1 Maze abantu bose bakoranira hamwe nk’umuntu umwe mu kibuga kiri imbere y’Irembo ry’Amazi. Babwira Ezira umwigisha w’Ivyanditswe ngo asohore Igitabu c’Ivyagezwe vya Mose, ivyo Uhoraho yari yarahaye Abisirayeli.

2 Maze ku musi wa mbere w’ukwezi kw’indwi Ezira umuherezi azana Ivyagezwe imbere y’ikoraniro, ryari rigizwe n’abagabo n’abagore bashobora gutahura. 3 Abisoma n’ijwi rirenga uhereye mu gitondo gushika ku murango atumbereye ku kibuga c’imbere y’Irembo ry’Amazi imbere y’abagabo, abagore n’abandi bashobora gutahura kandi abantu bose bumviriza batekereje ivyo mu gitabu c’Ivyagezwe.

4 Ezira umunyabwenge w’Ivyanditswe ahagarara ahatamuratse hubatswe mu biti ku bwo ico gikorwa. I ruhande yiwe i buryo hari hahagaze Matitiya, Shema, Anaya, Uriya, Hilikiya na Mayaseya; i bubampfu bwiwe hari Pedaya, Mishayeli, Malikiya, Hashumi, Hashibadana, Zakariya na Meshulamu.

5 Ezira azingurura ca gitabu. Abantu bose bashobora kumubona kuko yari ahagaza ahataramutse; amaze kukizingurura, abantu bose barahaguruka. 6 Ezira ahimbaza Uhoraho Imana ihambaye; maze abantu bose baduza amaboko barishura bati: "Amen! Amen!" Baca barunama basenga Uhoraho bubamye hasi.

7 Abalewi ari bo Yesuwa, Bani, Sherebiya, Yamini, Akubu, Shabetayi, Hodiya, Mayaseya, Kelita, Azariya, Yozabadi, Hanani na Pelaya, bigisha abantu ivyo mu Vyagezwe abantu bagihagaze ngaho. 8 Basoma mu Gitabu c’Ivyagezwe vy’Imana, barabitomora, babiha n’insiguro kugira ngo abantu bashobore gutahura ivyariko birasomwa.

9 Nuko Nehemiya umukuru w’intara, Ezira umuherezi n’umwigisha w’ivyagezwe, n’Abalewi bariko barigisha abantu bababwira bose bati: "Uyu musi ni Uwera k’Uhoraho Imana yanyu. Ntimugandare canke ngo murire." Kuko abantu bose bariko bararira uko bumviriza amajambo yo mu Vyagezwe.

10 Nehemiya aravuga ati: "Nimugende murye ibiryoshe munywe n’ibinyobwa bisosa, kandi murungikire n’abatateguye na kimwe. Uwu musi ni uwera k’Uhoraho Imana yacu. Ntimubabare, kuko umunezero w’Uhoraho ari wo nkomezi zanyu."

11 Abalewi bamama abantu bose, bavuga bati: "Nimutekereze, kuko uwu ari umusi wera. Ntimubabare."

12 Nuko abantu bose baca bagenda kurya no kunywa, no kurungikiranira ivyokurya no guhimbaza banezerewe cane, kuko bari batahuye amajambo bari bamenyeshejwe.

13 Ku musi wa kabiri w’uko kwezi, abakuru b’imiryango, bari kumwe n’abaherezi n’Abalewi, bakoranira aho umwigisha w’Ivyagezwe Ezira ari, kugira ngo bumvirize neza amajambo yo mu Vyagezwe. 14 Basanga mu Vyagezwe, ivyo Uhoraho yari yaratanze acishije kuri Mose, handitse ngo Abisirayeli baze babe mu nsago bagire umusi mukuru wo mu kwezi kw’indwi 15 kandi ko bari bakwiye kwamamaza iryo jambo bakarikwiragiza mu bisagara vyabo n’i Yerusalemu ngo: "Nimusohoke muduge mu ntara y’imisozi maze muzane amashami mwakuye ku biti vy’imyelayo yo mu mirima hamwe n’ibiti vy’imyelayo yo mw’ishamba, no ku miriteli, ku bigazi no ku biti vyose bizitanye, kugira ngo mwubake insago nk’uko vyanditswe."

16 Nuko abantu barasohoka bazana amashami biyubakira utuzu dutoduto imbere y’inzu zabo, mu ngo zabo, imbere y’Ingoro y’Imana no ku kibuga kiri i ruhande y’Irembo ry’Amazi n’ikiri i ruhande y’Irembo rya Efurayimu. 17 Abantu bose bari baravuye mu kinyago bubaka insago bazibamwo. Kuva mu gihe ca Yesuwa mwene Nuni gushika uwo musi, Abisirayeli ntibari bwahimbaze uwo musi mukuru nk’uko. Maze baranezerwa cane.

18 Uko umusi utashe, uhereye ku musi wa mbere gushika ku wa nyuma, Ezira yama abasomera ico Gitabu c’Ivyagezwe vy’Imana; bagahimbaza uwo musi mukuru imisi indwi, maze ku musi w’umunani hakaba ikoraniro rinini nk’uko vyari bitegekanijwe.