1 Jerusalem lyaam ym phawe luu theiawlaa Bethphage naam laa Bethani naam Olive cung lyaam maa, Jesuh naa y hngulawnglyk pahngih y tuːh, 2 yn haeyng y hyau, "Nym mawe lyaam maa kuːh naam maa zettyt. Yn naam nym phawe hnguva, u naa khy dyang ngeinyak hyaam khaw khang saa syangzawe a khuunneitih nym hnguh eyy. Yn shut theila luu byih jyt. 3 Ibawthawnyng nym cai maa tilaa khyang pahuat naa y hngi jyng cee? Mawhpaw* naa y lyvei tijyng hyau byih jyt, yn bawva nym tiinyak kyng cee ym bei luu hlyi jy," tilaa y shin.

4 Ym zet hnguva pumthua lyaam kaava, ssaa syangzawe a khuun khang ym hnguh, yn saa joii ym shuh. 5 Yn duːn nyng tungtih ycya khyang hanaa, "Ibawthawn nyng saa joii nym suh maa?" tilaa ym hngi.

6 Jesuh naa y shin bawva ym hyau bua, pynng yn hanaa ym hluːh. 7 Ynhnguva Jesuh cenga saa songzawe ym lu, ssaa huannaa ym suisyak tyang awla, Jesuh khy ssaa huannaa y dyangngei. 8 Ynhnguva Khyang hanaa ym suisyak lyaam myng ym phawh, ycya hanaa cee thiing kang eek awlaa lyaam myng ym phawh. 9 Y hngu laa mawe lyktih khyang hanaa "Hosanna Mawhpaw ming ngyng komlutih khunkhyi myi seh!" tilaa ym paang. 10 "Mymi pawe David teengpee khunkhyi myi seh! Huankhuva hluːngduː tih Hosanna!" myiseh tilaa ym pang.

11 Jesuh cee Jerusalem luh duk voang theila biatimm dukka y zet. Y pingpyang tomti y to jok, khumuː hngyh khianyng, hngulawnglyktih kulaihngih dy Bethani naam lyaamma y zet.

12 Athaa hnguːp paa Bethani naam kuːh ym zetbua hnguva, Jesuh y zoijei. 13 Ynhnguva asei yptih theii thiing y paannawva kuːhthuh y hnguh, atheih suijei haijaa y zet. Yn duːn phaw hnguva atheih ikhy hngu jo, asei pytjyang y hnguh, ibawthawnnyngmaatijyngcee theei thiing tawk acuːn sikaw khiannyng asi. 14 Jesuh naa thiing y juan, "Tuh aa kuːhthuh nyang theih ihngukhy unaa khy eilawh tikaw seh!," y tinyak.

Yn bawva y juan khang hngulawnglyk hanaa khy ym jyak.

15 Jerusalem luh ym phawhlu hnguva, Jesuh biatimm dukka voang theila, biatimm dukka hlei tih laa jytih haa tomti y puːklawk giah. Hawkhu jytih haa laa tyangkaw thua tihaa ngoah nyak khung hakhy thuataai kiah. 16 Biatimm dukka lawklaa jyh khyang u naa khy puhcai kawh byih jyt tilaa y kat. 17 Yn pynnyng yn haa eyng, "Yn cee jok hnguːt jo vei: ‘Keei imm cee khyang juː taga hngihminnei nyak imm tijyng ym hyau vy.’ Ynbawlakhy nyangmi naa yn imm cee hutteitih khyangsee immaa jyang nym puh," y tinyak.

18 Jahenpaw lian laa tala cawkhyau tih hanaa ym jyak hnguva Jesuh tukky ym khiangvoai, ibawthonnyngmaa tijyngcee khyang puː naa y cawkhyau khyang ym muːnnyak khiannyng yn haa naa Jesuh ym kyh.

19 Khuumuː lyamm phaweluu hnguva, Jesuh laa ynih hngulawnglyk haa luh aa kuːh zet bua.

20 Khuthuai theila, lyamma ym zet bua hnguva, theii thiing aphung ngyng kuːhthuh azaalak khyang ym hnguh. 21 Pitar naa nuːttei theila Jesuh eyng y hyau, "to Rabbi vo!, Ny juan khyang theii thiing azaalak pyn!" y tinyak.

22 Jesuh naa, "Nuatpaw jumnyak dovei byih jyt, 23 ✝Ahngoan naa nyangmi jyng ky hyauvy, unaakhy jumkha khyang lung myi kawva y pumhngaw hnguːn bawtynga thawnny tijyng jum theila, ‘yn cung thyih panglaai jaa kawh veih,’ tilaa y hyau vyngcee ym hyau baw tynga athawnny. 24 Ynkhainyng nyangmi jyng ky hyau, ibyangkhysiseh hngihminnei tomti cee nym lawh pyn tijyng jum zawlaa yn cee nyangmi kuːh ey jyng asi. 25 ✝Nym hngihminnei jy hnguva, khyang cya eyng pet nym tyang khyang myi jyngcee, ynhaa hluːhpiat byih. Nym hluːh eyngcee huankhu va myi tih nyangmi Pawe naa nym pet haa y hluːh ey," y tinyak. 26 *

27 Yn hnguva Jerusalem luh ym lu bua tuːh, Jesuh cee biatimm dukka y zetjok hnguva, Jahenpaw lian haa, tala cawkhyautih haa laa lianzang haa cee ynih cenga ym luu. 28 "Yn haa naa ni byang uːtyang haa ny cai maa? Pynnyngcee ni cai jytawk u naa utawng bei maa?" tijyng ym hngi.

29 Jesuh naa yn haa eyng hyaubua, "Nyangmi jyng pahuat ky hngi jy. Keei jyng hyaucammyt, nym hyau vyngcee keei naa ni byang uːtyang ngyng ky caai tinyak khyang ky saih jy. 30 Jawhan bei khyang baptisma cee Nuatpawe cengkuːh ei, sikawvyngcee khyang cengkuːh ei? Myn hngi khyang keei jyng hyaucammyt!" y tinyak.

31 Ynhnguva yn hanaa pahuat laa pahuat cinjang theiawla ym hyau, " ‘Nuatpawe cengkuːh’ my tinyak kyngcee, nyangmi naa, ‘ibawthawnnyng ynih jum jo zaw maa?’ tilaa y hngi jy, ym ti. 32 ‘Khyang ngyng kuːh my tinyak kyngcee’ " (Khyang tomti naa Jawhan cee hngawpawe pahuat tijyng ym yt nyak khiannyng khyang haa ym kyh.) 33 Yn khiannyng yn haa na Jesuh eyng "Keeimi naa hnguat jo awnga," ym tinyak.

Jesuh naa, "Ni haa ibyang uːtyang nyng ky puhcai tinyak khyang saih nyn jonga," y tinyak.