प्रगटीकरण 14

मेडू आन तियाआ माअहें

1 आंय फाशोअ देख्यो, मेडू सियोन डोगोपोअ उबू रोत रोयुहू, तियाअरी एक लाख शोवरेशाड़ीस हाजार माअहें होय, जियांआं निंडाअ पोअ तियाआ नाव आन तियाआ आब्हाअ नाव लेख्योहो.✝14:1 यहे 9:4; प्रगटी 7:3 2 आंय जाअखीलीही जोरे वोहनारा खाडीइ पाअयोंअ आन जाअखीलीही जोरे गाजीइलाअ आवाज होरगामेहें उनाअयू, आन जो आवाज आंय उनाअयू तो तंबिवरो वाजाड़नाराआ आवाजोअ होसे ओतू. 3 तें माअहें राजगादीइ सामने, शार जनवारोअ आन डायहांआं सामने एक नोवो गित गावतेते. तियां एक लाख शोवरेशाड़ीस हाजार माअहुंउं सिवाय, जे धरती पोअ वेसाते लेदेते, बिहीरो कोडोज तो गित नाहां सिकाइत सेको. 4 एं माअहें बोईंइरी नाहां सुके, एं कुवांरे होय; जिहीं काबी मेडू जाहे, तें तियाअरी सालतेहे; देवोअ आन मेडाअ काजे पेल्लाआ फलोअ होस तियांहां वेसाते लेदेहे. 5 तियांआं सोब खोटो नाहां गोग्यी, ते निर्दुस होय.