmha ceheu marehi ge peeila. Dede caihakecibe Jonah dage marehi tei kegai de gwale marehi keda gede pwapeu lakta. 40 Kedanemene Jonah tingbazie nah tingmuizie lang cumne heka kedi pok ga kebam nzwa, Mina Nabe de tingbazie nah tingmuizie lang cumne kideube lung ga bam zie.* 41 Tutiak benai Ninevehme ceheu aide de ngngwa sap zie nah cide de mmau zie. Kedanemene penui Jonah ne penui dage zierang tei kegai gade penuilung nreulu, nah pielo, Jonah swade mige digwa kecu ge aika bam. 42 Tingbangle* Gwangpui* tutiak benai ceheu aide de ngngwa sap zie, nah cide de mmau zie.* Pa kideu penli gade Solomon maci siu zielie gwang, nah, ainie, mige Solomon swa digwa kecuge aika bam. 43 "Mcikemak rabe mina dade mpet kedidau, dui kegahdung ga kahgwang eh mtak kera peeila, dede cide ngaulu tadi. 44 Ge cide rangdi, ‘Ih kegwang a kiga Ih cailigwang dizie.’ Pa cailigwang luge, ki cide mrwa nah biak mcidi nah pe bam gage kai pwabam eh ngaulu. 45 Ipaucai pa tetpet eh pe swa siaki kecu hera keda hena de ngngwagwang, nah penui pelane gwang cika lungh dila. Ge mina cipaude ndaa kerai dau swade kekam le sia reureu dila. Cudau ceheu kesia aide de cinzwa dizie."

46 Jisu mina maadung dage marang kebamdau, ainie, pe pui nah pe caihereimedung hegwale sap eh pecu mpau zielie peeila. 47 Mikang ge pe dage rangdi, "Ainie, n pui nah n caihereimedung ncu mpau zielie peei eh hegwale sap bam lie." 48 Dede Jisu pecu rang kegaibe sam keligai, "Cau a pui nah caudung ge a caihereime no?" 49 Ge pa pe ba hwa pwa pe caisuime lamge kai eh rangdi, "Ainie, aidungde a pui nah a caihereimedung delie!" 50 Kedanemene tinggim ga kebam a Pei suibe tei kelame, cipaume a caihereime, a time nah a pui de kecune."