1 Pecai Tinggim hegwangram au relei kemcime hangkerei penui mitaubung pwalwe lakciube de dau zielie mie kecu nzwa delie. 2 Penui hangmengei bau au mie nah hangmengei bau au mriak. 3 Kedanemene kemieme bau de penui mitaubung pwa keludau, penui midui gede keusi ma. 4 Dede kemriakme bau penui mitaubung nah miduibung gage midui keusilu. 5 Lakciubepei gwang ridi ge, penui ziangmui eh zip kapdi. 6 Dede tingmui muisum dau mage sahbak eh, ‘Ainie, lakciube! Tetpet delwe pecu redau lulo.’ 7 Ge relei kemcimedung de cuhlu delwe penui mitaubung mtei kaplu. 8 Kemieme bau kemriakme bau dade kiedi, ‘Nnui midui kesa anuide peulo, kedanemene anui mitaubungdung mmütdi zeu delu.’ 9 Dede kemriakmebau sam keligai, ‘Anui nah nnui ziemne cang gailak ta. Kezwame da mie delwe nnui ziemne lui lulo.’ 10 Penui lui zie lie mie kedidau, lakciubepei gwang eh mtei teu kebamme de ngngwa meunui ngyi ga mi di, nah kikambe ngkuidi. 11 Pecai releime kedame bau gwang eh rangdi, ‘Kedibo, kedibo, anuide kikam ngkei beulo.’ 12 Dede pa sam keligai, ‘Ih nnui dage rangsiakte gaila, Ih nnuide cima.’ 13 Cine kwabam lulo, kedanemene nnui pe tingba mede pe bamdakkak ci melu.

14 Tinggim hegwangram au mige hebeuh tei lai kezeu dau, pe kilamedung de qulwe pe mabam penui ba gage kaikebeu nzwa delie. 15 Pa hangge de kecak geu cang mengei peu, kedage de kecak geu cang na, nah kedage de kecak geu cang ge peu. Pa penui hange ge kecu de teilukebui nsam gade nzi beudi, delwe pe beuh ga tet jüja miedi. 16 Kecak geu cang mengei ngau kelube de mie delwe heli tei eh keda kecak geu cang mengei ge tei silu. 17 Cinzwa eh kecak geu cang na ngau kelube de kecak geu cang na mmi silu. 18 Dede kecak geu cang ge ngau kelube de mie hangdeu kuilu, delwe pe mpaube rangkang de kebai nzeudi. 19 Peting ketiee ge cai cipau kilamedung mpaube cailigwang delwe penuide qugai, penui pe rangkang teu daitei lubi kecu keteu kerane. 20 Kecak geu cang mengei ngau kelube de kecak geu mengei keu gwang silu. Pa rangdi, ‘Kedibo, nang acu kecak geu mengei peu. Dede ainie, Ih kecak geu cang mengei ge tei sidai luda.’ 21 Pe mpaube pe dage ranggai, ‘Tei dau da, kila keyi kesamsangbo! Nang makecam nage gade de samsang kelune. Ih ncu ma kekiee ge reu keteube tei beuzie. Gwang n mpaube suiyi mzi lulo.’ 22 Kecak geu cang na ngau kelube de gwang eh rangdi, ‘Kedibo, nang acu kecak geu kena peu. Dede ainie, Ih kecak geu cang na ge tei sidai luda.’ 23 Pe mpaube pe dage rangdi, ‘Tei hemi da, kila keyi kesamsangbo! Nang makecam gade de samsang kelune. Ih peu ncu ma kekiee ge reu keteube tei beuzie. N mpaube suiyi mzi lulo.’ 24 Pecai kecak geu cang ge ngau kelube de gwang lu rangdi, ‘Kedibo, Ih nang au mtingsüt kecu mege kecu ci. Nang ling gai kemak gade de rumla, nah teizanggai kemak gade de luhlüt la. 25 Ih ngngidi, cine Ih mie delwe hangdeu gage n gu kecak geu de kebai nzeudi. Ainie, ngu aika bam delie.’ 26 Dede pe mpaube sam keligai, ‘Nang kesia nah kenghet kilabo, Ih ling gai kemak gade de rumla, nah tei zanggai kemak gade de luhlüt la kecu nang cicai. 27 Ciciu cai nang a rangkang pwa rangkang keteume de peudi kerabe, nah Ih cailigwang kecudau Ih agu rangkang gage pekaide si eh ngaulu kera ge. 28 Ciziemne pe dade kecak geu de keu dilu delwe kecak geu cang kerei kebam kilabe de peu dilu. 29 Kedanemene keheibe de kebambe de peu si zie, nah pa kieesüt bam luzie. Dede kegahbe keheibe dade kecam nage kebamde de peda de keudai teu dizie. 30 Kemta kilabe de hegwale kemui gage kelien gaidi, kehap nah geigim pung kebam gage.’

