1 Tuh a cee Pahtyak hnguːp laa Heenpui tih kaw phee pyi hnguːp ahngih nyak aphawluu hluan naa, Jahenpaw lian laa tala cawkhyautih haa naa Jesuh ibawva muan theila tuk lawh ey tijyng alyaam sui awla jupzawva ym cijang. 2 "Ynbawlakhy pyi dukkyng my caai jyngcee khyng hai sijo, khyang haa ym alingso vy," ym tii.

3 ✝Jesuh cee Bethani aa y myi hnguva, buhlitih Simon imm maa buhpyi ka a y hngoa hnguva, hngutawnuu pahuat voang luu theila aphu liantih situii uu, apok tih luungum zawe pahuat tyng a luih jaa y lu. Luungum zawe syeuh theila Jesuh lu eyng tuii uu akhuːh nyak. 4 Yn duːn naa myitih avoang cee ym lungtyn, "Ithawnyng nibawva situii uu haa akok syak maa? 5 Hyansaw* yn hyansaw cee khutlup tihaa eyng kum phyih kawva ym bei khyang kuːtcaw phawthum myng jyh theila, yn tyangkaw haa sanglai ngawegah tih haa eyng ny bei jyngcee khyng jo vei," tilaa yn hngutawe eyng apet ym tyang.

6 Jesuh naa, "Yn hngutawe myijei seh," y tinyak. "Ithawnyng nym hlumhlik maa? Yn naa keei jyng khyng tih y cai pyn. 7 Sanglai tih haa cee nyangmi dy myi hah shoijy, nym luːvei hnguva nym phuihlawi nyn shoi. Ynbawlakhy keei cee nyangmi dy myi hah nyn shoi jonga. 8 Ni hngutaw naa y nyn hawh cai pyn. Keei jawk kuːh ey tawkka ky pum huannaa situii uu y hluk pyn. 9 Ynkhiannyng nyangmi jyng ahngoan ky hyau vy, sityang poai saihjok nyak somdek tomti jyng, ni hngutaw caai khyang khy hyau shoijy," y tinyak.

10 Ynpynnyng Jesuh hngulawnglyk kulaihngih dukkuːh Judah Iskariot cee Jesuh y yappy tawk jahenpaw lian haa cenga y zet. 11 Yn hanaa yn jyak hnguva ym lungjyy theiawla ynih eyng tyangkaw bei jy setzaw ym tyak. Yn khianyng Judah na Jesuh y yap lawh ey tawk acuːn poai sui.

12 Heenpui tih kaw phee pyi acuːn hnguːp pyng, hluzawe pahtyak henbawn ym caai hnguːpyng, hngulawnglyk haa naa Jesuh eyng, "Pahtyak pyi ei jy tawkka i duːnna zet theila kym piangsa jeijy ny luːnyak maa?," tijyng ym hngi.

13 Yn khianyng ynih hngulawnglyk pahngih tuːh theilaa, "Luh dukka zet hngih, tuiiniang paa theila luu tih khyang pahuat nym khawm mei jy. Ynih lykei byih jyt. 14 Yn hyih voang nyak imm mawh eyng, ‘Cawkhyau tih naa, ky hngulawnglyk haady muːbuh pahtyak kym ei nyakky khiin imm khyn cee hanijaa myi maa,’ tilaa hngi byih jyt. 15 Ynhnguva huannaa piangsaa cyn tih imm khyn lian pahuat nyangmi jyng y duan lu vy. Mymi tawk ynijaa piangsa byih jyt," y tiinyak.

16 Hngulawnglyktih haa cee zet bua theila luh dukka ym voang. Yn hnguva Jesuh na yn haeyng hyau baw tyngnga pahtyak pyi ym piangsa khyang ym hnguh.

17 Amuːlyaam phawluu hnguva hngulawnglyk kulaihngih dy Jesuh y phawluu. 18 Yn haa huattyng buhpyi ym cuvei hah hnguva, Jesuh na, "Nyangmi jyng ahngoan naa ky hyau vy, nyangmii dukkuːh keei dy ei hah tih pahuat naa keei y yap py," y tiinyak.

19 Ym lungsik kiah awla, "keei hyau tawkei?" tijyng pahuat pynnyng pahuat ym hngiei tong.

20 Jesuh na, "Nyangmi kulaihngi dukkuːh pahuat, keei dy buhpyi huat tyng buh ei hah tih, 21 Khyang Zawpawe cee jok hnguːt tih bawva y byt lawh ey. Ynbawlakhy Khyang Zawpawe yap tih khyang nyng khunsee amyi jy. Yn khyang cee y myi luu kaw miat tyngcee khyng tya," y tiinyak.

22 Muːbuh ym ei hnguva, Jesuh naa phe y loh, khunkhyi syhpuah theila, y eeh, pynnyng hngulawnglyktih haa eyng y bei. "Ei jyt, Myn cee keei pum asi," y tinyak.

