1 Nuatpaw Zaw* Jesuh Khrit Sityang Poai acuːk saihnyak. 2 Hngawpawe Isaiah jok hnguːt khyang:

"Nuatpawaw naa, ‘Ny hngoaimaw va ceepaw y tuːhlu,

yn cee nyang lyamsaa hai y si.’

3 Doaiduka athaii pahuat apang,

Mawhpaw lyamsaa byih jyt;

‘yn tawk puːnpawk nyak lyam singsa byih jyt,’ y tii."

4 Baptisma Jawhan cee khongkhuca kuːh luu theilaa baptizen y bei.* "Pet duk kuːh hluːh nyak la jubaijei nyak baptisma bawng y susaih." 5 Judah pee jaa kuːh khyang haa laa Jerusalem luh a kuːh haa tomti Jawhan cengnga ym zet. Ym pet haa tomti saih awla Jordan tuiiguu vyng Jawhen cengnga baptisma ym khyammei giah.

6 Jawhan cee sangsi hngua eyng tyakeitih suisyak dy, sawvuːn ziangjoii ziangei laa, khau laa doaiduːk khoituii y ei. 7 Yn susaih khyang cee, "Keei thyak kyng phungan liantih, keei hnguva lu vy. Keei cee yn khu vyng kuːh khuphawtyap jawi kuːt khy shut hai tuan jonga. 8 Keei cee nyangmi haa tuijyng baptisma ky bei luu jyang, ynbawlakhy yn naa cee muikhaw Cim myng baptisma bei jy," y tinyak.

9 Ynhnguva Jesuh cee Galilee pee Nazareth luh kuːh lu theilaa, Jordan tuijyng Jawhan cengnga baptisma y khyammei. 10 Jesuh tui dukkuːh thooluu hnguva, huankhu hngawngei theilaa Muikhaw Cim cee khuːzaw pahuat bawva ynih huannaa komlue hlyi. 11 ✝Yn hnguva huankhu kuːh thaii pahuat a luː "Nyang cee keei lung duk kuːh ky khiat khyang Zawpawe ny si," tilaa y hyau.

12 Yn pynnyng Muikhaw na Jesuh cee khongkhucaa tuːh hlyi. 13 Khuhnguːp phiikip kkongkhuca a myi hnguva Khukhawng naa hlumhlik khyang y khyam lawh. Yn duːn nyng hyangsei pawngzawe haa dy y myi, yn hnguva huankhu ceepaw haa naa Jesuh ym lupan nyak.

14 Jawhan phehimm gyak pynyng, Jesuh cee Galilee pee jaa zet theilaa Nuatpaw sityang poai y susaih. 15 ✝"Acuːn ngawehlue, Nuatpaw teengpee cee lawilue hngyh. Jubaijei laa sityang poai jum byihjyt!" y tinyak.

16 Jesuh Galilee tuiili kyam maa zet hnguva, ngawsuitih Simon laa y nau Andrew tuili jyng pykva khyak khyang y hnguh. 17 Jesuh naa, "keei hngu lyklue hngih," "Nyang hngih cee khyang hliangtih a ky thawn shyak ky" y tinyak. 18 Yn haa naa ym pykva haa dyyi theilaa Jesuh hngulawng y hngih lykkei hlyi.

19 Hnguva meihzawe paan nawva zet pynyng Zebedee zawpawe James laa y nau Jawhan lawng dukkuːh y hnguh. Yn hyih cee lawng dukka pykva y hngih sang. 20 Sunshyang kawva yn haa y pannei hlyi, ym pawe Zebedee la lawng ngyng myitih hawsaw haa tawhnguːt awla hngulawng ym lykkei hlyi.

21 Jesuh laa hngulawnglyktih haa Jin hnguːp phawlu hnguva Kapanau luh a ym zet, Jesuh Sinakok ka zet theilaa y voang hnguva y cawkhyau. 22 ✝Yn cawkhyau khyang cee khyang hanaa ym muːn nyak, ibawthawnnyngmaatijyngcee yn haa eyng uppyngtih baw y cawk, tala tuattih baw cawkhyau si jo.

