1 Hnguːp hngih thum pynnyng, Jesuh Kapanau luh ha y zet buatuːh, khyang haa naa immaa y phawlu pyn tijyng ym jyak. 2 Khyang panukung dynnei lu khiannyng imm dukka kuːhthuh, kyttung cyp akhyn myi ti jo, ynhnguva yn haa eyng sityang y susaih. 3 Yn hnguva khyang pahli na kutkhu byttih jap pyng kyn theilaa Jesuh cenga ym lu. 4 Khyang puː ym myi khiannyng Jesuh ceng cyp phaw nyn jo aw. Yn haa naa Jesuh myih nyak immtiih piat awla, yn khyang nehmawh, hngyn nyak phawhiih dy ym hawn. 5 Jesuh naa yn haa jumnyak y hnguh hnguva, kutkhu byttih khyang ngyng, "Ky zawvo, nyang pet haa hluːh pyn," y tinyak.

6 Yn duːn nyng ycya tala cawkhyautih haa ngoa awlaa, ym lung dukka khindang, 7 "Ibawthawnyng ni bawva ni khyang na hyau maa? Yn cee Nuatpaw siat nyak khyang si! Nuatpaw pahuat thua u naa pet hluːh nyn maa?" tilaa ym lung dukka khindang.

8 Jesuh naa muikhaw lung ngyng yn haa lung dukka khindang khyang y hnguat hlyi, "Ibawthawnyng ni byang nym khindang maa?, y tinyak. 9 I byang cee hyau lawi maa, ‘Nyang pet haa hluːh pyn,’ sikhawvyngcee ‘Thoo, ny phawhiih kyt laa zet, tijyng kutkhu byttih khyang ngyng hyau vy lawi jei’? 10 Ynbawlakhy khyang Zawpawe na somdek huanna pet hluːh nyn, uppyng nyak, nyangmi jyng hnguat shyak ky ky lu," tijyng yn khyang ngyng y hyau. 11 "Nyang ngyng ky hyau, thoo, ny phawhiih kyt tilaa, imm ma zet," y tinyak.

12 Yn cee y thoo hlyi, khyang haa hngoaimaw kuːh phawhiih kyt theilaa y zet bua. Yn cee khyang tomti naa muːnnaw awla Nuatpaw ym khuːhbia, "Nibyang keeimi naa ikhy hngusai joaw nga!" tilaa ym hyau.

13 Jesuh Galilee tuili kyam ma mokhuat zet buatuːh. Khyang puː haa y cengnga lu awla, Jesuh na yn haa eyng y cawk ky y phun. 14 Jesuh lyam myng zet hnguva, akhawn dynnyak duːn jung nga ngoa tih Alphaeus zaw Levi y hnguh. Jesuh naa yn nyng, "Keei lawnglyk luuh," y tinyak. Yn pynnyng thoo theilaa Jesuh hngulawng y lykkei.

15 Jesuh cee Levi imm ma* amuːbuh ei hnguva, akhawn dyn haa laa petmawh haa khy ym pui. Hngulawnglyktih haa dy, ym eiou hah. Jesuh lawnglyktih haa duk kyng yn byang khyang haa panu ym pui. 16 Akhawn dyntih laa petmawh haa dy Jesuh eiou khyang Pharisee bawng tala cawkhyautih haa naa ym hnguh hnguva, "Ibawthawnnyng akhawn dyntih laa petkongtih haa dy eiou maa?" ti awla hngulawnglyktih haa eyng ym hngi.

17 Yn jyak hnguva, Jesuh na yn haa eyng hyau, "Kaangtih naa tubawi luːei jo, ynbawlakhy kuatih naa jyang luːei. Keei cee puːnpok tih haa jubaijei haija ky lu si jonga, ynbawlakhy petmawh haa jubaijei tawk jyang Ky lu," tilaa yn haa eyng y hyau.

18 Pharisee haa laa Jawhan hngulawnglyk haa na buh ym jah. Ycya khyang haa Jesuh cenga lu awla, "Myn cee ibaw ma Jawhen lawnglyk laa Pharisee lawnglyk haa naa buh jah, ynbawlakhy nyang hngulawnglyktih haa cee jahei joaw si?" tiawla ym hngi.

19 Yn hnguva Jesuh na, "Zawekompawe cee ibaw khiin haa dy jah nynny maa? Zawkompawe myiveih cee, yn haa buh jahei joaw. 20 Ynbawlakhy yn haa cengkuːh zawkompawe ka cuːn phawlu hnguva, yn haa ym jahei cee ey.

21 "U naa khy suisyak phyam cee atha eyng ciipu joaw. Sikawvyngcee, athatih aphyam naa eitheila, apyk lian kai jy. 22 Ynpynnyng cee u naa khy miksutuii atha cee tuiawk aphyam myng kyn joaw. Sikawvyngcee, miksutuii naa tuiiawk myanaw theilaa, miksutuii laa tuiawk pahngihdyyn cilieu vy. Yn khiannyng athatih tuiawk kyng miksutuii ym sanbua lawh," y tinyak.

23 Sabbath hnguːp pyng Jesuh laa hngulawnglyktih haa tundyaa tyng ym zet hnguva, yn haa naa tuncyang dong ym sih. 24 Ynhnguva Pharisee haa na Jesuh eyng, "To cyam, Jin hnguːp pyng caai tuan kaw khyang yn haa naa ibawthawnnyng ym caai maa?" tilaa ym hngi.

25 Jesuh naa "David laa ynih bawngpui haa buh ym coijei hnguva i ym caai tinyak khyang phuat saijo zawvei? 26 Jahenpaw lian Abiathar hnguːp pyng, Nuatpaw biatimm ma voang theilaa Jahen phee y ei, yn cee jahenpaw haa thua ei dat kaw khyang a si. Pynnyngcee yn naa khy ynih bawng haa eyng acya phee haa y bei," y tinyak.

27 Yn pynnyng, "Jin hnguːp cee Khyang tawk a si; Khyang cee Jin hnguːp tawk com khyang si jo. 28 Yn khiangnyng Khyang zawpaw cee Jin hnguːp Mawhpaw y si," y tinyak.