1 Pecai benai tingcang nuge, cingkumedung nah hangkiamedung pelane Jisu de teitsetdi kera ciem riem bamdi. 2 Jewme muiteume pecu kanglu, delwe pecu teu tetdi, delwe pecu deuceudibe Pilate dage kai beudi.

3 Pecai Judas, Jisu de tuigai kebeube de, Jisu de mmaukedi ci luge, pa pe maupet eh rangkanggeu camrei de cingkumedung nah hangkiame dungde pwacaili gwangbeu eh ranggai, 4 "Ih mau kemakbe de tuigai beu eh kemau tei dida." Dede penui rangdi, "Cide anui zie ma? Nang nkatei cetlu." 5 Pecai pa rangkanggeudung de kerecaki gage kelien gaidi eh, tetdi, delwe mie pekatei ngkak tsaidi. 6 Cingkumedung rangkanggeudung de keulu eh rangdi, "Aide kerecaki mabam gage kaikera hezai meda kedanemene cide au hejai mi kecune." 7 Penui makie aide ngngwa mpaulu delwe rangkang de le liketeibe luh luilu, sangme raukie ge tei kerane. 8 Aipau kiede ziemne henai kecang de cipau luhde de, "Hejai luh"* lie qula. 9 Ciciu eh caihakecibe Jeremiah sam, "Penui rangkanggeu camrei de keulu, Israel namedung ne pemi riet pwa kebam de, 10 delwe penui cide le liketeibe luh luilu, Rampaube acu rang kebeu nzwa,"* de eh rang kenzeu de teicanglu.

11 Jisu deuceudi dwa ga sap, nah deuceudi pecu keteu eh, "Nang Jewme hegwangpei deni?" Jisu keligai, "Nang kerang de da." 12 Dede cingkumedung nah hangkiamedung Jisu de mmau cuh ge, pa magede keli ma. 13 Pecai Pilate pe dage rangdi, "Penui ncu mmau kebam ma aidung pelane nang siu meni?" 14 Dede pa pecu mmau kebam samdung de kette keli ma, cine deuceudibe pe swagah sütdi. 15 Cu Kahkegwang Ngyi ramsangne deuceudibe hemaabe suibe hebaangme hangge de lungmpet beu kecu hezai. 16 Cipau tingdau mteici kecu hebaangme ge, Barabbas lie kecu ge bam. 17 Cine hemaabe gwang ngkwa luge, Pilate penui dage rangdi, "Nnui ziemne acu peu cau de lungmpet beu neu no? Barnabbas mi Khrista lie qu kelabe Jisu zie no?" 18 Kedanemene penui Jisu de ngau penui riak eh nimpwa pe ba gage kai kenzeu pa ci kebamne. 19 Pa tutiakbam ga kebam dau, pe nau pe dage sam langgai eh rangdi, "Nang maukemak cipau peide dage magede teigai so. Kedanemene Ih nzieziu amang lamde cipau peide ziemne keherei sütlie." 20 Cu cingkukedime nah hangkiamedung, Barabbas de kie kera, dede Jisu de teitsetdi lo kie kera hemaabe lung teigai beu. 21 Deuceudibe penui dage ranggai, "Aipau kena kakgade caude de peu acu lungmpet beu neu no?" Ge penui rangdi, "Barabbas," 22 Pilate penui dade rangdi, "Ciciu cai Khrista lie qu kelabe Jisu de Ih daipai tei laino?" Penui pelane keligai, "Pecu gwaktsetdi." 23 Pecai pa rangdi, "Daitei no? Pa daipai mau tei pwabam no?" Dede penui, "Pecu gwaktset dilu," de sah mtei reureu di. 24 Pilate pa magede teigai kelak ngau luge, meliene kehebwak cuh laidi. Cine pa maadibe dwade dui pwalwe pe ba mtiak eh ranggai, "Mina aipaude jai ziemne au Ih mzui cangsiak lie, cide nnui katei cet lulo." 25 Mina pelane keligai, "Peu pe jai anui reu nah anui name reu ga gwang lulo." 26 Pecai pa penui de Barabbas de lungmpet beudi, dede pa Jisu de dap delwe pecu gwaktset kera peudi.

27 Pecai deuceudibe reugwame Jisu de kedibe kilung ga ngngwa nlütlu delwe reugwame pelane de peu gwang pedwa twagwalu. 28 Penui pe painidung radi delwe pai giereba pecu peu bahlu. 29 Penui hetu peurwa ge teilwe cide pe peu gage kaigai, nah tsingtie ge pe ba zetle ge kaibeu. Penui pedwa keumie pecu henui tei eh rangdi, "Jewme Gwangpei ring teilo!" 30 Penui pecu mcai msuilwa, nah tsingtie keulwe pepeu hekei bamdi. 31 Penui pecu henui teicang dige, penui pe dade cwatie de radi eh penia pecu kai dai beudi, delwe pecu gwaktsetdi kerane pecu teu tetdi.

