1 Nao wan dei, dota blong Jekob* mo Lea, we nem blong hem Daena, hem i go long taon ya Sekem blong go luk ol woman Kenan* long ples ya. 2 Nao Hamoro, we i laen* blong Hivi,* hem i jif blong ples ya, mo hem i gat wan pikinini boe blong hem we nem blong hem Sekem. Mo taem boe ya i luk gel ya, hem i go tekem hem, i fosem hem blong i slip wetem hem. 3 Be biaen, hem i luk we gel ya i wan gudfala gel, mo i laekem hem tumas, nao i stap toktok gud long hem blong mekem hem i laekem hem. 4 Mo hem i talem long papa blong hem se, "Papa, mi mi wantem mared long gel ya. Plis yu go traem askem hem long papa blong hem."

5 Nao Jekob i harem nius we man ya i spolem dota blong hem, be from we ol pikinini blong hem oli no stap long haos, oli stap lukaot long ol anamol blong hem longwe, hem i no mekem wan samting, i stap wet blong olgeta oli kamhom fastaem. 6,7 Nao stret long taem we olgeta oli kamhom, papa blong boe ya i kamtru blong toktok wetem hem from mared. Be taem ol brata ya oli harem nius we boe ya i fosem sista blong olgeta blong i slip wetem hem, oli harem nogud tumas, mo oli kros tumas tu. Long fes blong olgeta, fasin ya i nogud we i nogud, olgeta oli no save mekem, mo oli luk we boe ya i mekem bigfala sem long famle blong olgeta. 8 Nao papa blong boe ya i talem long Jekob se, "Pikinini ya blong mi i laekem dota ya blong yu tumas. I gud yu letem hem i mared long hem. 9 I gud yumi putum wan toktok se ol boe blong yufala bambae oli save tekem ol gel blong mifala, mo ol boe blong mifala bambae oli save tekem ol gel blong yufala. 10 Nao bambae yufala i save stap wetem mifala long graon ya blong mifala. Bambae yufala i save go stap long weples we yufala i luk se i gud, mo yufala i save mekem bisnes wetem mifala, mo yufala i save holem graon blong yufala long ples ya."

11 Nao boe ya i talem long olgeta ya se, "Olgeta. Sipos yufala i glad blong givhan long mi long samting ya, bambae mi mi mekem long yufala olsem we yufala i wantem. 12 I gud yufala i talemaot presen we yufala i wantem blong mi mi givim long yufala. Mo yufala i save leftemap praes blong gel ya i go antap olsem we yufala i wantem. Sipos yufala i glad blong hem i mared long mi, praes we yufala i putum, bambae mi mi pem."

13 Be from we boe ya i mekem bigfala sem long gel ya, ol brata blong gel ya oli girap, oli giaman long boe ya wetem papa blong hem, 14 oli talem se, "I gud, be mifala i no save letem sista blong mifala i mared long man we i no sakomsaes.* Hemia bambae i mekem mifala i sem ya. 15 Wan rod nomo i stap. Sipos yufala i kam olsem mifala, we olgeta man blong yufala oli sakomsaes, hemia nao bambae mifala i save agri long hem. 16 Sipos yufala i mekem olsem, bambae ol boe blong yufala oli save kam tekem ol gel blong mifala, mo bambae ol boe blong mifala oli save go tekem ol gel blong yufala. Nao bambae yumi save kam olsem ol man blong wan laen* nomo. 17 Be sipos yufala i no save agri se olgeta man blong yufala bambae oli sakomsaes, bambae mifala i tekem gel ya, mifala i aot long ples ya."

18 Nao Hamoro mo boe ya blong hem, tufala i luk se tok ya i stret nomo, 19 mo wantaem nomo, boe ya i mekem olsem we olgeta i talem, from we hem i laekem gel ya tumas. Hem i wan gudfala yang man, we ol man oli stap tinghae moa long hem, i winim ol narafala boe long haos blong papa blong hem. 20 Nao tufala i go sidaon long doa* blong bigfala stonwol blong taon ya, we hemia prapa ples long kastom blong olgeta blong tokbaot ol bisnes blong olgeta. Nao papa blong boe ya i toktok long ol man blong ples ya, 21 i talem se, "Olgeta. Ol man ya oli glad blong fren gud wetem yumi. I moa gud yumi letem olgeta oli stap long graon ya, we oli save go stap long weples oli luk se i gud. Graon ya i bigwan, i naf long yumi evriwan. Mo i gud yumi letem ol boe blong yumi bambae oli go tekem ol gel blong olgeta, mo ol boe blong olgeta bambae oli kam tekem ol gel blong yumi. 22 Be wan samting i stap. Long kastom blong olgeta, ol man oli sakomsaes. Mo olgeta oli talem se sipos yumi wantem we olgeta oli stap wetem yumi, we yumi evriwan i olsem ol man blong wan laen nomo, be yumi evriwan i mas sakomsaes. 23 !Be yu luk! Sipos yumi agri blong letem olgeta oli stap wetem yumi, bambae olgeta anamol blong olgeta wetem olgeta narafala samting blong olgeta oli blong yumi. I gud yumi agri blong mekem olsem, nao bambae oli save kam stap wetem yumi." 24 Nao ol man blong taon ya oli agri long tok ya blong tufala. Nao olgeta man long ples ya oli sakomsaes.

25 Nao tri dei i pas, mo ol man blong taon ya oli stap harem sakomsaes blong olgeta i soa yet. Nao tu pikinini blong Jekob, we nem blong tufala Simeon* mo Livae,* we tufala i stret brata blong gel ya, tufala i tekem naef blong faet blong tufala, tufala i go insaed long taon ya, we tufala i stap wokbaot gud nomo. Nao tufala i girap, tufala i kilim olgeta man blong taon ya, 26 wetem Hamoro mo boe ya blong hem, olgeta evriwan i ded. Nao tufala i tekemaot sista ya blong tufala long haos blong boe ya bakegen, mo trifala i aot long taon. 27 Nao taem olgeta man ya oli ded, ol narafala brata blong tufala oli kam long taon ya, oli tekem olgeta samting blong ol man blong ples ya, mo oli spolem taon ya. Long fasin ya, oli panisim olgeta from bigfala sem ya we boe ya i mekem long sista blong olgeta. 28 Oli tekemaot olgeta sipsip mo olgeta nani blong olgeta, wetem olgeta buluk mo olgeta dongki blong olgeta, mo olgeta narafala samting we i stap long taon ya, mo long ol graon raonabaot long hem, 29 mo oli tekem olgeta woman mo ol pikinini blong taon ya, wetem olgeta samting long ol haos blong olgeta. Long taem ya, oli tekemaot olgeta gudgudfala samting we i stap long taon ya, oli karem i go.

30 Nao Jekob i tok long tufala pikinini ya blong hem, i talem se, "Tufala. Yutufala i mekem wan bigfala trabol long mi ya. Naoia, ol laen blong Kenan, wetem ol laen blong Perij, mo ol narafala man olbaot long kantri ya bambae oli no moa laekem mi, bambae oli agens long mi ya. Be yumi no plante nating. Sipos olgeta ya oli joen wanples, nao oli kam blong mekem faet long yumi, bambae yumi evriwan i lus ya."

31 Be tufala i talem long hem se, "?Weswe? ?Yu wantem oli mekem sista blong mifala i kam olsem woman blong rod nomo?"