Gênesis 39

7 mo i no longtaem, woman blong masta ya blong hem i stap kavetem hem, nao i askem long hem blong i kam slip wetem hem. 8,9 Be hem i no wantem fasin ya nating, nao i talem long woman ya se, "!Nogat! !Mi mi no save mekem olsem! !Yu luk! Naoia, masta blong mi i no trabol long wan samting nating long haos blong hem, from we mi mi stap. Hem i putum mi mi bos long olgeta samting we hem i gat. Mo mi gat raet long olgeta samting long haos ya, stret olsem we hem i gat. Yu nomo yu stap long han blong hem, from we yu yu woman blong hem. Sipos mi kam slip wetem yu, bambae mi mekem i no stret long hem, mo mi mekem sin long fes blong God tu. Hemia i nogud tumas ya." 10 Nao nating we evri dei, woman ya i stap traem pulum hem blong i kam slip wetem hem, be hem i no wantem fasin ya, mo hem i no wantem stap klosap long hem tu.

11 Nao wan dei, Josef i go insaed long haos blong mekem wok blong hem, mo long taem ya, i no gat narafala slef nating i stap. 12 Nao woman ya i holem hem long kot blong hem, i talem se, "!Ale, yu kam! !Yu kam slip wetem mi!" Be hem i ronwe long kot blong hem, i resis, i go afsaed long haos.