1-3 Nao Aesak i singaot Jekob i kam luk hem, mo i talem long hem se, "Bambae yu yu no mas mared long wan gel Kenan.* Yu mas gobak long kantri ya Mesopotemia, long ples blong bubu blong yu Betuel. Man ya Laban we i brata blong mama blong yu, hem i stap long ples ya. I gud yu mared* long wan dota blong hem." Mo hem i blesem hem, i talem se, "God i gat olgeta paoa, mo prea blong mi, we hem bambae i blesem yu, i mekem we yu yu gat plante pikinini blong yu, mo olgeta we bambae oli kamaot biaen long yu, ol laen blong olgeta bambae oli kam plante we plante. 4 ✝Prea blong mi, we God bambae i blesem yu, wetem olgeta we bambae oli kamaot biaen long yu, olsem we i bin blesem bubu blong yu Ebraham. Olgeta graon ya we yumi stap long hem tede, God i promes long bubu ya blong yu bifo finis, se bambae i givim long olgeta we oli kamaot biaen long hem, mo prea blong mi we graon ya bambae i kam graon blong yu." 5 Nao hem i sanem hem i go.

Nao Jekob i aot blong go long kantri ya Mesopotemia, blong go stap wetem Laban, we i stret brata blong mama blong hem wetem Esao. Man ya, papa blong hem Betuel, wan man Mesopotemia we i blong distrik ya Aram.

6 Nao Esao i harem nius we papa blong tufala i blesem Jekob* olsem, mo i sanem hem i go long Mesopotemia blong i lukaot wan gel blong i mared long hem. Mo hem i harem tu we taem papa blong tufala i blesem hem, hem i blokem hem, se bambae i no mared long wan gel Kenan.* 7 Mo hem i harem tu we brata blong hem i mekem olsem we papa mo mama blong tufala i talem. 8 Nao from ol samting ya, hem i luksave we papa blong tufala i no glad long ol woman Kenan, i no wantem pikinini blong hem i mared long olgeta. 9 Nao hem i go luk Ismael ya we papa blong hem Ebraham, i tekem wan dota blong hem, i mared* long hem, blong i kam namba tri woman blong hem. Gel ya, nem blong hem Mahalat, mo i stret sista blong Nebaeot, we i fasbon blong Ismael.

10 Nao Jekob* i aot long Bereseba, i stap wokbaot blong go long Haran, 11 mo wan taem, long taem we san i godaon, hem i kamtru long wan ples, mo i stap long ples ya blong i slip. Hem i ledaon, i pilo long wan ston nomo, nao i slip. 12 ✝Nao hem i luk wan drim, mo long drim ya, i luk wan lada i stanap, we stamba blong hem i stap long graon, be en blong hem antap i kasem heven, mo i luk ol enjel oli stap long hem, we oli stap kamdaon, oli stap go antap. 13 ✝Nao hem i luk we Hae God i kamtru, i kam stanap klosap nomo long hem, mo i talem long hem se, "Mi mi Hae God, mi God blong bubu blong yu Ebraham, mo blong papa blong yu Aesak.* mo i talem long hem se, "Mi mi Hae God, mi God blong bubu blong yu Ebraham, mo blong papa blong yu Aesak." Graon ya we yu yu stap slip long hem, bambae mi mi givim long yu, mo long olgeta we bambae oli kamaot biaen long yu. 14 ✝Olgeta ya bambae oli kam plante we plante, we man i no save kaontem olgeta. Mo ol graon blong olgeta, bambae oli joenem i kam bigfala moa long evri saed. Nao bambae mi mi yusum yu wetem olgeta ya we bambae oli kamaot biaen long yu blong blesem ol man blong olgeta narafala kantri long wol.* 15 Mo i gud yu save. Long evri ples we bambae yu pas long hem, mi bambae mi stap wetem yu blong lukaot long yu, mo bambae mi tekem yu yu kambak long ples ya bakegen. Bambae mi no save lego yu, gogo mi mekem olgeta samting ya we mi promes long yu blong mekem."

16 Nao hem i wekap, mo i talem se, "Tru, ples ya, Hae God i stap long hem, be mi mi no save." 17 Nao hem i fraet, mo i talem se, "!Ples ya i tabu tumas! Ating ples ya, haos blong God ya. Hemia doa blong heven ya."

18 Nao long eli moning, hem i girap, i tekem ston ya we i pilo long hem, i stanemap blong mekem wan memori blong samting ya long ples ya. Nao hem i tekem smol olifoel,* i kafsaedem i go long hem blong makem se i tabu, i blong God. 19 Mo hem i putum nem blong ples ya se Betel*, be fastaem, taon we i stap long ples ya, nem blong hem Lus. 20 Nao hem i mekem wan promes* long Hae God se, "Sipos yu yu stap wetem mi, mo yu stap lukaot gud long mi long rod blong mi, yu stap givim kakae mo klos long mi, 21 mo sipos yu tekem mi mi kambak gud long ples blong papa blong mi bakegen, bambae yu yu God blong mi. 22 Ston ya we mi mi stanemap blong mekem memori blong samting ya, hem i blong makem ples ya se yu yu stap long hem. Mo sipos mi kambak gud olsem, bambae mi mi seraot olting ya we bambae yu yu givim long mi, long ten hif, nao bambae mi givim wan hif i gobak long yu bakegen."