1 Jisu sam aidungde rangcang dige, pa Galilee gade tetdi, delwe Jordan Reuki lulegim Judea cuikui ga gwangdi. 2 Mina maadi ge pecai sui gwang, nah pa penuide cikade teingkeibeu.

3 Phariseeme kangge pe da gwang pecu kedei eh ranggai, "Mige pekie keheibe ziemne pe naude ta kedi petau ni?" 4 Jisu keligai, "Raitu gade penaide Damkegaibe mipei penai mipui de damkegai nnui kesanglaisiu gade pei meni? 5 Pa rang si eh, ‘Aipau kie de ziemne mige pe pui nah pe pei de gidi eh pe nau de ngngwa ket tei dizie, nah penai ngngwa teih ge dizie.’* 6 Cine penai hangna tadi zie, dede teih ge dizie. Ciziemne Tinggwang ne teincüt kebeude, peu mina de teu ntsamdi helo." 7 Phariseeme Jisu de keteugai, "Ciciu cai daitei Moses migede nauta laisiu pwapeu delwe pe nau de langgi lulo aja kai beuno?" 8 Jisu keligai, "Moses au nnui lung takzu kecune nnui naumedung de nnui talu builie beu, dede ndaa raitu gade cide aiciu ma. 9 Ih nnui dage rang gaila, keheibe de kemmha kecu ziemne mene pe naude ta cai, delwe keda gede luu daicai, kemmha ta tei dida; nah mipei takedi pui gede luu cai, pa kemmha ta tei dida." 10 Pa ledeukelume Jisu dage rangdi, "Mige pe nau dade aiciu cai, pe nau tei kemakbe yiki lie." 11 Dede Jisu penui dage rangdi, "Keledeu aide mileune luulu gailak, dede Tinggwang ne ngha kecume gwale. 12 Kedanemene kangge au kelak teigai kelak pe pui neki gade cinzwa mnalu, nah kangge au mina suine, nah kangge au tinggim hegwangram ziemne kelak tei kelak penuikatei de tiaklu. Keheibe de keledeu aide luulo kebuime de peu luu lulo."

13 Cidau mina kangge henamedung de ngngwa peda gwang iciu eh pe ba hwa pwa penui reu gage kai delwe kekie teibeulu kerane, dede ledeukelume penuide kesiudi. 14 Dede Jisu rangdi, "Henamedung de peu ada gwanglo, penuide kaam helo, kedanemene tinggim hegwangram au cipaume gulu." 15 Pa pe ba hwapwa henamedung reu gage kaigai, delwe samlam beu eh cikade pa tetdi.

16 Ainie, mige Jisu da gwang eh keteugai, "Keledeubo, Ih kelungta kering ngaulu kerane bata keyi daipai tei maisia no?" 17 Jisu pe dage rangdi, "Daitei nang a dade makeyibe ha keteu lano? Keyibe au ket rünne, dede nang kelungta kering ngaulu neucai, hezaidung kai kebeu de mzai lulo." 18 Minabe pe dage rangdi, "Daipau zaidung deno?" Jisu rangdi, "Mide daptset so, mmha so, rega so, kenret zierang teiso, 19 n pui n pei de rütlu, nah n kidacaina de hungpwa nkatei ncu kehung nzwa lu." 20 Rehangbe pe dage rangdi, "Ih ma aidungde pelane mzai lada. Ih daipai tei silu maisia reu no?" 21 Jisu pe dage rangdi, "Nang magade yicangsiak neucai, mie delwe n mabam pelane zwadi, delwe kegahme de peudi, iciude nang tinggim ga mabam bam luzie, delwe gwang acai suilu." 22 Dede rehangbe Jisu kerang de siu luge, pa pe suisia eh tetdi, kedanemene pa mabam kekiee ge bam kecune.

23 Jisu pa ledeukelume dage ranggai, "Ih nnui dage rangsiakte gaila, kehei mege ziemne tinggim hegwangram ga nlüt pa zie. 24 Ih nnui dage ranggai daila, keheime ge Tinggwang hegwangram ga nlüt kera swade ut ge de peu langhim miki gade liampet kecube laki lie." 25 Ledeukelume cide siu luge, penui macang süt eh keteugai, "Iciu cai caube de kelilu zieno?" 26 Dede Jisu penui de piegai eh penui dage rangdi, "Mina ne aide tei gailak, dede Tinggwang au maleune teilu bui." 27 Ge Peter keligai eh pe dage rangdi, "Pielo, anui au maleune gikap di eh ncai suila dida. Ciciu cai anui ziemne daipai bam lai?" 28 Jisu penui dage rangdi, "Ih nnui dage rangsiakte gaila, kideu keheci ga Mina Nabe pe hegwangbam kendu ga bam keludau, nnui a caisui kelume, nnuide hegwangbamdung kereiekena ga bam eh Israel leuhme kereiekena tutiak teizie. 29 Keheibe de a zi ziemne pe kidung, pe sinapeime, pe time, pe pui, pe pei, pe nau mede hangdeu de gikedime hai kiee ge ngau luzie, nah kelungta kering ngaulu zie. 30 Dede mi kekiee ge rai kelame kam dizie, nah kam kelame rai dizie."