1 Nao Jekob* i singaot olgeta pikinini blong hem oli kam long hem, mo i talem se, "Yufala i kam klosap. Bambae mi mi talemaot ol samting ya long yufala, we bambae i kamtru long yufala.

2 Mi Jekob, mo God i givim narafala nem blong mi

se Isrel.*

Ol pikinini blong mi.

Yufala i kam wanples, yufala i lesin.

Mi mi papa blong yufala, yufala i lesin gud long mi.

3 "Ruben.*

Yu yu fasbon pikinini blong mi, yu yu paoa blong mi.

Taem mi kam man, yu yu fas pikinini

we mi mi bonem.

Nem blong yu i hae moa, mo yu strong moa,

winim ol brata blong yu.

4 Yu yu olsem wan wota

we i stap ron bigwan, we i no gat man i save blokem, be i stat naoia,

nem blong yu bambae i no moa hae winim ol brata blong yu,

from we mi mi papa blong yu, be yu girap, yu mekem bigfala sem long mi, yu go long bed blong mi,

yu slip wetem slef ya we i narafala woman blong mi.

5 "Simeon* mo Livae.*

Yutufala i wan brata.

Yutufala i stap yusum

ol samting blong faet blong yutufala blong mekem ol fasin blong spolem man nomo.

6 Mi mi no save go joen long ol tok haed blong yutufala.

Mi mi no wantem nating blong go joen wetem yutufala.

Taem yutufala i kros, yutufala i go kilim ol man oli ded.

Mo taem yutufala i mekem plei, yutufala i go katem

string blong leg blong ol buluk, blong laf nomo long olgeta.

7 I gud God i panisim yutufala from kros ya blong yutufala

we i stap kam strong tumas, mo from fasin blong yutufala blong faerap,

we yutufala i stap mekem i strong tumas long ol man.

Mi bambae mi mekem we olgeta we bambae oli kamaot biaen long yutufala

bambae oli seraot, bambae oli stap wanwan olbaot

long medel blong ol narafala man ya we bambae oli kamaot biaen long mi.

8 "Juda.**

Ol brata blong yu bambae oli presem yu.

Yu yu stap daonemgud ol enemi blong yu, gogo oli stap nomo long han blong yu.

Ol brata ya blong yu bambae oli bodaon long yu.

9 ✝Yu yu olsem laeon,

we i go kilim anamol, i kakae, nao i kambak long hol blong hem, i ledaon,

i stretem bodi blong hem, mo olgeta man oli fraet long hem,

i no gat man i save go wekemap hem.

10 Wan long olgeta

we bambae i kamaot biaen long yu bambae i kam king, i holem wokingstik blong hem,

mo olgeta we bambae oli kamaot biaen long hem,

oltaem bambae oli holem paoa blong rul.

Olgeta ya nomo bambae oli stap kam king,

gogo paoa ya i go long wan man we i gat raet blong holem,

nao olgeta man bambae oli obei long hem.

11 Long taem ya, kakae bambae i plante we plante.

Ples bambae i fulap gud long grep*

we waen blong olgeta i beswan, nao ol man bambae oli no moa tingbaot,

bambae oli stap fasem ol dongki blong olgeta long ol stamba blong olgeta,

mo waen ya we i red gud, be bambae oli wasem

ol klos blong olgeta long hem.

12 King ya

we bambae i kamaot biaen long yu, ae blong hem bambae i saen we i saen, i winim waen we i red we i red,

mo tut blong hem bambae i waet we i waet,

i winim melek we i waet gud.*. 11 Ples blong yu bambae i fulap gud long plantesen blong grep, we waen blong olgeta i beswan, be bambae yu yu no moa tingbaot, bambae yu stap fasem dongki blong yu olbaot long ol stamba blong olgeta, mo waen ya we i red gud, be bambae yu stap yusum blong wasem klos blong yu long hem. 12 Ae blong yu bambae i red gud, from we yu stap dring waen, be tut blong yu bambae i waet we i waet, from we yu stap dring melek.

13 "Sebulun.*

Yu bambae yu mekem ples blong yu

klosap long solwota.

Ples blong yu

bambae i wan sefples

we ol sip oli save haed long hem,

mo graon blong yu

bambae i go longwe

i go olwe kasem taon ya Saedon.

14 "Isakara.*

Yu yu olsem wan dongki blong wok,

we i glad nomo

blong i stretem leg blong hem, i ledaon long medel blong tufala havsak blong hem.

15 Dongki olsem, hem i luk

we ples we i stap long hem i gudfala,

mo we graon raonabaot long hem i nambawan, nao i glad nomo blong karem

ol hevi samting ya bakegen, mo blong ol man oli fosem hem

blong i wok slef* blong olgeta.

16 "Dan.**

Yu bambae yu kam wan strong lida.

