1 Nao Adam wetem woman blong hem tufala i stap gogo, woman ya i gat bel. Hem i bonem wan pikinini boe blong hem, mo i talem se, "Hae God i givhan long mi, nao mi mi kasem wan pikinini we i boe. I gud mi putum nem blong hem se Ken*" 2 Mo biaen, hem i bonem narafala pikinini boe blong hem bakegen, mo i putum nem blong hem se Ebel. Nao Ebel i kam man blong lukaot long sipsip, mo Ken i kam man blong wokem garen. 3 Tufala i stap mekem olsem gogo, nao Ken i tekem sam kakae we i kamaot long garen blong hem, i givim i go long Hae God blong mekem wosip long hem. 4 ✝Be Ebel i tekem wan fasbon blong ol sipsip blong hem, i kilim i ded, mo i tekem ol gudfala mit blong hem we i gat gris, nao i givim i go long Hae God blong mekem wosip long hem. Mo Hae God i glad long fasin ya we Ebel i mekem, mo long presen ya we i givim i go long hem, 5 be i no glad long fasin we Ken i mekem, mo long presen ya blong hem. Nao Ken i kros tumas, mo fes blong hem i kam nogud.

6 Nao Hae God i tok long Ken, i talem se, "?From wanem yu yu kros olsem? ?Weswe fes blong yu i kam nogud olsem? 7 Sipos fasin blong yu i stret, bambae mi mi glad long yu, be fasin blong yu i no stret. Mo from samting ya, sin blong yu i olsem wan wael anamol we i stap klosap long doa, i rere blong kakae yu. Fasin nogud ya i wantem tumas blong winim yu, be yu yu mas winim hem."

8 ✝Nao wan dei, Ken i talem long brata blong hem se, "Ei, yumitufala i go long garen."* Nao taem tufala i go stap long garen, hem i girap, i kilim brata ya blong hem i ded.

9 Nao biaen, Hae God i askem long hem se, "?Wehem brata blong yu, Ebel?"

Be Ken i talem se, "Mi no save. ?Yu ting se i wok blong mi blong lukaot long brata blong mi?"

10 ✝Nao Hae God i tok long hem, i talem se, "Ken. ?Wanem samting ya we yu yu mekem? !Yu lesin! Brata blong yu i ded finis. Blad blong hem i ron i go long graon, mo blad ya i stap krae long mi yet blong mi stretem samting ya. 11,12 !Yu yu kilim brata blong yu ya! Blad blong hem i ron i go long graon, mo from samting ya, trabol bambae i mas kasem yu. Sipos yu wokem garen blong yu bakegen, be bambae i no moa save karem kakae. Naoia, yu yu no moa gat prapa ples blong yu long wol ya, oltaem long laef blong yu, bambae yu yu stap wokbaot olbaot nomo."

13 Be Ken i talem long hem se, "Hae God, panis ya blong mi i strong tumas. Mi mi no save karem. 14 Naoia yu wantem ronemaot mi long ples ya, blong mi no moa save stap long fes blong yu. Bambae i no moa gat ples blong mi long wol ya, oltaem long laef blong mi, bambae mi stap wokbaot olbaot nomo. !Be sipos wan man i faenem mi, bambae i kilim mi ya!"

15 Be Hae God i talem long hem se, "Nogat. Sipos wan man i kilim yu, be bambae seven man oli mas ded from." Nao hem i putum wan mak long hem, blong man we i faenem hem bambae i no kilim hem. 16 Nao Ken i aot long fes blong hem, i go long narasaed Iden long saed i go long is, mo i go stap long wan ples we nem blong hem Nod, we i min se "Ples we man i no save stap kwaet."

17 Nao Ken wetem woman blong hem, tufala i stap gogo, nao woman ya i gat bel, mo i bonem wan pikinini boe blong hem, mo i putum nem blong hem se Inok. Nao Ken i wokem wan vilej, mo i putum nem blong vilej ya se Inok, we i nem blong pikinini ya blong hem.

18 Inok ya, hem i bonem Irad, mo Irad i bonem Mehujael, mo Mehujael i bonem Metusael, mo Metusael i bonem Lamek.

19 Nao Lamek ya i tekem tu woman. Faswan, nem blong hem Ada, mo sekenwan, nem blong hem Jila. 20 Ada i bonem Jabal, mo ol man we oli kamaot biaen long Jabal ya oli no wokem vilej, oli stap long ol haos tapolen nomo, mo oli stap lukaot long ol buluk mo nani mo sipsip blong olgeta. 21 Stret brata blong Jabal ya, nem blong hem Jubal, mo olgeta we oli kamaot biaen long Jubal ya oli waes gud blong kilim gita mo blong blu long bambu. 22 Mo Jila i bonem wan pikinini boe blong hem, mo i putum nem blong hem se Tubalken. Mo olgeta we oli kamaot biaen long Tubalken ya oli blaksmit, we oli save wokem ol samting long aean mo bras. Stret sista blong Tubalken ya, nem blong hem Nahama.

23 Lamek ya, hem i wokem wan sing, mo i sing long hem long fes blong tufala woman ya blong hem. Hem i talem se,

"Ada mo Jila,

yutufala i lesin gud.

Yutufala i woman blong mi,

yutufala i lesin long tok blong mi.

Mi mi kilim wan man i ded,

from we hem i kilim mi.

Man ya we i faetem mi i wan yang boe,

nao mi mi kilim hem i ded.

24 Sipos wan man

i kilim Ken i ded,

bambae seven man

oli mas ded from.

Be sipos wan man

i kilim mi mi ded,

bambae seventi seven man

oli mas ded from."

25 Nao Adam mo Iv, tufala i stap gogo, nao Iv i bonem wan pikinini boe blong hem bakegen, mo i talem se, "God i glad blong givim wan pikinini boe long mi bakegen, blong tekem ples blong Ebel ya we Ken i kilim hem i ded." Mo hem i putum nem blong hem se Set*.

26 Nao biaen, Set tu i bonem wan pikinini boe blong hem, mo i putum nem blong hem se Enos. Nao long taem ya, ol man oli save nem ya blong God se Hae God, mo oli stat blong yusum long wosip blong olgeta.*