1 Jesuh cee Biatimm maakuːh y zet bua hnguva, y hngulawnglyk tih pahuat na, "Cawkhyautih vo, to cyam, ibyang lung lian laa ibyang imm syak tawk maa," y tinyak.

2 Ynhnguva Jesuh naa, "Ni imm lian syak khyang ny hnguh kaw vei? Simpak hnguva luung haa pahuat khunga pahuat tyangei lawh jo," y tinyak.

3 Jesuh cee Olive cung huannaa Biatimm hngoaimawva y ngoa hnguva, Pitar, James, Jawhan laa Andru tih naa ajupzawva luu theila, 4 "Yn hnguh laa haa ihnguva thawnny maa? Yn hnguh laa tomti kuːm luu cuːn lawi luu hnguva, ibyang muːnnawseetih haa apodyang luu vy maa? tinyak khyang siahpiat mawh byih," tilaa ym hngi.

5 Jesuh na, "Nyangmi u naa khy hnguhngyam naw khaw haija sathih tawvei byih jyt. 6 Khyang panuu keei ming ngyng luu awla, ‘Keei yn ky si,’ tilaa khyang panuu ym hnguhngyam nyak khy. 7 Yn khiannyng Suunbii khyang, suun jaa sityang nym jyak hnguva sawso kawh byih jyt. Yn byang haa athawn lawh ey, ynbawlaakhy abyihnyak cee luu hyam jo. 8 Khyang juː pahuat laa pahuat, teengpee pahuat laa pahuat ym suunnei jy. Sudek duːn tomti jaa lieu aluu vy, pynnyngcee eiawk khekhyam my. Yn hacee dikzaw hong luu hnguva nehei khyang acuːk nyak asi.

9 ✝"Nyangmi sathih nym tawvei lawh ey. Nyangmi muan theila jung nga ym yap py, Sinakok duːn naa ym sawhshiv vy. Keei khiannyng syamphalyang haa, khyanglian haa hngoaimaw va saksi jaa nym tung lawh ey. 10 Ynbawlakhy acuːk nyak kyng teengpee tomti jaa sityang poai susaih lawh ey. 11 Khyang haa naa nyangmi muan theilaa cijyang hnguva, ibaw hyau vy khyang sawso kawh yt. Acuːn phaweluu hnguva hyau vy khyang khyaukhaw nym lawh ey, yn cee nym pumhngaw naa hyau vy khyang sijo, Muikhaw Cim naa hyausyak khyang asi jy. 12 Beenau ku pahuat laa pahuat byt haijaa ym yappei tongngy, pawe na khy zawnau y yap py. Zawnau naa khy nuu laa paw suunneipui naw theiawla byyt haijaa ym yap py. 13 Khyang tomti naa keei ming khianyng nyangmi ym hnguhdyam my. Ynbawlakhy akhuː nyak cuːn cyp setcaw tawvei tih cee lilovei nyak lawh ly.

14 "Siimphak theitih, ‘Tahsee Lehhuu’ cee myi tuan kaw nyak duːn nyng myi khyang nym hnguh lawh hnguva phuat tih naa cee jawcuu byih jyt. Ynhnguva Judah pee jaa myitih haa tomti cee cung lyamma nym zeen lawh ly. 15 ✝Imm pumthua a myitih na imm dukka ikhy lovei haijaa voangei kaw seh. 16 Loova myi tih na khy ym suisyak lovei bua haija heei kaw seh. 17 Yn cuːnn khuhnguːp cee maimawh laa zawe khoituii u myitih nuu haa tawkka ahlyi ja akaei jy. 18 Yn cuːnn cee khuusik kyng khykkei kaw haija Nuatpawe cenga hngihminnei byih jyt. 19 Ibawthonnyngmaa tijyngcee Nuatpaw naa somdek y com hnguːp pyng kuːhthuh tuhhnguːp cyp thawnsai hyamjo, ihngukhy atha cyppei ti hai sijo. 20 Yn khainnyng Mawhpaw naa khuhnguːp y tawisyak kaw vyngcee, ukhy syak hyang hai si jo. Ynbawlakhy y luihngyahei khyang, khyang haa khianyng khuhnguːp y tawisyak kyy.

21 "Ynhnguva pahuat huat naa nyangmi jyng, ‘to, mynnija Messiah!’ sikawvyngcee, ‘to, yn duːn naa myi,’ ti lakhy jum kawh byih jyt. 22 Ahngoan tih kaw Khrit laa ahngoan tih kaw hngawpaw haa ym podyang luu vy. Ynpynnyng luihngyahei khyang haa jumkha haijaa muːnnawseetih haa ym suduan luu ly. 23 Yn khiannyng Sathih tawvei byih jyt; Ni hnguhlaa haa tomti nyangmi jyng ky saih hnguːt pyn," y tinyak.

24 Ynbawlakhy yn hnguːp, cyhei khyam lawh pyn nyng, "Khuhngi cee y hung ngy, khawetha khy aang hai sijo; 25 huankhu kuːh aasi haa ym kaw vy, huankhu phungan haa khy ahluːnnei jy. 26 Yn pynnyng Khyang Zawpawe cee uːtyang lian laa phunggan nyng khuusiat dyangei theilaa y kawm luu khyang nym hnguh lawh ey. 27 Ynhnguva ynih huankhu ceepaw haa tuhlu theila Nuatpawe luihngyahei khyang haa sudek kiv pahli jyng kuːh, huankhu pyihnyak, somdek pyihnyak kuːh cungdyynnei syak ky.

28 "Theii thiing ngyng kuːh cawksyangnyak nuːttei jyt. Akhongbak haa no theilaa asei kip luu hnguva khukhaa lawi luu hngyh tijyng nym hnguat. 29 Ynbawva, ni hnguhlaa haa thawn luu nym hnguh hnguva, acuːn alawi luu hngyh,* Khyang Zawpawe kyttung cengnga y phawe luu hngyh tijyng hnguat byih jyt. 30 Nyangmi jyng ahngoan naa ky hyau vy, ni hnguhlaa haa athawn hluanaa hyangtih khyang juː haa byt lawh jo. 31 Huankhu laa somdek cee cimpak ky, ynbawlakhy keei khyaukhaw ihngukhy cimpak lawh jo.

32 ✝"Ynbawlakhy acuːn sikawvyngcee khuhnguːp cee, Pawe thuaa huankhu kuːh huankhu ceepaw si seh, khyang Zawe si seh, u naa khy hnguat jo. 33 Yn acuːn ihnguva phawluu vy tinyak khyang nym hnguat kaw khianyng sathih eyng zong byih jyt. 34 ✝ Khyang pahuat apannawa zet theilaa, y zet hluanna y imm la y maa haeyng khut poaijaa cai haijaa yap theilaa, kyt zongtih eyng khy y shin hnguːt dy cyppei. 35 Yn khainnyng imm mawhpaw ihnguva luu bua vy tinyak khyang nym hnguat kaw khianyng poaijaa zong byih jyt. Amuːlyaam khy si nyn, sikawvyngcee ajuan duːduːm khy si nyn, eahlui khong cuːnn khy si nyn, sikawvyngcee khuthoaih lyaam khy si nyn. 36 Zacatnawva y luu bua vyngcee, nym ipei khyang y hnguh luu vy. 37 Yn khainnyng nyangmi tawk ky hyau tomti cee, khyang tomti tawk khy ky hyau, zong byih jyt," y tinyak.