23 Yn duːn nyng muikhaw see puhei khyamtih khyang pahuat yn haa sinakok dukka y myi. 24 Yn cee "Nazareth luh zaw Jesuh, keeimi eyng ibaw ny luːnyak maa? Keeimi shimphak haija ny luu vei? Nyang u tinyak khyang ky hnguat Cim tih Nuatpaw pahuat ny si!" tila y pang.

25 Jesuh naa "poaija myih, yn dukka kuːh lyt," y tinyak.

26 Muikhaw see naa yn khyang hiev shyak theilaa yn khyang dukkuːh thaaeyng pang theilaa y lyt bua. 27 Khyang haa naa muːnnaw awla, "Ni cee ibyang maa? tilaa pahuat laa pahuat ym hngijei tawng. Uppyngtih cawkhyau nyak puitih atha tawk kei! Yn hyau khyang haa cee Muikhaw see haa naa khy yn khyau ym ngei" ym tii.

28 Yn Sityang haa cee Galilee naampung tomti jyng a jyang nga pau jok giah.

29 Sinakok kuːh lyt hlyi hnguva, James laa Jawhan dy Simon laa Andrew imm maa ym zet. 30 Simon pi cee kua theila ip duːn nyng hngyngei, y nih sityang Jesuh eyng a jyang nga ym saih jei. 31 Yn hnguva Jesuh cee yn hngutaw cenga zet theila y kut tyng y thooh. Yn hnguva ynih cee kaang bua theilaa khin y khinnyak bua.

32 A muːlyam Khumik kyak pynnyng, Jesuh cenga kaang tih kaw tomti laa tusee puhei khyang haa ym lupui nyak. 33 Luh dukkuːh khyang tomti kyttung ngyng ym dynnei, 34 Jesuh naa nehnyang a juːjuː y kaansyak. Ynih na khy puhei tih tusee haa panu y shyt. Ynbawlakhy tusee haa na Jesuh u maa tinyak khyang ym hnguat khiannyng Jesuh na yn haa khyau shyak jo.

35 Anguu Khuthuaih hluanna, Jesuh cee thoo theilaa, imm ma kuːh zet theila hiv nawva, y hngihminnei. 36 Yn hnguva Simon laa y kyi tih na ym shuijok, 37 Jesuh ym hnguh hnguva, "Khyang haa na nyang ym shuijok," ym tinyak.

38 Jesuh na, "Alawipai nyak acya naam haa khy zet pawe. Ynnija khy ky susaih lawh hngyam my. Yn nyy tawk keei ky lu," y tinyak.

39 ✝Yn khianyng Galilee pee lyaam ma zet theila, ym Sinakok haa dukka y susaih, pynnyngcee tusee haa khy y shyt.

40 Buhlitih khyang pahuat cee y cengnga khukdya, "Ny luːei nyak myi jyngcee keei cim nyak ny bei nyn"* tilaa y khawhei.

41 Jesuh na y maannei.* Y kut tyng ynih dovei theilaa y thyaam, "keei naa ky luːnyak, cimbua!" y tinyak. 42 Yn khyang buhlineh khuːk theilaa y cimbua hlyi. 43 Jesuh na sathiih bei theilaa y tuːh bua hlyi, 44 "Keei na kaang syak bua khyang uvyng khy saih khawh byih. Ynbawlakhy zet, Jahenpaw cengnga ny pumhngaw duan voaih tilaa ny cimbua nyak saksi khyang na hnguat nyak ky Mosee tala bawva henbawn caaibua byih," y tinyak.

45 Yn zet theilaa canaw kawva khyau phawk kei khianyng, yn sityang cee pau jok giah. Yn khiannyng Jesuh cee atha luh ha voang nyn tii jo, yn hnguva a hiiv nyak duːn pumthua a y myijei. Ynbawlakhy naampung tyngnyng kuːh khyang haa ynih cengnga ym luu shoi.