1 Jesuh naa yn duːn zehtaw theilaa ynih myihnyakluh aa y zetbua, ynih hngulawnglyktih haa naa khy ym lykkei. 2 Jin hnguːp phawlue hnguva, sinakok ka y cawkhyau nyak phuun theila, jawetih tomti naa muːnnaw awla, "Ni khyang naa nibyang haani kuːh lawh maa? Ynih eyng nibyang thiamva unaa beimaa? Muːnnawsee tih phungan hacee ibaw y duan nyn maa? 3 Myn cee saathe imm ssaw tih kaw vei? Ynih cee Marih zaw James, Josep, Judah laa Simon tih bee kaw vei? Y nau haa khy mynija ym myi kaw vei?" yn haa naa khy ynih dyn joaw.

4 ✝Jesuh naa, "hngawpawe pahuat cee y luh hngawe thua, utsu laa y pumhngaw imm myihnawkawva jyng y luhngoai myi" Y tinyak.

5 Kuatih haa eyng kuttyang theilaa kaangsaanyak bei thua, muːnnawsee tih ikhy ynija caai hnguːt nyn jo. 6 Mawhpaw naa yn haa jum kaw khyang y muːnnyak.

Ynpynnyng Jesuh cee naam huattuː naam huat kikaa cawkhyau jo. 7 Yn pynnyng Mawhpaw naa hngulawnglyk tih kulaihngih pan theilaa pahngih, pahngih aa tuːh theilaa yn haa eyng muikhaw see haa nyn nyak uːtyang y bei. 8 ✝ Jesuh naa "Lyaam syau nym zet hnguva tiangkhua pahuat thua ikhy zeh kawh: cokkhii, phe, kyy jooi jyng tyangkaw zeh kawh byihjyt, tilaa y siin. 9 Khuphawtyap jyang tappei theila phaang khy lyaphuat tua vuei kawh byihjyt," y tiinyak. 10 Yn haa eyng y hyau, "imm pahuat nym voang hnguva yn imm pahuat teng nym zetbua cyp yn duːnnyng myibyih jyt. 11 ✝Nym luu naweva kuːh haa naa nyangmi dyn joaw, nyangmi khyaukhaw ym ngei kaw vyngcee yn duːn nyng saksi jaa thawn haijaa nyangmi khuphaw vyng kuːh humhui khokhuːt byihjyt. Yn cee ynhaa tawkka sathih beinyak a si!," y tiinyak.

12 Yn haa zet awla khyang haa jubaijeinyak tala ym susaih jok. 13 Yn haa naa tusee haa shyt awla nehmawh panuukung situii jun theilaa ym kaansyak.

14 ✝Syamphalyang Herod* naa, Jesuh ming lianluu khyang hnguatluu. Ycya khyang naa, "Baptisma Jawhan bytnyak kuːh thoo bua, ynkhiannyng muːnnawsee tih phungan haa duan nyn" tilaa ym hyau.

15 Ycya haa naa hyau, "Yn cee Elijah y si," ym tiinyak.

Acya hanaa khy, "Acuːk hngukuːh yn cee hngawpawe pahuat, dukkuːh hngawpaw pahuat jyng," ym tinyak.

16 Ynbawlakhy Herod naa jyak hnguva, "Keei naa luugee khuːn hnguːt khyang, Jawhan byt nyak kuːh thoobua," tilaa y hyau. 17 ✝ Herod pumhngawe naa, y bee Philip pihia y nyakbua. Ynkhiannyng, Herodias naa y khyang haa tuːh theilaa Jawhan muannei syak, ynpynnyng khuun theila, phehimm dukka y tyak. 18 Jawhan naa Herod eyng hyau, "Nyang naa ny nau pihia, ny pihia nyakcee tala jo" tila y hyau hnguːt khiannyng asi.

19 Ynkhainnyng Herodias naa Jawhan lungnaw theila tuu hluː laakhy tukky lawh hnguːt jo, 20 Ibawthonnyngmaa tijyngcee Herod naa Jawhan cee cim theila puːnpok tih tinyak khyang hnguat khiannyng, kyhkhiat theilaa, y zongupiat. Herod naa Jawhan khyau jyak hnguva, lungtynn pyangkuː laakhy lungjynyak kyng y ngeisoi.

21 Apyihnyakkyng Herod naa y myihhnguːp pyng, Galilee pee kuːh liantih haa laa y pee kuːh khyanglian haa eyng, muːbuh cawhpyi y caai. 22 Herodias zawehngu* cee phawluu theilaa y lyaamluu hnguva, Herod laa y khiin haa y lungjy syak. Herod Syamphalyang naa, "Ny lyvei ikhy si seh keei jyng hyau, nyang nyng yn ky beijy," tilaa saksi jyng y hyau. 23 Atha khy, "Ny hngihei tomti, ky teengpee kuːh voakhuat ky beijy," tila y hyau.

24 Yn hngucee hngutawzawe zet theilaa y nuu vyng hngijei, "I ky hngihei lawh eyymaa?"

Y nue naa "Baptisma Jawhan luugee," tiilaa y hyau.

25 Hngutawzawe cee syamphalyang cengnga saisi voang theilaa, "Baptisma Jawhan luugee myn biaa eyng ajyanga ny bei luu vy ky luː" y tinyak.

