Apocalipse 13

बेन जनवारे

1 ताहां आंय दोर्‍याम रोत उपोअ आवत्लाहा एका जनवारोहो देख्यो, तियाआ दोहो हिंगे आन हांत मुनके ओते. तियाआ हिंगोपोअ दोहो टोपा ओता आन तियां आक्खा हिंगोपोअ देवोअ निंदाआ नावे लेखल्ये ओते.✝13:1 दानि 7:3; प्रगटी 17:3,7-12 2 आंय जिया जनवारोहो देख्यो, तो बिलाड़्या वागोअ होस ओतो पोन तियाआ गुडा आसालाआ गुडाअ होस आन मुख सिहांआं सोबीइ होस ओतो,✝13:2 दानि 7:4-6 आन तिये अजगरे तियाआ ताकत, तियाआ राजगादी आन वोडू आधिकार तियाहा आपी देदू. 3 आंय तियाआ मुंडोमेहें एक एहेलोहो दुखाअलो देख्यो, आन तो मोइत जाय एहेलोहो ओतो, पोन तियाआ तो दुखाअलो हाजो ओत गोयो, पुरी धरतीइ माअहें बोगलाइत कोइत तिया जनवारोअ फासाड़ी जाने वोल्ये. 4 माअहें तिया अजगरोअ पागे पोड़्ये, काहाके अजगरे तिया जनवारोहो तियाआ आधिकार आपी देदुतो, तें माअहें एहें कोत कोइत तिया जनवारोअ बी पुज्या कोअयी, "या जनवारोअ हारको कोडो होय? कोडो याअरी लड़ाय कोइत सेकेहे?"

5 आन तिया जनवारोहो लोफाट्यी गोठी, आन विणलाज्यी गोठी कोइलाअ सोब आप्यीते; आन तियाहा ओं कोइलाअ बेशाड़ीस मोयना आधिकार आप्युतो. 6 तिये देवोअ अपमान कोइलाअ आन तियाआ नावोअ, तियाआ रोअलाअ जागा आन तियां माअहुंउं निंदा कोउ वोल्यू, जे होरगाम रोतेहे. 7 तियाहा पवित्र माअहुंउं आरी लड़ाय कोइलाअ आन तियांहां हारवीइलाअ आदेश मिल्यू, आन तियाहा हारेक कुल, माअहें, बाशा आन देसोपोअ आधिकार जोड़्यू. 8 जियांआं नावे कोल बोणावीइलोअ पेल गाराहा ओवल्या मेडाअ जिवनोअ पुस्तकोमेहें नाहां लेख्ये, एहेलेहे धरतीपोअ रोनारे आक्खे माअहें तिया जनवारोअ पुंजन कोए.

9 जियाआ कान ओय, तो उनाय. 10 जियाहा जेलेमेहें जाअलोअ ओय, तो जेलेमेहें जाय; जो तारवाइ वाअहीं माए, तियाहा बी तारवाइ वाअहीं माईं देवाय. ओमे पवित्र माअहुंउं धिर आन विश्वासोअ वेल होय.

11 एका बिहीरा जनवारोहो धरतीमेहें रोत निहीत्लाहा आंय देख्यो, तियाआ मेडाअ हिंगोअ होस बेन हिंगे ओते, आन तो अजगरोअ होस गोगतोतो. 12 तो तिया पेल्लाआ जनवारोअ आखु आधिकार तियाआ सामने कामे लागाड़तुतो; तो धरती आन तियीमेहें रोनाराहा पेल्लाआ जनवारोअ भक्ती कोआड़तुतो, जियाआ मुंडोम दुखतो निहींयोतो, पोन तों दुखतो हुदरीत गोयोतो. 13 तो जुगोम रोत धरती पोअ आग पाड़त्लू, एताहा वोडा समत्कार माअहोंअ सामने देखाड़तुतो. 14 जनवारोअ सामने तियाहा जियां समत्कारोहो देखाड़ीइलाअ आदेश जोड़्युहू, तियां समत्कारोवाअहीं तो धरतीपोर्‍याआ रोनाराहा भटकावेहे. आन धरतीपोअ रोनाराहां कोहे के जिया जनवारोहो तारवाअ वाज्यीते तों जिवीत गोयोहो, तियाआ मुर्ती बोणावा. 15 तियाहा जनवारोअ मुर्तीमेहें जिव टाकीइलाआ आदेश मिल्यू, के ते मुर्ती गोगीत सेके आन तियां आखा माअहुंहूं माईं देये, जे तिया जनवारोअ भक्ती ने कोए. 16 तिये जनवारे हाना-वोडा, गरीब, कुन्बी, मालिख, पावर आखा माअहुंहूं तियांआं आथोपोअ नेत निंडाअ पोअ निशाणी कोआड़े. 17 जियापोअ ते निशाणी जनवारोअ नाव नेताहां तियाआ नावोअ आकड़ू ने ओय, तो लेणो-देणो ने कोइत सेके.

18 इंहीं ओकलेए काम होय; जियाहा बुद्दी होय, तों जनवारोअ नावोअ आकड़ू काडुहूं जोवे; काहाके तो एखा माअहुंउं नावोअ आकड़ू होय आन तियाआ आकड़ू सोव होव साहासाट होय.✝13:18 प्रगटी 17:9