Mateus 26

Ayesu aajopa Annoongo ku buchitani ja Getisemane

36 Ngapena Ayesu akajenda pamo na bhabhachijigana bhabhe mahali pakemitwa ku Getisemane, na jono akaalobholelanga, "Ntamange pambani na nenga nyaule penipala kwaajopa Annoongo." 37 Bhakaatola Apetulo pamo na bhenibhala bhana bhabhele bha Azebedayo, na bhena bhakajemeka kuhechuka na kuumalika. 38 Penapo akaalobholelanga, "Ndenda kuhechuka muno muntima gwangu hata kubhandikila na kiujomoka. Mtamange pambani ntamange miho pamo na nenga."

39 Bahi, akajaula nnoongi kachoko, akagwee manguku, akajopa, "Atati bhangu, handa ikombolike chikombe heche cha kulaga chimbete, nambo hikoto kubhee handa chimbala nenga, ila chimpala mwenga."

40 Ngapena Ayesu akabhuja kwa bhabhachijigana bhabhe na kwaakolela bhatekugoloka. Akaakonya Apetulo, "Bholi, mwangota mwangacheanga pamo na nenga hata kwa lichaa limo? 41 Ncheange na mwajope Annoongo nkotokujingilanga mmalengelo. Mboomo jitenda kupala nambo mmele gwangamachili."

42 Akajaula kabhele pabhele kwaajopa Annoongo, "Atati handa ikombolike chikombe heche cha kulagia chimbete ngoto kung’wela, bahi, upaliho gwinu gukweele." 43 Pabhakabhuja kabhele, akaakolelanga bhagolwikinge, kwa kubhee miho gabhenji gakibha na lugono.

44 Ayesu akaalekanga akajaula kabhele patatu na kujopa abhi kulobhola malobhe galagala. 45 Ngapena bhakabhuja kwa bhabhachijigana bhabhe na kwaalobholela, "Bholi, tangu mgolwikinge na kupomolela? Nnolange muuda guhikite gwa Amwana bha Amundu bhapalikwa kulekelwa mmabhoko ga bhandu bhabhabhii na mabohu. 46 Nnyimukange, tujaulange. Atenda kuhika jonijola jwapakung’aluka!"