1 Ku musi wa mirongo ibiri na kane w’ukwo kwezi nyene, Abisirayeli bakoranira hamwe, bisonzesheje, bambaye amagunira bisuriyeko umukungugu ku mitwe. 2 Abakomoka kuri Isirayeli bose bari bitandukanije n’abanyamahanga bose. Bahagarara mu bibanza vyabo batura ivyaha vyabo n’ibibi vyose ba sekuruza bari barakoze. 3 Bahagarara aho bari bari maze basoma mu Gitabu c’Ivyagezwe vy’Uhoraho Imana yabo amasaha atandatu, bongera bamara ayandi masaha atandatu batura ivyaha vyabo basenga Uhoraho Imana yabo. 4 Abalewi bari bahagaze ku ngazi: Yesuwa, Bani, Kadimiyeli, Shebaniya, Buni, Sherebiya, Bani na Kenani, bambaza Uhoraho Imana yabo n’ijwi rirenga. 5 Kandi Abalewi ari bo Yesuwa, Kadimiyeli, Bani, Hashabuneya, Sherebiya, Hodiya, Shebaniya na Petahiya, baravuga bati: "Nimuhaguruke muhimbaze Uhoraho Imana yanyu, yamyeho kandi izokwamaho." Barasenga bati:

"Izina ryawe ry’icubahiro riragahezagirwa, kandi rishirwe hejuru y’imihezagiro yose no guhimbazwa kwose. 6 Ni wewe wenyene Uhoraho. Waremye amajuru, mbere n’amajuru asumba ayandi, n’inyenyeri zose, isi n’ibiyuzuye, ibiyaga n’ibiri muri vyo. Ni wewe utanga ubuzima ku bintu vyose, kandi ingabo zo mw’ijuru ziragusenga.

7 Ni wewe wenyene Uhoraho Imana, watoranije Aburamu umukura muri Uri mu Bukaludaya maze umwita Aburahamu. 8 Wabonye ko umutima wiwe ukuyoboka, uca ugirana isezerano na we ngo uze uhe uruvyaro rwiwe igihugu c’Abanyakanani, Abaheti, Abamori, Abaperizi, Abayebusi n’Abagirugashi. Wakomeje isezerano ryawe kuko ugororoka.

9 Wabonye imibabaro ba sogokuruza barimwo muri Egiputa; wumvise ugutaka kwabo bari ku Kiyaga Gitukura. 10 Weretse ibimenyetso n’ibitangaza Farawo, ku bakuru no ku bantu bose bo mu gihugu ciwe, kuko wari uzi ingene Abanyegiputa babatwaza amanyama. Wabaye rurangiranwa, kandi n’ubu uracari rurangiranwa. 11 Waciyemwo kubiri Ikiyaga Gitukura imbere yabo, kugira ngo barengane muri co baca ahumutse, ariko ababakurikira amazi yarabarengeye, nk’uko ibuye ryibira mu mupfunda w’amazi. 12 Ku murango wabarongoza inkingi y’igicu, maze mw’ijoro ukabarongoza inkingi y’umuriro ngo ubamurikire mu nzira bacamwo.

13 Waje uvuye ku musozi Sinayi; wavuganye na bo uri mw’ijuru. Wabahaye ibibagenga n’ivyagezwe bitunganye, amabwirizwa n’amategeko meza. 14 Wabamenyesheje ivy’Isabato yawe yera maze ubaha amategeko, amabwirizwa, n’ivyagezwe ubicishije ku musavyi wawe Mose. 15 Igihe bari bashonje wabahaye ivyokurya bivuye mw’ijuru n’igihe bari banyotewe wabahaye amazi avuye mu gitandara. Wabategetse kwinjira no kwegukira igihugu wari wararahiye umanitse ukuboko ko uzokibaha.