32 Penui tetpet lage, Cyreneme pei Simon de ngaulu, penui pe kemei tei eh pecu peu krus pwa. 33 Penui Golgotha pekie, "Mipeura Ni," lie qu kela ni gega gwanglu. 34 Penui zau gage kekaa hai ncütlwe pecu sak kera peu. Dede pa msigai ge, pa cide sak raudi. 35 Penui pecu gwakdi ge, penui dacak eh pe painidung mzilu, 36 pecai penui bamlu delwe cika pecu kwa bamdi. 37 Penui pe peu reu gage pecu kemmau sam, "Aide Jisu, Jewme Gwangpei," de eh raugai. 38 Pecai kerega hangna pecu ngngwa gwaktset, hangge pe zetle bie nah hangge pe hile bie. 39 Pecu tetkah kegwangme penui peungum pecu kii eh, 40 rangdi, "Nang kerecaki teimsia delwe langcum ne gage cide tei dailu kerabe de, nkatei ncu kelilulo! Nang Tinggwang Nabe liecai, krus gade nghung lulo!" 41 Cide nzwa cingku kedime nah laisiukecime nah hangkiamedung de si eh penui henui tei eh rangdi, 42 "Pa kedame de kelilula, dede pa pekatei pecu keli gilak. Pa au Israelme Gwangpei! Peu pecu cu krus gade nghung lulo, ciciu cai anui pecu nlum luzie. 43 Pa Tinggwang de nlumla, peu cu Tinggwang de pecu kelibeu lo, Tinggwang pesui lie cai. Kedanemene pa rangla, ‘Ih au Tinggwang Na.’" 44 Cinzwa eh pecu ngngwa gwak pwa kebam keregabe kenade pecu keki sam rangdi.

45 Cidau tingna tingding gade tinghegi bamcum kecang kideu reu pelane muitingdi. 46 Tinghegi bamcum tingdau ge, Jisu sahbak eh ranggai, "Eli, Eli, lama sabachthani?" pekie, "A Tinggwang, a Tinggwang, nang daitei acu gidi no?" 47 Cika kangge sap kebamme cide siu luge, penui rangdi, "Pa Elijah de qu zeu da." 48 Ge zette penui hangge pau pakmie kenlünpai ge gage zau kehia mpunglu, herwatie ge gage kailu, delwe cide pecu sak kera pwapeu. 49 Kedame rangdi, "Pecu peu ciciu bamdi. Elijah gwang pecu kelilu ziemi lakbi kecu anui pie go." 50 Pecai Jisu sahbak gai dai eh pe rabe kaibeudi. 51 Ainie, kerecaki kehezupai de pe tün gade pesing kecang hakmiedi, nah nnuiteu, nah tangtsudung pangpop di. 52 Heraudung ngkeidi, nah kemcime kekiee ge zip zeu kebamdung de cuhdi. 53 Jisu ringcuhdai kelucai, penui herau gade mpetdi, delwe kemci namdi ga lüt eh mina kekiee ge de peu ngaugai. 54 Cu haireukedibe nah pecu ngngwa Jisu de pie kebamme, nnuiteu kecu nah matei kedidung de ngau luge, penui ngngi sütti eh rangdi, "Aide Tinggwang Nabe kesang delie." 55 Mipui kekiee ge Galilee gade Jisu caisui eh pecu ngha kelame, kemdei gega de pie bam. 56 Cipaume kakga Mary Magdalene, James nah Joseph pui Mary, nah Zebedee na kena pui bam.

57 Cipaunai tinghegi dige, Arimathea gade keheime ge gwang, pe zi Joseph nah pade Jisu caisuime ge. 58 Pa Pilate da gwang eh Jisu paau kiegai. Ge Pilate pe paau de pecu peu lulo aja kai beudi. 59 Ge Joseph pe paau de pwalu eh langcimpai kemci ge le hezuilu, 60 delwe tsurakang gage perau zielie keheci ge tei pwa kebam gage kaidi. Pecai pa tangtsu kedi gele herau kimuiki pwa kapdi delwe tetdi. 61 Mary Magdalene nah Mary kedabe pui de cika herau de mcwa eh ntum bam.

62 Pecai benai, cide Maketelei cai benai cingku kedimedung nah Phariseemedung Pilate de ngngwa ngkwa bam. 63 Penui rangdi, "Kedibo, mide cwa kelabe pa ring kebam dau, ‘Langcumne cai Ih ringcuh dai luzie,’ de kerang de anui nsung bam. 64 Cine langcumne kecang herau de kwakwak kera samkai beulo, mecai ledeukelumedung gwang pe paau de regalwe minadung dage, ‘Pa ketsai gade ringcuh dida,’ de rang zie lu, nah kecwa kekambe au keraibe swade siaki dizie." 65 Pilate penui dage rangdi, "Reketme de nzanglu. Mie delwe nnui kwakwaklu kebuita kwakwak lulo." 66 Cine penui mie delwe tangtsu de giaklu eh reketme de peu herau de kwa bamdi.