1 Jesuh Sinakok ka zet theilaa adukka voang buatuːh, yn duːn naa kutkhu byttih khyang pahuat myi. 2 Yn haa dukkyng kuːh ycya hanaa Jesuh muanny tawk pet ym sui; Jin hnguːp pyng yn neh y kaansyak kei; tijyng alawi jaa ym to. 3 Jesuh naa kutkhu byttih khyang nyng, "Khyang tomti hngoaimaw va tungluh," Y tinyak. 4 Ynpynnyng Jesuh naa yn haa eyng, "Jin hnguːp pyng, apoai caai, a see caai, shyak lilovei, tuk tuanei sikawvyngcee duːm tuanei?" tijyng y hngi.

Ynbawlakhy yn haa naa ikhy hyau joaw. 5 Yn hnguva Jesuh naa lungtynn hngoai jyng kika to theilaa, ym lung cang khyang hnguh khianyng, yn khyang nyng, "ny kut tau," y tinyak. Y kut duan hnguva kaangsaanyak y lawh bua. 6 Pharisee haa cee zet awlaa Jesuh ibaw tuk lawhey maa tilaa Herod bawng haa dy ym cijang.

7 Jesuh cee hngulawnglyktih haa dy tuili khyam lyaamaa ym zet hnguva, yn hnguva Galilee pee kuːh la Judah pee kuːh khyang panu haa na khy y hngulawng ym lykei. 8 Yn y cai hnguːt khyang tomti ym jyak hnguva, Judah, Jerusalem, Idumea, Jordan pingpawng laa Tyre laa Sidon kika laam maa kuːh khyang panu y cenga ym lu. 9 ✝Yn hnguva Jesuh naa y hngulawnglyktih haa eyng ynih tawkka lawng dik pahuat y tyakshyak. Yn khiannyng ynih hliam nyn joaw. 10 Khyang panue kaang nyak y bei, yn khiannyng nehnyaang tawvei tihhaa tomti kaangsaanyak lawhey tawkka ynih hliam my ym lue. 11 Ihngukhysiseh muikhaw see haa naa ynih ym hnguːh, Ynih cengnga pang theilaa khuːhbia, "Nyang cee Nuatpaw zawpaw ny si!" ym tinyak.

12 Ynbawlakhy keei u maa tinyak khyang hyau kaw haijaa tusee haa eyng Y cawkhyau.

13 Jesuh cung huannaa koai theilaa yn y luːvei khyang haa y cengnga pannei, pynnyngcee ynih cengnga ym lue. 14 Lawnglyk kulaihngih y hiyah, yn cee ceepaw haa tilaa ming y shui. "Keei naa nyangmi keei dy myijyy tawkka ky luihyahei," y tinyak. "Nyangmi susaih haija ky tuːh eyy, 15 ynpynnyng tusee haa shyt nyak uːtyang Keei naa ky bei jy," tila Y hyau.

16 Kulaihngih luihiyah: Simon cee (Jesuh naa Pitar tijyng ming a bei); 17 Zebedee zawepawe James laa y nau Jawhan (Jesuh naa yn hyih jyng lingso tihaa tala susaih tih tilaa ming bei, yncee "Gak zawepawe"); 18 Andrew, Philip, Barthomew, Matthai, Thomas, Alphaeus zawpawe James, Thaddaeus, juː khiat tih Simon, 19 pynnyngcee ynih eyng sethcaw myi tih kaw, Judah Iskariot y si.

20 Pynnyng Jesuh imm pahuat ta voang hnguva, Khyang puː haa dynnei lue buatuːh, yn khainnyng Jesuh laa hngulawnglyktih haa ym ei jy cuːn khy myi jo. 21 Yn sityang y immlawng haa naa ym jyak hnguva, yn lawvei bua haijaa ym zet, ynhnguva "yn cee lung hngoan jo," tiawla ym hyau.

22 ✝Ynhnguva Jerusalem luh ha kuːh tala cawkhyautih haa kom lu awla, "Yn cee Beelzebul voangnei theilaa! yn tusee uptih myang phungan nyng tusee y syt," tijyng ym hyau.

23 Ynkhianyng Jesuh naa y cenga yn haa pannei theilaa khyaucyp nyak hyau vy phun, "Khukhawng naa khukhawng pui ibawva syt nynny maa? 24 Tengpee pahuat apumhngaw naa khynkha vei jyngcee, yn teengpee cihngia nyn jo. 25 Immlawng khy lung cyppei kaw vyngcee, yn imm cee cihngia nyn jo. 26 Pynnyngcee khukhawng cee pumhngaw seelup theila khongkauvei jyngcee, y teengpee cihngia nynjo; cimpaknyak kajyng a thawnny."

27 Ynbaw hngucee, "U naa khy athaaliantih khyang khawnhyan maw kaw vyngcee, imm dukka voang theilaa lawklaa haa huttei nyn jo. Akhawn pynnyng jyang voang theilaa lawklaa haa lovei nyn ny.

28 "Ahngoan naa nyangmi jyng ky hyau vy, khyang haa naa apet laa see tih hyau lakhy* Nuatpawe ym siatnyak tomti hluːh nyn, 29 ✝ynbawlakhy somdek huannaa Muikhaw Cim thaiisiat nawtih cee ihngukhy apet hluːh nyn jo; yn haa cee cihngia tih apet khyam lawhtih ym si," y tinyak. 30 (Ibawthawnyngmatijyngcee yn haa naa Jesuh cee, "muikhaw see naa bynnei," ym tii khiannyng, myn khyaukhaw y hyau.)

31 Ynhnguva Jesuh nu laa nau haa ym phawlu. Imm pumthua tung awla, ynih pannei hai khyang pahuat ym tuːh. 32 Khyang puː haa cee Jesuh cenga ym ngoa, "Nyang nu, nyang nau laa cinautih hanaa pumthuaa nyang ym suilu," ym tinyak.

33 Jesuh naa, "Keei nu laa keei nau haa cee u maa?" tilaa y hngi. 34 Y ceng kika ngoatih haa to theilaa, "Keei nu, Keei nau haa cee, 35 Ukhy siseh Nuatpaw luːlyk tihjyang Keei cii, keei nau, keei nu ha thawn," y tinyak.