1 Nao Jekob* i luk we brata blong hem Esao wetem ol fo handred man ya blong hem oli stap kam, nao hem i seraot ol pikinini blong hem oli go stap wetem ol mama blong olgeta. 2 Hem i mekem olgeta evriwan oli laenap, we faswan, i gat tufala woman slef ya wetem ol pikinini blong tufala, nao biaen i gat Lea wetem ol pikinini blong hem, mo biaen bakegen, i gat Rejel wetem pikinini blong hem Josef. 3 Nao hem i wokbaot fastaem long olgeta, i go blong mitim brata blong hem, mo taem hem i kam klosap long hem lelebet, hem i bodaon long hem seven taem, we fes blong hem i kasem graon. 4 Be Esao i resis, i kam blong mitim hem, i sakem han blong hem i goraon long hem, i holem hem, i kis long hem. Nao tufala i stap krae. 5 Nao taem Esao i luk ol woman ya wetem ol pikinini we oli stap, hem i askem se, "?Be ol woman ya we oli stap wetem yu, mo ol pikinini ya oli blong hu?"

Nao Jekob i talem se, "Masta, God i mekem i gud tumas long mi. Hemia ol pikinini blong mi ya, we hem i givim long mi." 6 Nao tufala woman slef ya wetem ol pikinini blong tufala oli kam klosap, oli bodaon long Esao. 7 Mo Lea wetem ol pikinini blong hem oli kam bodaon long hem, mo biaen, Rejel mo Josef, tufala i kam bodaon long hem.

8 Nao Esao i askem se, "?Be ol faef hip blong ol anamol ya we mi mitim long rod, oli blong wanem?"

Mo Jekob i talem se, "Masta, oli blong yu, blong mekem yu yu glad long mi."

9 Nao Esao i talem se, "No brata, mi mi gat plante samting finis. Yu holem ol samting ya."

10 Be Jekob i talem se, "No, plis yu holem olgeta. Sipos yu glad long mi, mi wantem yu yu tekem presen ya blong mi. Taem mi luk fes blong yu naoia we yu yu glad olsem blong luk mi, i olsem we mi luk fes blong God. 11 Plis yu holem presen ya we mi tekem i kam, se i blong yu. God i stap mekem i gud tumas long mi, mo mi mi no sot long wan samting." Nao hem i stap strong long brata blong hem gogo hem i tekem presen ya.

12 Nao Esao i talem se, "I gud yumi aot long ples ya, yumi go. Bambae mi mi lidim yu."

13 Be Jekob i talem se, "Masta i gud, be yu save, ol pikinini ya oli no strong. Mo mi mas tingbaot ol anamol ya tu we oli gat pikinini. Sipos mi mekem olgeta oli wokbaot strong long wan dei nomo, bambae olgeta evriwan oli ded ya. 14 I moa gud yu yu go fastaem. Bambae mifala i stap wokbaot sloslo i kam biaen, wetem ol pikinini ya mo ol anamol ya from we oli no save wokbaot strong. Bambae mifala i wokbaot sloslo olsem gogo mifala i kasem yu long kantri ya Edom."

15 Nao Esao i talem se, "Ale, be bambae mi livim sam man blong mi oli stap wetem yu."

Be hem i talem se, "No masta, yu no trabol. I gud nomo. Sipos yu yu glad long mi, hemia i naf long mi." 16 Nao long sem dei nomo, Esao i aot long ples ya, i gobak long Edom. 17 Be Jekob i go long ples ya Sukot, nao long ples ya, hem i wokem wan haos blong hem, mo i putumap ol wansaed haos blong ol anamol blong hem. Taswe ol man oli putum nem blong ples ya se Sukot, we i min se "Ol wansaed haos".

18 Long fasin ya, Jekob i aot long Mesopotemia, i kamtru gud long kantri ya Kenan* bakegen. Nao hem i kam stap long taon ya Sekem, mo i mekem ples blong hem long wan open ples klosap long taon ya. 19 ✝Fastaem, graon ya i blong ol pikinini blong Hamoro ya we i papa blong man ya Sekem, be hem i pemaot graon ya long olgeta long wan handred kesita silva.* 20 Nao long ples ya hem i wokem wan olta, mo i putum nem blong hem se El Elohe Isrel,* we i min se "God i God blong Isrel."