23 Ynpynyng maa khy lo theila, khunkhyi syhpuah theila yn haeyng y bei yn haa tomti naa lovei theila ym awk. 24 Jesuh naa, "Ni cee tyamthi vyng kuːm tih ky thiisen asi. 25 Keei ahngoan naa ky hyau vy, Nuatpaw teengpee jaa thaa awk bua tuːh khyang hnguːp phaw hluan cyp miksu theih jyng thawn tih tuii uː tii jo nga," y tiinyak.

26 Ynpynnyng boijei theiawla, Olive cung huan naa ym koai.

27 Ynhnguva Jesuh naa yn haa eyng y hyau, " ‘Keei naa hluzawe mawh ky sawh khiannyng hluzaw haa naa ym kaa tyak ky’ tilaa jok hnguːt khiannyng nyangmi tomti nym lungsik khy. 28 ✝Ynbawlaky keei ky thoo bua pynnyng, nyangmii mawva Galilee jaa ky zet ly," y tiinyak.

29 Pitar naa hyau, "Yn haa tomti na nyang kaa tyak awlakhy, keei kaa taw jo nga," y tinyak.

30 Jesuh naa Pitar eyng y hyaubua, "Ahngoan ky hyau vy, tuhmu eahlui mawk hngih akhong hluan cyp, keei huat jonga tilaa mawk thum ny zah ey," y tinyak.

31 Ynbawlakhy Pitar naa y lung awiijei theilaa, "Nyang dy ky byt hah ey tijyng khy keei naa nyang zah jonga," tilaa y hyau.

Ynpynnyng acya haa tomti naa khy ynbawa ym hyau.

32 Gethsemane ming nawtih cung nga ym zet, Jesuh na y hngulawnglyk haa eyng, "Keei hngihminnei hnguva mynnyng ngoa zawla zong byih jyt," y tinyak. 33 Pitar, James, Jawhan tih haa y zehpui nyak. Ynhnguva Jesuh ceng hlyija ngyammyiang nyak la lungsiknyak phawluu. 34 Yn haa eyng y hyau, "Mynnyng myi theila keei zong byih jyt. Keei lung muikhaw cee byt tyhawh hnguva ngyammyiang," y tiinyak.

35 Ynpynnyng meihzawe apaan nawva y zet, dek huannaa y khukdyaa theilaa athawn nyn nyngcee, keei cengkuːh ni acuːn haa naa pahtyak khy y hngihminnei. 36 Yn hnguva, "Abba, ky Pawe vo, nyang tawk cee akumkuːt athawn nyn. Myn maa keei cengkuːh lovei piatmawh. Ynbawlakhy keei luː si kaw seh, nyang luː tyng jyang si seh," tijyng y hngihminnei.

37 Ynpynyng y hngulawnglyk haa cenga y hleibua hnguva y hngulawnglyk haa ym ippei khyang y hnguh, Pitar eyng y hyau, "Simon, ny ippei? Khing huat khy zong nyn jo zawei? 38 Hlumhlik nyak khawm kaw haijaa sathih eyng zong zawlaa hngihminnei byih jyt. Muikhaw naa cee luːvei laakhy, pumju vyngcee athaaniau," y tiinyak.

39 Athaa mawkhuat zet theilaa acuːk baw tynga y hngihminnei. 40 Y lu bua hnguva, ym ippei khyang y hnguh bua tuːh, ibawthonnyngmaa tijyngcee ym mik haa jyh khuːk. Ynkhainnyng Jesuh eyng ibaw hyau vy iky huat tii joaw.

41 Athaa athum nyak y lu bua tuːh hnguva, yn haa eyng y hyau, "Tuh cuːn cyp nym duːm zawlaa nym ippei soi hyaamei? A khyk! Acuːn phaweluu pyn. To vyt, khyang Zawpawe cee petzawe haa kut dukka ym eyp peei pyn. 42 Thoo vyt, zet phaw, Keei yap hai mynnijaa y phaweluu hngyh," y tiinyak.

43 Y khyau hlu hnguva, y hngulawnglyktih kulaihngih dukka kuːh Judah y phawluu. Yn dy jahenpaw lian, tala cawkhyau tih, lianzang haa tuhlu khyang, khyang puː haa cimkha laa tiangbyng haa bynnei theiawla ym luu. 44 Yn hnguva yaptih naa yn haa eyng y athaa pei, "Keei na uut khyang, khyang cee nyangmi luːvei khyang asi, yn muan theila poaija zeh byih jyt," y tiinyak.

45 Judah cee Jesuh cenga zet theilaa, "Rabbi," tinaw theilaa ynih y uut. 46 Khyang haa na Jesuh muan theila ym khuun. 47 Jesuh cenga tungtih pahuat naa cicom lovei theila, jahenpaw lian tuːhtannei khyang, khyang pahuat hngawku y khun kyk. 48 Jesuh na y hyau, "Hutphaaijei tih khyang haa muan hai bawva cimkha laa tiangbyng dy keei cenga nym luu vei? 49 ✝Hnguːp hnguːi nyangmi dy ky myi hah piang biatimm maa ky cawkhyau hnguva, keei muan jo zawe. Ynbawlakhy kutjokcaw kuːmzei lawh ly a si," y tiinyak.

