1 Jesuh yn duːn nyng kuːh zetbua theila Judah pee lyam maa zet ynpynnyng Jordan tuili lyammaa y kuat. Khyang puː haakhy y cenga dyynnei luu buatuːh awla, acaisawi bawva, yn haeyng y cawksyang.

2 Ycya Pharisee haa tituatty tawkka y cenga ym luu, "Putawe cee y pihia dy ga khyang tala eyng cyppeijei?" tilaa ym hngi.

3 Jesuh naa, "Mosee naa ibawva hnguishin hnguːt maa?" tilaa y hngi.

4 Yn haa naa, "Mosee naa kaa nyak caw bei theila y pihiya dy kaa nyn," ym tinyak.

5 Jesuh naa yn haeyng hyau, "Nym lungbawng acangpak khianyng Mosee naa yn tala y jok hnguːt, y tinyak. 6 Ynbawlakhy acuːkka, ‘Nuatpawe naa hngutawe laa putawe,’ y com. 7 ‘Ynkhainnyng putawe cee y nue laa pawe dyieu theila y pihia dy huattyng myi,* 8 ynpynnyng yn pahngih cee pumju pahuat taa y hngih thon luu vy.’ Ynkhainnyng yn hyih cee pahngih siti jo, pumju pahuat taa y hngih thonluu. 9 Ynkhainnyng Nuatpaw khypbeh pyn khyang cee, unaa khy khaau lawh jo," y tinyak.

10 Imm dukka ym voang bua hnguva, hngulawnglyk hanaa Jesuh eyng yn ym hngi. 11 ✝Jesuh naa, "Ukhy siseh pihia dy kaa theila acya hngutawe eyng lawhei tihcee y pihia dy byeu nyak puh tih asi. 12 Ynpynnyngcee hngutawe khy y putawe dy kaa theila acya putawe dy lawhei jyngcee byeutih y asi," y tinyak.

13 Ynhnguva khyang hanaa dikzawe haa Jesuh naa y kut tyng hliam haijaa y cenga ym luu, ynbawlakhy hngulawnglyk hanaa ynhaa ym hngyappei. 14 Jesuh naa yn hnguh hnguva, y lungpoai jo. Yn haeyng y hyau, "Dikzawe haa keei cenga luu seh awh, ynhaa kat kawh yt, Nuatpaw teengpee cee ynhaa baw jyng asi. 15 ✝ Nyangmi jyng ahngoan naa ky hyauvy, ukhy siseh dikzawe bawva dyynnei tih kawcee Nuatpaw teengpee jaa voang lawh jo," y tinyak. 16 Dikzawe haa kut tyng pym, ynhaa huannaa kut tyang theila khunkhyi y bei.

17 Jesuh lyaam y zet hnguva, khyang pahuat zawn luu theila y hngoai mawva khuk y dyaluu. "Khyngtih Cawkhyautih aw, hnguːnom syak lawheyy tawkka i ky cai lawey maa?" tilaa y hngi.

18 Jesuh naa, "Ithawnyng keei jyng khyngtih ny tii maa? Nuatpaw pahuat thua ukhy khyngtih myi jo. 19 Hnguishin gamcaw vyng ny hnguat, ‘khyang syak tuu kawh yt, khyang pihia zawe byeunawe kawh yt, muuvei kawh yt, ahngoantih kaw saksi shuu kawh yt, khyang hnguhngyam nawkawh yt, ny nue laa pawe kyhkhiat byih jyt’ tinyak khyang ny hnguat kawvei," y tinyak.

20 Yn khyang naa, "Cawkhyautih vo, myn haa tomti cee ky dikzawe hngu kuːh thuh ky lyklyam kiah pyn," y tinyak.

21 Jesuh naa yn khyang Khiat nyak kyng tovei. "Juːhuat ny luːvei hngyam, Zet, ny utzaw tomti jy theila sanglai tih haeyng bei byih, Yn hngucee huankhu va utzaw ny lawh eyy. Ynpynnyng keei lawnglykluh," y tinyak. 22 Yn khyang hngoai poai jo. Yn khyaukhaw jyak hnguva lungseei theilaa zet bua, ibawthawnnyngmaatijyngcee utzaw panue tawvei tih y si.

23 Jesuh naa kikaa to theilaa y hngulawnglyktih haa eyng, "Bawitih cee Nuatpaw teengpee voang ngy dekkuːt akaaei" y tinyak.

24 Hngulawnglyk hanaa y khyaukhaw ym muːnnyak. Ynbawlakhy Jesuh naa, "Ky zawetih vo, Nuatpaw teengpee voang ngy cee akaaei! 25 Ukhysiseh bawi tih cee Nuatpaw teengpee voang ngy thyakkyng sangsi cee byiua kuu vyng voang ngy alawi," y tinyak.

26 Hngulawnglyk haa naa ym muːnnyak kakai khiannyng pahuat laa pahuat ym hngijeitong, "U jyang lilovei nyak lawh nynny maa?" ym tii.

27 Jesuh naa ynhaa tovei theila, "Nibyang cee khyang naa thawn nyn kaw lakhy Nuatpaw cee vyngcee ynbaw sijo; Nuatpaw cee juːkum kyt tuat nyn tih asi," y tinyak.

