1 माआं पाव्हीइला, इस्राएलवालाआं तारण ओवुहूं जोवे ए माआं जास्ती इश्शा आन देवोहो प्रार्थना होय. 2 आंय नक्की कोत सेकोहो के तियांहां देवोअ काजे धुंद होय, पोन खोरी बुध्दी वाअहीं नाहां. 3 काहाके देवोअ सतीपणो रोत ओजाण्ये ओत कोइत सोताआ सतीपण थोपाड़ीइलोअ कोशित कोअतामेहें तें देवोअ सतीपणोअ ताबाम ने आये. 4 काहाके विश्वास कोअनारे आखे माहें धर्मी ठरुहूं जोवे काजे, ख्रिस्ते कायदाआ सेवट कोई देदुहू.

5 काहाके कायदावाअहीं जोड़ेहे तिया सतीपणोअ बाप्तिम मोशे ओं लेख्योहो के, "जो माहुंउं कायदाआ पालन कोए तोंज जिवतो रोये." 6 पोन विश्वासो वाअहीं जो सतीपण जोड़ेहे तो एहें कोहे, "तू ताआ मोनोमेहें एहें मा कोही, होरगाम कोडो सोढ़े?" मोन्ज्ये ख्रिस्ताहा निसे हादीत लेताविलोअ काजे. 7 नेत "अधोलोकोम कोडो उतरे?" मोन्ज्ये ख्रिस्ताहा मोल्याम रोत जिवाड़ीत उसे लेताविलोअ काजे! 8 तों एहें काहा कोहे? के, "वसन ताआ जागे होय, ताआ सोबीमेहें आन ताआ मोनोमेहें होय," ओंज तिया विश्वासोअ वसन होय, जों आमू परसार कोअताहा. 9 काहाके जर तू ताआ सोबी वाअहीं ईसु प्रभु होय कोत कबुल कोअही आन देवे तियाहा मोल्या मेहें रोत जिवाड़्युहू एहेलुहू विश्वास कोअही, ताहां तू हुदाअलीज वासात जाही. 10 जों मोनोवाअहीं विश्वास कोअहे तों धर्मी ठरेहे, आन जों सोबी वाअहीं कबुल कोअहे तियाहा तारण जोड़ेहे. 11 काहाके वसन एहेंकोइत कोहे, "जो कोडो तियापोअ विश्वास कोअहे तों ने होरमाय." 12 यहुदी आन बिगर यहुदीमेहें किज फरक नाहां, काहाके तो आखाआ प्रभु होय आन नाव लेत प्रार्थना कोअनारा तियां आखाहा खुल्ला मोनोवाईं आशिर्वाद आपेहे. 13 काहाके वसन कोहे, "जों कोडो प्रभुउ नाव लेय, तियाहा तारण जोड़े."

14 पोन जियापोअ तियां विश्वास ने कोअयू, ताहां तें तियाआ नाव कि कोइत लेत सेकतेहे? आन जियाआ बाप्तिम तें ने उनाअये, ताहां कि कोइत विश्‍वास कोइत सेकतेहे? आन परसार कोअनारो ने ओवो ताहां तें केहें कोइत उनात सेकतेहे? 15 आन जर सेवकोहो बाअथे ने मोकले ते संदेश कि कोइत परसार ओवनारु? जेहलोहो वसन कोहे, "हाजी बातमी लेतावनाराआ पाग केताहा बाहरी होय!"✝10:15 यश 52:7 16 पोन ते हाजी बातमी आखाज मान्यो ने कोअयी. यशया सोताहा कोहे, "प्रभु, आमाआं संदेश उनात कोइत कोडे विश्वास कोअयू?"✝10:16 यश 53:3 17 तिहीं वाईं, होंबलीइतेहे ताहां विश्वास आवेहे आन जों होंबलीइतेहे तों ख्रिस्ताआ वसन होय.

18 पोन आंय फुसोहो, "केहें तियां नाहां होंबल्यो के?" तियां होंबल्योहो: काहाके लेख्‍योहो,

"तियांआं आवाज आखी धरती पोअ,

आन तियांआं वसन धरतीइ कानेकोपरे जाआं पोतीत गोयोहो."

19 फाशुउ बी आंय फुसोहो: हुदाअलीज इस्राएलवालाहां ने समजाअयोतो के? समजाअयोतो, पेल ते मोशे कोहे,

"जे माअहें माआं कायनाहां

तियां वाअहीं तुमू खोद्राय कोअनारे बोणीत जाहा एहेलोहो आंय कोअहीं;

आन फोगा माअहूं वाईं

आंय तुमुहूं खोत लागाड़ीहीं."✝10:19 कायदा 32:21

20 आन यशया वोडी हिमते वाईं कोहे,

"जियां माहूं ने होद्यू तियांहां आंय जोड़ीत गोयू;

आन जियां माआं बाप्तिम माग जाआं ने काड्यू तियांपोअ आंय प्रगट ओवू."✝10:20 यश 65:1

21 पोन इस्राएलोअ बाप्तिम तो एहें कोहे,

"आंय एक आदेश ने माननारा आन भान्गड़ कोअनारा माअहोंअ वोल आखु दिही माआं आथ पसरीत रोयू."✝10:21 यश 65:2