50 Yn hnguva hngulawnglyktih haa tomti naa ynih kaataw giah awlaa ym zeen tyak.

51 Putawe zawe pahuat hiah pyt vuei theilaa, Jesuh lawnglyktih haa na ynih muan ym luː, 52 Ynbawlaakhy yn naa suisyak dyyitit theilaa suishyak kawva y zen.

53 Ynhnguva Jesuh cee Jahenpaw lian imm maa ym zeh. Jahenpaw lian haa, lianzang haa, tala cawkhyau tih haa ym dyynnei. 54 Pitar naa pannawva kuːhthuh jahenpaw lian khiam duk cyp Jesuh y lykkei. Ynpynnyng zongtih haa dy ngoa theilaa meei y awm. 55 Jahenpaw lian la kongci khyanglian haa tomti naa Jesuh ym tuknyak nyn ny tawk saksi ym sui, ynbawlaakhy ipet khy hngu joaw. 56 Khyang panuukung naa ahngoan tih kaw saksi haa ym sui, ynbawlakhy yn haa saksi dynnei joaw.

57 Avoang khyang haa tung awlaa asitih khaw saksi ym bei: 58 ✝ "Khyang kut tyng syak khyang myn biatimm simphak theinga, khyang kut tyng saw tih khaw biatimm hnguːp thum hnguːp pyng ky syak ky tilaa y hyau khyang kym jyakpyn," ym tiinyak. 59 Ynbawlakhy ym saksi haa dynnei joaw.

60 Ynpynnyng jahenpaw lian naa yn haa duːduːm myng tung theila Jesuh eyng y hngi, "Ikhy hyaubua jo tijei? Ibyang saksi haa myn khyang haa naa nyang nyng ym sui maa?" tilaa y hngii.

61 Ynbawlakhy Jesuh naa syakkei kawva byakkhy tikawva y myihjei tyak. Jahenpaw lian naa atha mokhuat y hngii, "Nyang cee khunkhyi bei tih Nuatpaw Zawpaw, Khrit, ny sijei?" tilaa y hngii.

62 Yn khiannyng Jesuh na, "Yn ky si," tilaa y hyau, "Khyang Zawpawe cee phungan lian tih kheplyaam ngoa theila, huankhu khusiat dyang ngei theila y kawm luu khyang ny hnguh lawh ly," y tiinyak.

63 Jahenpaw lian naa y suisyak tiak theilaa, "Ibyang saksi haa luːvei hyaam maa?" tila y hngi. 64 "Nuatpawe vyng siatnyak khyang khyaukhaw nym jyak pyn. Ibaw nym uːtnyak maa?" y tiinyak.

Yn haa tomti na y byt tuan tijyng y pet ym tyang.

65 Yn khiannyng khyang avoang na ynih eyng cyatuii ym suh nyak, ynih mik shiing awlaa ym tii, "Hngawei tilaa hyau," ym tiinyak. Ynpynnyng zongtih haa naa khy Jesuh zehei awlaa ym sawh.

66 Pitar cee imm maw lyammaa y myijei hnguva, jahenpaw lian tuːhtannei khyang hngutawzawe pahuat y lu. 67 Pitar meeii y ommei khyang y hnguh hnguva, yn cenga zet theila y to vei, "Nyang khy Nazareth ta kuːh Jesuh bawngpui ny si kawvei," y tiinyak.

68 Ynbawlakhy Pitar na y zah, "Keei hnguat jo nga sikawvyngcee ibyang kawng ny hyau maa jawzu jo nga," y tinyak. Ynpynnyng khiam tua y zet laa eahlui akhong.*

69 Atha mawk huat tuːhtannei khyang hngutawzaw naa ynih hnguh hnguva, ynnijaa tung tih haa eyng y hyauvei, "Myn khyang cee yn haa bawngpui y si," y tinyak. 70 Ynbawlakhy y zah buatuːh.

Iveihkhy div jo, y cenga tung tih haa naa Pitar eyng ym hyau, "Tengteng kung yn haa bawngpui pahuat ny si, Galilee kuːh khyang ny si," ym tiinyak.

71 Ynkhiannyng Pitar naa, "tengteng ky hyau, yn khyang nyangmi hyau khyang hnguat jonga," tila y juannei.

72 Ynhnguva saisikung Eahlui akhong, Ealui mawk hngih akhong hnguva Jesuh naa yn nyng, "Eahlui mawk hngih akhong hluan naa keei mawk thum ny zah ey," y tiinyak khyang khyaukhaw Pitar naa y khindyang hnguva y luukee kuiijei theilaa y khangsukkei.