Mateus 14

Ayesu bhaapekea chakulya bhandu elupu nhano

13 Ayesu pabhakajoha genago, bhakabhoka penapo kwa ntumbwi bhakajenda panga bhandu ili bhabhee jika jabhe. Nambo bhandu pabhakapata ngani hejo, bhakaakagula kwa makongono kubhoka mu hilambo hijingi. 14 Ayesu pabhakahika kuntundu ja litanda, bhakalibhona lilubhalo likolongwa lya bhandu bhakaakolela kiha na bhakaalamia akaatamwa bhabhe.

15 Pajikahika kimuho, bhabhachijigana bhabhe bhakaajendelela na kwaalobholela, "Pamba palulemba, na lyobha litekutipika, mwalekange bhandu bhajaulange mu hilambo yabhenji bhakaemelange chakulya bhalyangange."

16 Ayesu bhakaalobholelanga, "Ngabha mpaka bhajaulange, mwangota mwapekee chakulya."

17 Nambo bhenaangota bhakaalobholela, "Tukweti mikate nhano na homba bhabhele."

18 Ayesu akaalobholelanga, "Nnetelange pambani." 19 Bhakaalobholela bhandu bhatamange mu manyai. Ngapena Ayesu akajitola jela mikate nhano na bhenibhala homba bhabhele, bhakalola kunani kwa Annoongo, bhakaajopa Annoongo. Penapo bhakahimetula jenijela mikate bhakaapekea bhabhaajigana ili na bhenaangota bhabhapekee bhandu. 20 Bhandu bhoa bhakalyee na kujukuta. Kubhoka penapo bhabhachijigana nga bhakalokota mbakatika hihikagalila, bhakatweelela hikapo komi na jibhele.

21 Bhandu bhabhakalyee bhakibha akanalome elupu nhano, pangali kubhalangala haikege na bhaana.