18 ✝Mo long dei ya nao, Hae God i mekem promes* wetem Ebram se, "Olgeta graon ya, i stat long krik ya long saot we i mak blong graon blong ol man Ijip, i go kasem Yufretes Reva long not, mi mi promes se bambae mi givim i go long olgeta we bambae oli stap kamaot biaen long yu. 19-21 Ol man we oli stap holem ol graon ya naoia, i gat ol laen blong Ken, mo ol laen blong Kenas, mo ol laen blong Kadmon, mo ol laen blong Het, mo ol laen blong Perij, mo ol laen blong Amoro, mo ol laen blong Kenan, mo ol laen blong Gigas, mo ol laen blong Jebus, mo olgeta we ol man oli stap singaot olgeta se ol Refaem.*"