31 Mina Nabe hecili eh pe tinggimgwame de ngngwa eh kegwang dau, pa hegwangbam kendu ga bamzie. 32 Pe dwaga heleuh leune gwang ngkwa zie, nah pa mina de keu ntsam dizie, meurün kekwabe meurünna de hemeudung kakgade keumpet camdi kela nzwa. 33 Pa meurünna de pe ba zetle ge kaizie, dede hemeudung de au pe hile ge kai dizie. 34 Pecai hegwangpei pe zetle kebammedung dage rang zie, ‘Gwanglu, a Pei Tinggwang ne samlam kebeumedung, kideu damkelu gade nnui ziemne mtei teukela hegwangram de gum lulo. 35 Kedanemene Ih mzeu lage nnui acu matyei kera peu; Ih hereu lage nnui acu sak kera peu; Ih sangme ge teila ge nnui acu hegia beu; 36 Ih paula lage nnui acu pai bah beu; Ih teeinei lage nnui acu ngkwet beu; Ih hebaang tei lage nnui a da gwang.’ 37 Pecai makesangme pe sam keli eh rangzie, ‘Rampaubo, nang daidau mzeula eh ngau eh anui ncu peu matyei no? Mede hereula eh ncu sak kera peuno? 38 Nah daidau nang sangtei kela ngau eh ncu hegia no? Mede paula eh ncu pai bah beuno? 39 Nah nang daidau teeinei nah hebaang tei la eh anui ncu ngau eh n da gwang no?’ 40 Pecai Hegwangpei penuide samkeli eh rangzie, ‘Ih nnui dage rangsiakte gaila, nnui a siname keceu aidungde dage tei kegaidungde a dage teigai delie.’ 41 Pecai pa pe hile kebamme dage rangzie, ‘A dade tet dilu, nnui reset kepungme, tetpwa madaude mütdi kelak mijaai, herakesiabe nah pe gwame ziemne mtei pwa kebam ga gwang dilo, 42 kedanemene Ih mzeu la, dede nnui magede tyei kera pwa acu peu ma; Ih hereu la, dede nnui sak kera ma gede acu pwapeu ma; 43 Ih sangtei la, dede nnui acu hegia beuma; paula la, dede nnui acu pai bah beu ma; teeinei la nah hebaang teila, dede nnui a mapie ma.’ 44 Pecai penui de keligai zie, ‘Rampaubo, daidau ge nang mzeu, mede hereu, mede sangme tei, mede paaula, mede teeinei, mede hebaang teikela ngau eh anui ncu ngha meno?’ 45 Pecai pa penui samkeli eh rangzie, ‘Ih nnui dage rangsiakte gaila, nnui keceu aidungde dage teigai kemakte a dage de teigai mede lie.’ 46 Jisu ranggai, aidungde au kelungta keherei kera ga gwang dizie, dede makesangme au kelungta kering ga gwang dizie."