26 Syamphalyang y lung poaijei jo, ibawthonnyngmaa tijyngcee ynih khiin haa hngoaimaw va juannei khiannyng, yn hngutawzawe hngihei khyang cah nyn jo. 27 Ynkhiannyng Syamphalyang naa saisi kung Jawhan luugee lawvei haijaa zongtih khyang pahuat y tuːh. Yn khyang zet theilaa thawngimm dukka voangngei theilaa Jawhan luugee khuːnei, 28 ynih luugee biaa eyng luu theila hngutawzaw eyng bei. Hngutawzaw naa cee y nuu vyng beijei. 29 Yn sityang jyak hnguva, Jawhan hngulawnglyk haa luu theiawla y jawk cee zu vaa ym khuːhei.

30 Y ceepaw haa Jesuh cenga dynei luubua theila ym cawkhuːt khyang laa caihuːt khyang tomti ym saih bua. 31 Ynpynnyng, ibawthonnyngmaa tijyngcee Khyang panuu luu zet khiannyng yn haa cee eijy cuːn khy taw joaw. Yn haa eyng y hyau, "keei dy luu vyt hiiv nawva duːmmei hai mawpaw," y tiinyak. 32 Ynkhainnyng yn haa lawng ngyng dyangngei theila a hiiv naw duːn naa ym zet.

33 Ynbawlakhy khyang panuu naa yn haa zet khyang ym hnguh hnguva, Jesuh laa y hngulawnglyk haa tijyng ym hnguat khiannyng naampung tomti kuːh khyang haa luu theiawla mawva ym phawvei pyn. 34 ✝ Jesuh lawng huan naa kuːh kawm theila, khyang puː y hnguh hnguva, ni khyang hacee paanaw hai myi tih kaw hluzawe haa bawvaa thon khainnyng maannei nyak tawivei theilaa, yn haa vyng panuu kung y cawkhyau. 35 Khuumuː luu hnguva y hngulawnglyk hanaa y cenga zet theila, "ni duːn cee doaiduːk asi," "khuu khy amuː luu hngyh. 36 Yn khyang haa, naam thua zet awlaa ym eiawk khy hleijei haija hluːh," ym tinyak.

37 Mawhpawe naa, "yn khyang haa ei jy nyangmi naa beijyt," y tinyak.

Yn hanaa, "hyaansaw* phawhngih pyttyng khyang hawh eijy hleijei theilaa kym cawh nynny ny hyau vei?" ym tinyak.

38 Jesuh naa, "phee i hawh nym tawvei maa? zet cawla toveijyt" tila hyau.

Ym hnguh hnguva, yn hanaa, "phee pahngaw laa ngawethek hngih myi," ym tinyak.

39 Ynpynnyng Jesuh naa khyang tomti abawngnga khoai theila biaa huanaa ngoa syak kiah. 40 Hngucee phawhuat puː hngawekip puː abawngnga ym ngoa kiah. 41 Jesuh naa phe pahngaw laa ngawawthek hngih lo pynnyng, huankhu lyaam to, Nuatpawe tyaknawe theilaa phee eeh. Ynpynyng khyang puː haeyng phyaihjat haijaa hngulawnglyk haeyng y bei. Ngawethek hngih khy khyang puː tomti jyng y phyaih. 42 Khyang puː tomti naa ei awla ym hngawh kiah. 43 Ynpynnyng phe laa ngawethek hngih ym ei zawn khyang hngulawnglyk hanaa ym dynbua hnguva tong kulaihngih ym lawh. 44 Eitih khyang tomti hacee putawe pyt tong pahngaw ym si.

45 Yn pynnyng Jesuh naa hngulawnglyk haa cee lawng huanna koai shyak theilaa Bethsaida luh aa zetpiang haiawva ajyangnga y tuːh. Khyangpuː haa khy kaa shyak theilaa ym imm ma y tuːh bua. 46 Khyang puː dy kaa pynnyng, Jesuh cee hngihminnei haija cung huanaa y koai. 47 Khumuː luuhngyh hnguva, lawng cee li duːduːm myng amyi, Jesuh cee pythngaw kong huanaa y myihngut. 48 Hngulawnglyk hacee khi ym khawm khianyng lawng hlyeu nyakyng ym jaai tawng hngyh khyang Jesuh naa hnguh. Ynkhianyng Jesuh cee thoaih lyammaa yn haa cengnga tuii khunga y zet. Yn haa y zehtyak* khy thawn hnguva, 49 yn haa naa tuii kungnga lyamzet khyang ym hnguh hnguva, khawaw byang ti theilaa ym pang, 50 ibawthonnyngmaa tijyngcee kyhseetih a yn haa naa ym hnguh.

Jesuh naa yn haa eyng saisikung y hau, "lunghlym nyak tawvei jyt, keei ky si, kyh kawh yt!" y tinyak. 51 Yn pynnyng yn haa dy lawng dukka y voang theilaa khi ahuːpsyak. Hngulawnglyk haa naa ahlyija ym muːnnyak, 52 ym lungbawng cang khianyng; yn haa naa phee thawnluu khyang jawcu joaw.

53 Tuiiku ym kuat pynnyng Gennesaret pee phaw hnguva, ym lawng ym khuun. 54 Lawng huan kuːh ym kawmla, khyang hanaa Jesuh hnguh hnguva ym hnguat hlyi. 55 Yn khianyng naam ceng kika tomti jyng zetzon jok theiawlaa, Y myih nyak ym jyaknyak duːn tyngyng nehmawh haa phawhiih dypa ym suduanluu. 56 Jesuh zet nyak naam haa, luh haa, lai, tukjyh tomti jaa nehmawh haa ym thyaklu. Jesuh suisyak pei hliam lawhey tawkka ym khawhei. Yn hliam lawh tih tomti khy kaangsaanyak ym lawh bua.