1 आंय प्रभुहू देवान्यापोअ उबोइत रोल्यू देख्यू आन तिये कोयो, "खांबोअ सुटीही लागाव, जिहीं वाअहीं ओटू आलीत सेके आन तों आखो माअहुंउं मुंडीपोअ पाड़ीत कोइत पुकरान पुकरा कोओ; आन तिहीं रोत जों वासाय, तियांहां आंय तारवाआ वाअहीं माअहीं; तिहींमेहें रोत एक बी ने नाहीत सेके, आन जों सोताहा वासाओ जाय तों ने वासाइत सेके. 2 काहाके तें खुंइत कोइत पातालोम उतरीत जाय, तिहीं रोत बी आंय आथ आगाड़ी कोइत तियांहां लेत आविहीं; तें जुगोम सोड़ीत लागे तिहीं रोत बी आंय तियांहां उतारीत लेत आविहीं. 3 कर्मेल डोगोअ टुशापोअ निकाइत जाय, तेबी तियांहां आंय होदीत काडीहीं, आन तें दोऱ्याआ बुंद्यामेहें माआं नजरेम रोत निकाय, तेबी तियांहां आंय हाप टोसे तेहें आदेश आपीहीं. 4 तियांहां दुस्मोन ओड़तुज गुलामीम लेत जाय, तिहीं बी तारवाआ लेत कोइत आंय तियांहां माआड़ी देहीं, आन आंय तियांपोअ हाजाआ काजे नाहां पोन नुकसानोअ काजे नजर टाकिहीं.

5 सेनाआ यहोवा देवोअ आथलीइल्या वाअहीं,

धरती ओगलीत जात्ली,

आन तियीपोअ रोनारे आखे विखु कोअत्ले;

तें आखेन आखे मिसरोअ नोयीइ होस ओत जात्ले, जें वादते जात्ले आन घोटीत जात्ले.

6 तो जुगोमेहें तियाआ कोअ बोणावत्लू, आन धरतीपोअ जुगमोंड्लाआ पायू टाकत्लू,

आन दोऱ्याहा आदेश कोअत्लू ताहां पाईं धरतीपोअ वोहो वोलत्लो,

तियाआज नाव यहोवा होय.

7 "ओ इस्राएलवाला," यहोवा देवोअ ओं वसन होय, "केहें तुमू माआं काजे कुशीवालाआं होस नाहां के? केहें आंय इस्राएलोहो मिसर देसोम रोत आन पलिश्तीवालाहां काप्तोरोम रोत ने काडीत लेत आयू के? आन अरामीवालाहां कीरोम रोत ने लेत आयू के? 8 पाला, यहोवा देवोअ नजर या पापी राज्यापोअ लागीत होय, आन आंय याहा धरतीप रोत आरवीत टाकिहीं; तेबी आंय याकोबोअ घराणाहा आखोज ने आरवो," प्रभु यहोवा देवोअ ओंज वसन होय.

9 "माआ आदेशो वाअहीं इस्राएलोअ घराणो आखा देसोमेहें रोत फोलो सारीमेहें ओन सारतेहे तेहेलोहो साराय, पोन तियाआ एक बी मोटू दाणू पुयींपोअ ने पोड़े. 10 माआ माअहूं मेऱ्येए आखे पापी जें कोतेहे , ‘ते आफत आमापोअ नाहां आवनारी, आन आमुहूं नाहां केंडनारी,’ तें आखे तारवाइ वाअहीं मोइत जाय."

11 "तियाज गालाहा आंय दाविदोअ पोड़ल्यी खुपड़ीही उबी कोअहीं, आन तियाआ वाड़ीइ नाकाहा हुदारिहीं, आन तियाआ खुटोहो वापिस बोणाविहीं, आन जेहलोहो तों जुना वाडोम ओतो, तेहलोज आंय तियाहा बोणावीहीं; 12 जिहीं वाअहीं जें बाकी रोल्ये एदोमवाले होय आन जें बी माअहें माआं कोत गोणाअतेहे तियां आखा देसोहो ताबाम कोइत सेको, ओं काम जो पुरो कोअहे तिया यहोवाआ ओंज वसन होय."

13 यहोवा देवोअ ओं बी वसन होय, "पाला,

एहेलाहा दिही आवताहा के ओल जुपनारो वाडनाराहा

आन दाराक्शे पेस्कीइनारो बीज लागाड़नाराहा ओलगीत लेय;

आन डोगोम रोत नोवू दाराक्शाआ रोहो गोलू वोले,

आन आखा डोगोम रोत निहूं वोले.

14 आंय माआं इस्राएलवाला माअहुंहूं गुलामीम रोत काडीत लेत आविहीं,

आन तें उजड़ीइल्या होयरोहो फाश्येए हुदारीत तिहींम वोहती कोए.

आन दाराक्शाआ मोला लागाड़ीत तियांआं रोहो पिये,

आन बोगिसा लागाड़ीत तियांआं फोल खाय.

15 आंय तियांहां, तियांआंज जागाम ठाईं देहीं,

आन मी तियांहां जो जागू आप्युहू तिहींम रोत तें फाशेए केदिहीं ने उपटे,"

एहें कोत यहोवा देवे कोयोहो.