1 Pharisee laa avoang tala cawkhyauytih haa Jerusalem kuːh komluu awlaa Jesuh cengnga ym dynneiluu, 2 yn hnguva hngulawnglyk tih haa potpattei kawva, acimcyang kawtih kut tyng buh ym ei khyang ym hnguh.

3 Pharisee laa Judah khyang haa tomti cee shyaakai thumcian bawva, ym kut potpattei kawva buh eiuu joaw. 4 Tukjyh nyak duːn kuːh ym luu bua hnguva, kut potpattei kawva* ei joaw. Pynnyngcee ycya thumcian haa panuu khy ym lyklyam, ihaamaatijyngcee kho bawt thum, am bawt thum, team bawt thum laa ipnyak gyam haa a si.*

5 Yn khainnyng pharisee laa tala cawkhyautih haa naa Jesuh eyng, "Ibawthawnnyng ny hngulawnglyk haa naa lianzang tyak hnguːt thumcian lyk kawva acimcyang kaw tih kut tyng ym ei maa?," tilaa ym hngi.

6 Jesuh naa, "Isaiah hngawpawe naa ni bawva jok hnguːt, nyangmi piangngei khyang:

" ‘Ni khyang hanaa ym mong pyttyng keei ym kyh, ynbawlakhy,

ym lungbawng cee keei dy paanei.

7 Ym cawkhyau khyang cee;

khyang nyng kuːh asi

keei khuːhbia cee aluaih.’

8 "Nuatpaw hnguishin cee dyyi zawla khyangzaw thumcian jyang nym lyklyam," y tiinyak.

9 Pynnyng thaathyieh y hyau, "Nym pumhngaw thumcian nym lyklyam nynny tawka Nuatpaw hnguishin ym dyyi! 10 Mosee tuanphawng nyng, ‘Ny nuu laa ny paw kyhkhiat byih,’ pynnyng ‘Ukhy si seh nuu laa paw jyanponaw tih cee byt lawh ey,’ tilaa a myi. 11 Ynbawlakhy nyangmi naa khyang pahuat naa ym nuu sikawvyngcee paw thawnlaa khy siseh phuihlawi nyn nyakky khyang utzaw haa cee Korban asi, Korban tinyak cee Nuatpawaw kuːh a si, tilaa hyau. 12 Yn pynnyng ym nuu laa paw vyng ikhy caai lawh jo tijyng nym cawkhyau. 13 Ynkhainnyng nym thumcian khianyng Nuatpaw khyaukhaw nym dyieu luu lawh. Pynnyngcee yn bawva panuukung nym caai," tiijyng y hyau.

14 Pynnyng Jesuh naa khyangpuː paanei theila yn haa eyng hyau, "Tomti naa, keei hyau ngei cawla myn jawcu jovei. 15 Pumthua kuːh luutih naa khyang dukka voang theila khyang buːsyak nyn tih ikhy myi jo. Ynbawlakhy khyang dukkuːh lyt luu tih naa jyang buːsyak nyn," y tinyak. 16 *

17 Khyang puː y zehtyak pynnyng imm dukka voang, y hngulawnglyk haa naa Jesuh eyng khyaucypnyak khyang ym hngi. 18 Jesuh naa, "Nym awhei? Pumthua kuːh naa khyang duːkka voang theilaa ikhy buːsyak kawkhyang jawcu jocawvei? tilaa y hngii. 19 Ibawthonnyngmaa tijyngcee, pum myng kuːh lyt theilaa hngynnu dukka voang tih cee lungbawng dukka voang jo," y tiinyak. (Ynkhainnyng Jesuh naa eiawk tomti haa acimcaih tilaa y hyau.)

20 Yn pynnyng, "khyang dukkuːh lyt luu tih naa jyang khyang buːsyak. 21 Khyang lungbawng duk kuːh naa jyang, seetih khindang, mumaaeinyak, shyak tuk nyak, 22 khyang pihia byyeunyak, luːjyaunyak, saksinyak, myangsingnyak, hnguhngyamnyak, zawplapnyak, sahliphangnyak, camcahnyak, lyngsanyak, 23 myn haa tomti cee khyang dukkuːh lyt luu theila khyang buːsyak tih a si," y tiinyak.

24 Pynnyng Jesuh cee yn duːn nyng kuːh thoo theilaa Tyre luh kika lyammaa y zet. Imm pahuat dukka voang theilaa, ynnijaa y myih khyang uvyngkhy hnguat syak hluː jo; ynbawlakhy byy nyn jo. 25 Muikhaw see bynnei khyamlawh tih hngutawzaw pahuat cee yn sityang jyak laa jyak luu theila ynih khuzoo va khukdya luu hlyi. 26 Yn hngutaw cee Siria pee Fonisia myitih Greek khyang juː cya y si. Y zawhngu dukkuːh tusee shyt piatmawh tilaa Jesuh eyng y khawhei. 27 Jesuh naa, "Acuːk nyakka dikzawe haa naa ym luː hawh ei hngyam mawseh. Dikzawe eiawk lovei theilaa uii jyng cawh thum myi jo," Y tinyak.

28 "Mawhpaw vo asi, ynbawlakhy uii tiinyak cee dikzawe buhpyi dyang kuːh abuːtih ei thum amyi," y tiinyak bua.

29 Yn hnguva Jesuh naa yn nyng, "Yn khyaukhaw khiannyng, imma zet; ny zawhngu dukkuːh tusee lytbua pyn," y tinyak.

30 Hngutawe nue cee imma zetbua theilaa, y zawehngu dukkuːh tusee lytbua theilaa ipnyak gyam huannaa ngoaei khyang y hnguh.

31 Pynnyng Jesuh cee Tyre luh kuːh thoo theila Sidon pee lyammaa y zet, Dekapolis pee kikaa dukka voang theila, Galilee pee tuiili jaa y phawluu. 32 Yn duːn naa hngawpyang tih laa khyauawh tih khyang pahuat ycya khyang haa naa Jesuh cenga ym luu, yn khyang huannaa kut tyang piatty ym khawhei. 33 Khyangpuː dukkuːh, Jesuh naa yn khyang loo theila y hngawku vyng y kutjung y thuan. Ynpynnyng y shyatui loo theila yn khyang lei jyng y beh. 34 Ynpynnyng huankhu lyaam to theila, khyau puːpuː hyau, "Ephphatha!" yn cee, "lyang seh!" y ti hyau.

35 Yn khyang cee y hngaw lyang bua theila, y lei khy hyangbua, ynpynnyng poaijaa y khyau nyn hlyi. 36 Jesuh naa ni u vyngkhy saih kaw haiawva hnguishin. Ynbawlakhy yn sityang ym saith jawk giah. 37 Jawetih khyang haa naa ym muːnnyak, "Yn Mawhpawe caai hnguːt tomti ym muːnnyak, hngawpyangtih jyak syak nyn bua theila awhtih haa khy khyau nyn syak," ym tii.