1 Nao Esao we narafala nem blong hem Edom, 2 ✝hem i mared long tu woman Kenan,* we nem blong tufala, Ada, mo Oholibama. Ada, papa blong hem Elon, we i laen* blong Het, mo Oholibama, papa blong hem Anaha, mo i smol bubu blong Jibeon, we i laen blong Hivi.* 3 ✝Mo hem i mared* long wan narafala woman bakegen, nem blong hem Basemat, we papa blong hem Ismael, mo i stret sista blong Nebaeot. 4,5 Mo ol pikinini blong Esao ya, nem blong olgeta i olsem. I gat Elifas, we mama blong hem Ada. Mo i gat Jehus, mo Jalam, mo Kora, we mama blong trifala Oholibama. Mo i gat Rehuel, we mama blong hem Basemat. Ol pikinini ya, Esao i bonem olgeta long kantri ya Kenan.*

6 Nao hem i tekem trifala woman ya blong hem, wetem ol pikinini blong hem, mo olgeta man we oli stap wetem hem, mo olgeta anamol blong hem, mo olgeta samting blong hem we i kasem long kantri ya Kenan, nao i aot long brata blong hem Jekob,* i go stap long narafala kantri. 7 Hem i aot olsem, from we graon ya we tufala i stap long hem i no moa naf blong givim kakae long olgeta anamol blong tufala, from we ol anamol ya oli stap kam plante tumas. 8 Nao hem i aot, i go stap long ples blong hil, long kantri ya Edom, we olfala nem blong hem Seiri.

9 Nao long fasin ya, hem i kam stamba blong ol man Edom ya, we hemia olgeta we oli stap long ples blong hil long kantri ya. Ol laen we oli kamaot biaen long hem oli olsem.

10-13 Pikinini ya blong hem Elifas we Ada i bonem, hem i bonem faef pikinini boe blong hem, we nem blong olgeta, Teman, mo Omara, mo Jefo, mo Gatam, mo Kenas. Mo hem i gat wan narafala woman blong hem, we i woman slef, we nem blong hem Timna, mo woman ya i bonem wan pikinini boe blong hem, we nem blong hem Amalek.

Pikinini ya blong hem Rehuel, we Basemat i bonem, hem i bonem fo pikinini boe blong hem, we nem blong olgeta, Nahat, mo Sera, mo Sama, mo Misaha.

14 Mo trifala pikinini ya blong hem, Jehus, mo Jalam, mo Kora, we Oholibama i bonem trifala, trifala i gat ol pikinini blong trifala.

15,16 Nao ol laen blong Esao oli stap makem ol olfala blong olgeta olsem. Ol laen blong Teman, mo ol laen blong Omara, mo ol laen blong Jefo, mo ol laen blong Kenas, mo ol laen blong Kora, mo ol laen blong Gatam, mo ol laen blong Amalek, olgeta oli stap makem Elifas ya se i stamba blong olgeta. Olgeta ya oli kamaot biaen long woman ya blong Esao, we nem blong hem Ada.

17 Mo ol laen blong Nahat, mo ol laen blong Sera, mo ol laen blong Sama, mo ol laen blong Misaha oli stap makem Rehuel se i stamba blong olgeta. Olgeta ya oli kamaot biaen long woman ya blong Esao, we nem blong hem Basemat.

18 Mo ol laen blong Jehus, mo ol laen blong Jalam, mo ol laen blong Kora oli stap makem Esao se i stamba blong olgeta. Olgeta ya oli kamaot biaen long woman ya blong Esao, we nem blong hem Oholibama, we papa blong hem Anaha.

19 Olgeta ya evriwan oli laen blong Esao.

20,21 Fastaem i gat ol narafala man oli stap long kantri ya Edom. Olgeta ya oli kamaot biaen long wan man, nem blong hem Seiri, we i laen* blong Hori. Seiri ya, hem i gat seven pikinini we oli kamaot biaen long hem we oli stamba blong ol naranarafala laen. Nem blong olgeta ya i olsem. I gat, Lotan, mo Sobal, mo Jibeon, mo Anaha, mo Dison, mo Eja, mo Disan.

22 Lotan ya, hem i stamba blong ol laen blong Hori, mo ol laen blong Heman. Mo hem i gat wan sista blong hem tu, we nem blong hem Timna.

23 Sobal ya, hem i stamba blong ol laen blong Alvan, mo ol laen blong Manahat, mo ol laen blong Ebal, mo ol laen blong Sefo, mo ol laen blong Onam.

24 Jibeon ya, hem i bonem tu pikinini boe blong hem, we nem blong tufala, Aea, mo Anaha. Hemia sem Anaha ya we i faenem springwota ya we i hot, we i stap long draeples. Hem i luk springwota ya long taem we hem i stap long draeples, i stap lukaot long ol dongki blong papa blong hem. 25,26 Anaha i papa blong Dison, mo Dison i stamba blong ol laen blong Hemdan, mo ol laen blong Esban, mo ol laen blong Jitran, mo ol laen blong Keran. Anaha ya i bonem wan dota blong hem tu, we nem blong hem Oholibama.

27 Eja ya, hem i stamba blong ol laen blong Bilhan, mo ol laen blong Sahavan, mo ol laen blong Akan.

28 Disan ya, hem i stamba blong ol laen blong Uj, mo ol laen blong Aran.

29,30 Nao long fasin ya, i gat ol laen blong Lotan, mo ol laen blong Sobal, mo ol laen blong Jibeon, mo ol laen blong Anaha, mo ol laen blong Dison, mo ol laen blong Eja, mo ol laen blong Disan. Hemia ol laen blong Hori, we oli stap long kantri ya Edom fastaem.

31 Bifo, taem we ol laen* blong Isrel* oli no gat king blong olgeta yet, ol man Edom oli gat ol king blong olgeta. Nem blong olgeta i olsem.

32 Fastaem, i gat King Bela, we papa blong hem Beo, mo hedkwota blong hem, taon ya Dinaba.

33 Biaen long hem, i gat King Jobab, we papa blong hem Sera, mo hem i man Bojeraha.

34 Biaen long hem, i gat King Husam we i man Teman.

35 Biaen long hem, i gat King Hadad, we papa blong hem Bedad, mo hedkwota blong hem, taon ya Avit. King Hadad ya, hem i go mekem faet long ol man Midian long kantri ya Moab, mo i winim olgeta.

36 Biaen long hem, i gat King Samlaha we i man Masreka.

37 Biaen long hem, i gat King Saol, we i man Rehobot, taon ya we oli wokem klosap long reva.

38 Biaen long hem, i gat King Balanan, we papa blong hem Akboro.

39 Biaen long hem, i gat King Hadad we hedkwota blong hem taon ya Pao. Woman blong hem, nem blong hem Mehetabel, we mama blong hem Matred, mo bubu blong hem Mesahab.

40-43 Nao long ol man Edom, i gat ol laen blong Timna, mo ol laen blong Alvaha, mo ol laen blong Jetet, mo ol laen blong Oholibama, mo ol laen blong Elaha, mo ol laen blong Pinon, mo ol laen blong Kenas, mo ol laen blong Teman, mo ol laen blong Mibsara, mo ol laen blong Magdiel, mo ol laen blong Iram. Olgeta ya evriwan oli laen blong Esao. Mo oltaem, ol ples we olgeta oli stap long hem oli stap karem nem blong olfala we i stamba blong olgeta.