28 Ynpynnyng Pitar naa, "Nyang hngulawnglyk ky tawkka tyakkei tomti kym tyak hnguːt," y tinyak.

29 Jesuh naa, "Nyangmi jyng ahngoan naa ky hyauvy, keei laa sityang poai tawk, imm, loo, beenau, cinau, nue, pawe, sikawvyngcee zawenau haa pahuat huat dyyi lawh, 30 Yn khyang cee syak hyang hnguva mok phawhuat khunkhyi thyakyng phephaei khyam lawh bawva, imm, loo, beenau, cinau, zawenau hakhy khunkhyi lawh eyy, saamaw lyaammaa khy hnguːnom syak y lawh eyy. 31 ✝Ynbawlakhy hnguvei hnguːt tih hacee mawbua ey, jyang tih hacee hnguvei bua eyy," y tinyak.

32 Yn haa Jerusalem luh lyammaa ym kuai hnguva Jesuh cee ym mawva zet. Hngulawnglyktih hacee thaa ym lawhei. Y lawnglyk tih khyang hanaa ym kyh. Ynhnguva Jesuh naa hngulawnglyk kulaihngih pyt pannei theila, ynih eyng ibaw thawn ny tinyak khyang yn haeyng y saih. 33 "Ngeijyt, mymi cee Jerusalem luh lyaamaa my kuai, Khyang Zawpaw cee Jahenpaw lian laa tala cawkhyau tih haa kut tyng yap khyammei lawheyy. Yn haa naa byt pettyang theiawla khyang juːcya haa kut tyng ynih ym yappy, 34 Yn haa naa ynih ym hawdawh nyak, cyatuiisuh nyak, sawh khyang laa ynih tukky khyang ym cai jy. Ynbawlakhy hnguːp thum hnguːp pyng y thoo bua eyy," tijyng y hyau.

35 Ynhnguva Zebedee zawe James laa Jawhan cee Jesuh cenga y hngih luu, "Cawkhyautih vo, Nyang nyng kym hngihei khyang keeimi tawk ny caipiatty kym luːvei," ym tinyak.

36 Jesuh naa, "Nyangmi tawk keei naa ibyang caipiatty nym luːvei maa?" tilaa y hngi.

37 Yn hyih naa, "Ny Phunggan nyng myi hnguva khelem lyammaa pahuat khepp lyammaa pahuat ngoa syak piatmawh byih," ym tinyak.

38 ✝Jesuh naa yn hyih jyng, "Nyangmi naa i hngihei tinyak khyang hnguat jo cawvei. Keei awk ky khyang maa nym awk nyn nyvei, sikawvyngcee keei baptisma bawva baptisma nym khyam nynny jei?" y tinyak.

39 Ynhnguva yn hyih naa, "Kym nyn," y hngih tinyak.

Jesuh naa khy, "Keei awkky khyang maa eyng kuːh nym awk lawh ey, pynnygcee keei khyammei jy khyang baptisma khy nym khyam lawh ey, 40 ynbawlakhy keei khep lyam sikawvyngcee kheleem lyamaa ngoa ey keei naa bei nyn jonga. Yn duːn cee luihyahei pyn khyang tawk piangsaa tih jyang a si," y tinyak.

41 Yn khyang hngulawnglyk hngaa naa ym jyak hnguva, James laa Jawhan nyng ym lungtyn. 42 ✝Jesuh naa ynhaa huattyng pannei theilaa, "Nym hnguat tyng bawva, khyang juːcya bawi hanaa ynhaa kungnga lyngtih aa ym up, yn haa khyang alian hanaa khy ym dyangnga kuːh haeyng uːtawng ym tyakkei. 43 ✝Nyangmi nacee yn bawva cai lawh jo. Ukhysiseh nyangmi dukkyng alianzawe thawn hluː tih cee nyangmi maa thawn lawh eyy, 44 ynpynnyng ukhysiseh alian luː tih cee tomti maa ny thawn lawh eyy. 45 Ithawnyngmaatijyngcee Khyang Zawpawe cee lupannyak khyammei luu sijo, ynbawlakhy lupan naw haijyng asi, pynnyngcee khyang panu lilovei haija a y shyak bei jy y kom luu," y tinyak.

46 Ynpynnyng Jerikho luh aa ym luu. Jesuh khy y hngulawnglyktih halaa khyang puː haady luh aa kuːh ym zetbua hnguva mikhungtih khyang, Thimius zawepawe Partimia cee lyaamkaa ngoa theila y hngiiei. 47 Nazareth taa kuːh Jesuh phawlue khyang y jyak hnguva, "David zawepawe Jesuh, keei mannei piatmawh!" tilaa y pang.

48 Yn khyang ngyng Khyang panuu kung naa byakkhy tikawa myi tilaa ym hngyappei, ynbawlakhy, "David zawepawe vo, keei mannei piatmawh!" tilaa y pang sawshoi.

49 Jesuh tung theila, "ynih paannei jyt," y tinyak.

Yn hnguva mikhung tih khyang ym pann, "sawso kawh, thoo! nyang y pannei," ym tinyak.

50 Y suisyak dyyi theila, dawng hngyakkyng Jesuh cenga y luu.

51 Jesuh naa, "Nyang tawk i ky caaipiat ty ny luːnyak maa?" tilaa y hngi.

Mikhungtih khyang naa, "Cawkhyautih vo, mik hnguhey ky luː," y tiinyak.

52 Jesuh naa yn nyng, "Zet, nyang jummeinyak naa kaangsaanyak bei pyn," y tiinyak.

Ynhnguva y mik hungtih kuːk hlyi theilaa lyaam tommaa Jesuh lawnglykkei.