Bambae yu mekem olgeta

we oli kamaot biaen long yu,

oli kasem stret fasin,

olsem we olgeta we oli kamaot

biaen long ol brata blong yu

bambae oli kasem.

17 Be olgeta ya

we bambae oli kamaot biaen long yu, bambae oli olsem snek

we i stap haed long saed blong rod, bambae oli olsem rabis snek ya

we i gat posen long maot blong hem, we sipos hem i kakae leg blong hos,

hos i sek i stanap long tufala leg blong hem, nao man we i stap sidaon long hem

i foldaon, i go bangem baksaed blong hem

long graon.

18 "Hae God.

Mi mi stap wet long yu,

blong yu yu sevem mi.

19 "Gad.*

Bambae ol man blong stil

oli kam blong mekem faet long yu,

be yu bambae yu girap,

yu ronemaot olgeta i go.

20 "Asere.*

Graon blong yu

bambae i givim ol gudfala kakae,

mo kakae we yu bambae yu wokem,

i stret blong king i kakae.

21 "Naftali.*

Yu bambae yu olsem gudfala woman dia*

we i fri blong wokbaot long ol hil,

we ol pikinini blong hem

oli naes we i naes.

22 "Josef.

Yu yu olsem wan tri

we i stap gru

klosap long springwota,

we i stap karem

plante kakae blong hem,

mo ol han blong hem

oli bigbigwan,

oli stap hang

long narasaed blong stonwol.*

23 Ol enemi blong yu bambae oli kam,

oli stap mekem faet long yu,

oli stap sutum yu

long bonara blong olgeta.

24 Be mi Jekob,

mo God blong mi i gat paoa.

Mi Isrel,

mo God ya blong mi

bambae i lukaot gud long olgeta

we oli kamaot biaen long mi,

olsem we man i stap lukaot gud

long ol sipsip blong hem,

i stap blokemgud olgeta.

Nao hem bambae i lukaot gud long yu,

i mekem yu yu strong we yu strong,

mo han blong yu we i holem bonara

bambae i no save seksek.

25 Pikinini blong mi.

God ya i gat olgeta paoa,

mo hem i God blong mi,

mo hem bambae i givhan long yu,

hem bambae i blesem yu.

Hem bambae i sanem ren i aot long skae, i folfoldaon, i kam long yu,

mo bambae i givim wota long yu, we i kamaot daon olgeta,

aninit long graon.

Mo hem bambae i mekem we i gat plante pikinini

oli stap kamaot biaen long yu, mo ol pikinini ya bambae oli gru gud,

oli strong.

26 Ol bigbigfala hil ya we oli stap bifo olgeta,

bambae oli stap olwe, gogo i no save finis, mo ol gudgudfala samting

we i stap kamaot long olgeta oli plante we plante,

be mi mi papa blong yu, mo ol gudgudfala samting ya

we mi mi talem blong blesem yu, oli gudfala moa,

i winim ol gudgudfala samting ya.

Josef.

Yu yu narafala

long ol brata ya blong yu,

mo prea blong mi,

we olgeta gudgudfala samting ya

bambae oli stap kamtru long yu.

27 "Benjamin.*

Yu yu olsem wan wael dog

we i wael we i wael,

we long moning mo long naet,

i stap kilim ol samting,

i stap kakae olgeta."

28 Ol twelef brata ya oli stamba blong ol twelef laen* blong Isrel ya, we fastaem, nem blong hem Jekob. Mo hemia nao olgeta tok we olfala ya i givim long ol pikinini ya blong hem we i talemaot las toktok blong hem, mo i givim ol tok long olgeta we i stret long olgeta wanwan.

29,30 ✝Nao Jekob* i talem long olgeta se, "I no longtaem bambae mi mi go stap wetem ol olfala bubu blong mi bifo, we oli ded finis. Bambae yufala i mas karem bodi blong mi i gobak long Kenan,* long ples ya Makpela, long saed blong ples ya Mamre long is. Long graon ya we fastaem i blong wan man we i laen* blong Het, we nem blong hem Efron, i gat wan hol blong ston i stap. Pis graon ya, bubu blong mi i pemaot, blong i save kam beregraon blong yumi ya we i kamaot biaen long hem. Yufala i mas berem* bodi blong mi i stap long hol ya wetem bodi blong ol bubu blong mi. 31 ✝Hemia hol ya we bifo oli berem bodi blong tufala bubu ya blong mi, Ebraham mo Sera, tufala i stap long hem. Mo oli berem bodi blong papa blong mi mo bodi blong mama blong mi, tufala i stap long hem, mo mi mi berem bodi blong Lea tu long hem. 32 Olfala ya blong yumi i pemaot graon ya finis long ol laen blong Het, nao pis graon ya wetem hol ya blong ston i blong yumi. Yufala i mas berem mi long ples ya." 33 ✝Nao taem hem i talem ol tok ya finis long ol pikinini ya blong hem, hem i ledaon bakegen, nao i ded.