Marcos 5

25 Ynnijaa kum kulaihngih thiisaa tih hngutawe pahuat myi. 26 Ynih cee sibawi panuukung ngyng suduan pyn. Y neh kuːk kawva lian jyang lian luu theilaa, y tyakkei thawngkaw tomti pyih laakhy kaangsaanyak lawh jo. 27 Yn hngutaw naa Jesuh sityang y jyak hnguva, khyangpuː dukkuːh y hngu lyammaa tungluu theila ynih suisyak y hliam, 28 ibawthonnyngmaa tijyngcee "y suishyak ky hliam lawh eyngcee, ky kaangsaanyak lawh ey," tijyng tawei khiannyng y suisyak y hliamei.

29 Y hliam laa y thiisaa tih duːm hlyi theilaa, nehnyang ngyng kuːh lyt khyang y pum ju naa pijei. 30 Jesuh naa, ynih phungan lyt khyang pijei hlyi. Khyangpuːm kika lyam tenvoih theilaa, "U naa keei suisyak hliam maa?" tilaa y hngi.

31 Hngulawnglyk haa naa, "Khyangpuː ni hawh ny hnguh kawvei; keei u naa hliam maa tilaa ijyy ny hngi lawhei," ym tiinyak.

32 Ynbawlaakhy Jesuh naa hliam tih hngu haija pingpyang tomti y to soi. 33 Ynpynynyg hngutawe naa, ibaw thawn tinyak khyang y hnguattei, khiannyng sawso lelet nuuva y khuzoova khukdya luu theilaa, athawntih tomti ahngoan naa y saih jeiluu. 34 Jesuh naa yn nyng, "Zawhngu vo, ny jummeinyak naa nyang kaangsaanyak bei pyn. Nyang nehnyang kuːk pyn hlymnyak kyng zet," y tiinyak.