1 Bifo we bifo olgeta, God i mekem skae mo graon wetem olgeta samting we i stap long tufala, 2 be long taem ya, wol ya i narafala olgeta.* skae mo graon wetem olgeta samting we i stap long tufala, 2 be long taem ya, wol i narafala olgeta. Hem i stap nating nomo, we i no gat wan samting nating i stap long hem. Tudak nomo i stap kavremap bigfala wota, mo Spirit blong God i stap go i kam antap long hem.* antap long hem. Mo narawan i olsem. Tudak nomo i stap kavremap bigfala wota, mo bigfala win i stap blu i go i kam antap long hem. 3 ✝Nao God i tok. Fastaem, hem i talem se, "I mas gat delaet." Nao delaet i kamtru olsem we hem i talem. 4 Mo taem hem i luk delaet ya, hem i luk we i gud tumas. Nao hem i mekem delaet mo tudak, tufala i seraot, 5 mo i putum nem blong delaet se Dei* long Diksonari., mo i putum nem blong tudak se Naet. Nao dei* ya i finis. Hemia i fas dei blong wol.

6,7 ✝Nao God i tok bakegen, i talem se, "I mas gat wan samting olsem bigfala ruf we i raon, blong mekem wota ya i seraot, blong haf blong hem bambae i stap antap long hem, mo haf blong hem bambae i stap aninit long hem." Nao samting ya i kamtru, olsem we hem i talem. Hem i mekem samting ya blong mekem wota i seraot, nao haf wota i stap antap long hem, mo haf wota i stap aninit long hem. 8 Mo i putum nem blong samting ya se Skae. Nao dei ya i finis. Hemia i seken dei blong wol.

9 Nao God i tok bakegen, i talem se, "Wota ya we i stap aninit long skae i mas kam wanples, blong draeples i kamaot." Nao samting ya i kamtru olsem we hem i talem. 10 Nao hem i putum nem blong draeples ya se Graon, mo i putum nem blong wota ya we i kam wanples se Solwota. Mo taem hem i luk ol wok ya blong hem, hem i luk we i gud tumas. 11 Nao God i tok bakegen, i talem se, "I mas gat ol naranarafala samting oli stap gru long graon ya. I mas gat olgeta we i save karem kakae insaed long graon, wetem olgeta we i save karem kakae antap.* " Nao olgeta samting ya oli kamtru olsem we hem i talem. 12 Graon i kam fulap long ol naranarafala samting we oli stap gru long hem, we sam oli stap karem kakae insaed long hem, mo sam oli stap karem kakae antap. Mo taem hem i luk ol wok ya blong hem, hem i luk we i gud tumas. 13 Nao dei ya i finis. Hemia i namba tri dei blong wol.

14 Nao God i tok bakegen, i talem se, "I mas gat ol laet i stap long skae blong makem dei mo naet. Ol samting ya bambae oli blong makem ol dei, mo ol yia, mo ol taem blong lafet.* 15 Bambae oli stap long skae, oli saenaot i go long graon ya, blong mekem i gat laet." Nao ol laet ya oli kamtru olsem we hem i talem. 16 Hem i mekem san we i save saen strong, blong i stap saen long dei, mo i mekem mun we i no save saen strong olsem, blong i stap saen long naet, mo i mekem ol sta tu. 17 Nao hem i putum olgeta oli stap long skae, nao oli saenaot i kam long graon ya, oli mekem i gat laet. 18 Nao san i stap wok long dei mo mun i stap wok long naet, mo tufala i mekem we delaet i narafala, mo tudak i narafala. Mo taem hem i luk ol wok ya blong hem, hem i luk we i gud tumas. 19 Nao dei ya i finis. Hemia i namba fo dei blong wol.

20 Nao God i tok bakegen, i talem se, "I mas gat ol naranarafala fis blong stap long solwota, mo i mas gat ol pijin tu blong flae olbaot antap." Nao ol samting ya i kamtru olsem we hem i talem. 21 Hem i mekem ol bigbigfala fis blong solwota, wetem ol naranarafala fis we oli stap long solwota mo long wota, mo i mekem ol naranarafala pijin tu. Mo taem hem i luk ol wok ya blong hem, hem i luk we i gud tumas. 22 Nao hem i blesem olgeta, mo i talem long olgeta se, "Ol fis. I gud yufala i gat plante pikinini blong yufala, blong solwota ya bambae i kam fulap gud long yufala. Mo ol pijin. I gud yufala tu i gat plante pikinini blong yufala, blong bambae yufala tu i kam plante." 23 Nao dei ya i finis. Hemia i namba faef dei blong wol.

24 Nao God i tok bakegen, i talem se, "I mas gat ol samting we i gat laef i stap long graon ya. I mas gat ol anamol blong vilej wetem ol anamol blong bus, i stat long olgeta we oli bigbigfala, i go kasem olgeta we oli smosmol." Nao ol samting ya oli kamtru olsem we hem i talem. 25 Hem i mekem ol naranarafala samting we i gat laef we oli stap long graon ya. Ol anamol blong vilej wetem ol anamol blong bus, i stat long olgeta we oli bigbigfala, i go kasem olgeta we oli smosmol, be hem i mekem olgeta evriwan. Mo taem hem i luk ol wok ya blong hem, hem i luk we i gud tumas.

26 ✝Nao God i tok bakegen, i talem se, "I gud yumi* mekem man, mo i gud yumi mekem we hem i tekem fasin blong yumi, i olsem yumi. Hem bambae i bos long ol fis, mo long ol pijin, mo long ol anamol blong vilej mo long ol anamol blong bus, i stat long olgeta we oli bigbigfala, i go kasem olgeta we oli smosmol. Olgeta evriwan bambae oli stap aninit long han blong hem." 27 ✝✝Nao hem i mekem man, mo man ya i tekem fasin blong hem, i olsem hem stret. Fastaem, hem i mekem tu man nomo, wan we i man mo wan we i woman. 28 Nao hem i blesem tufala, mo i talem long tufala se, "I gud yutufala i gat plante pikinini blong yutufala, blong olgeta we bambae oli kamaot biaen long yutufala, bambae oli save go stap long olgeta ples long wol. Nao bambae yufala i save mekem evri samting long wol ya oli stap aninit long han blong yufala. Mi mi putum yufala blong yufala i bos long ol fis, wetem ol pijin, mo ol narafala samting we i gat laef we oli stap long wol ya, i stat long olgeta we oli bigbigfala, i go kasem olgeta we oli smosmol."

29 Nao God i talem se, "Olgeta samting ya we oli stap karem kakae long graon, wetem olgeta we oli stap karem kakae antap, mi mi putum olgeta evriwan se oli blong yufala, blong oli stap givim kakae long yufala. 30 Be ol gras mo ol narafala tri, mi putum olgeta se oli blong ol pijin wetem ol anamol, blong olgeta evriwan, i stat long olgeta we oli bigbigfala, i go kasem olgeta we oli smosmol, be oli gat kakae blong olgeta." Nao ol samting ya oli kamtru olsem we hem i talem.