16 Ariko ba sogokuruza bagira amanyama baragarariza, maze ntibitondera ivyo wategetse. 17 Banka kwumva bibananira no kwibuka ibitangaza wakoreye muri bo. Baragarariza, maze bishingira uwo kubarongora ngo basubire mu buja bwabo. Ariko uri Imana iharira, uri inyabuntu igira imbabazi, iteba kuraka kandi y’urukundo rwinshi. Ni co catumye utabaheba, 18 no mu gihe bibumbira igishushanyo c’ishuri bakavuga bati: ‘Iyi ni yo mana yanyu, yabakuye muri Egiputa,’ canke igihe bakurogotako bakagutuka.

19 Kubera imbabazi zawe nyinshi ntiwabahebeye mu bugaragwa. Ku murango inkingi y’igicu ntiyaretse kubarongora mu nzira yabo, canke inkingi y’umuriro mw’ijoro ngo ireke kubamurikira mu nzira yabo bajana. 20 Wabahaye Mpwemu wawe mwiza ngo abahe gutahura. Ntiwabimye manu ngo babure ico barya, kandi wabahaye n’amazi abamara inyota. 21 Mu myaka mirongo ine yose warabashigikiye mu bugaragwa; nta co bigeze bakena, impuzu zabo ntizigeze zishira canke ngo ibirenge vyabo bivyimbe.

22 Wagabuye mu maboko yabo ubwami n’amahanga, kugira ngo ubahe n’intara zari zikikije ico gihugu cabo. Bigaruriye igihugu ca Sihoni umwami w’i Heshiboni n’igihugu ca Ogi umwami w’i Bashani. 23 Wagwije abahungu babo bangana n’inyenyeri zo kw’ijuru, maze ubazana mu gihugu wari warabwiye ba sekuruza ko bazocinjira kikaba icabo bwite. 24 Abahungu babo baracinjiye kiba icabo bwite. Wirukanye Abanyakanani imbere yabo, baba muri ico gihugu; wagabuye Abanyakanani mu maboko yabo, hamwe n’abami babo n’abantu baba muri ico gihugu, ngo babakoreshe ico bashaka. 25 Bigaruriye ibisagara bizitijwe inzitiro n’amatongo yimbuka; bigaruriye amazu yuzuye ivyiza vyinshi vy’uburyo bwinshi, amariba yimbwe, imizabibu, imyelayo n’ibiti vy’ivyamwa vyinshi cane. Bararya barahaga maze baravyibuha; banezererwa ivyiza wabahaye.

26 Ariko ntibumvira barakugarariza; batera ibitugu Ivyagezwe vyawe, bica abavugishwa nawe, bari babatumweko ngo baguhindukirire bakugarukeko; bakora ivyo kukurogotako bisesema. 27 Ni co catumye ubagabura mu maboko y’abansi babo, barabacinyiza. Ariko bamaze gucinyizwa baragutakira. Ubumva uri mw’ijuru, maze ku bw’imbabazi zawe nyinshi ubarungikira abo kubakiza, babarokora mu maboko y’abansi babo.

28 Ariko bamaze kudibama, basubira gukora ibibi mu nyonga zawe. Uca ubarekurira mu maboko y’abansi babo ngo babaganze. Maze bagutakambiye kandi, ubumva uri mw’ijuru, kubera imbabazi zawe urongera urabatabara kandi ubikora wikurikiranya kenshi.

29 Urabinginga ngo bahindukirire ivyagezwe vyawe, ariko bagira amanyama ntibumvira amabwirizwa yawe. Bacumura ku mategeko yawe kandi ari yo azobeshaho umuntu ayumvira. Bakomantaza imitima, maze barahindukira baguha umugongo, baragarariza banka kwumva. 30 Wabihanganiye imyaka myinshi. Wababuriye ubicishije muri Mpwemu wawe yari mu bavugishwa nawe. Ariko ntibavyitayeho, ni co catumye ubarekurira mu maboko y’amahanga yari abakikije. 31 Ariko kubera imbabazi zawe nyinshi ntiwabaherengeteje canke ngo ubahebe, kuko uri Imana y’inyabuntu kandi y’inyembabazi.

32 None rero, Mana yacu, Mana nkuru, y’inyenkomezi kandi ihambaye, izigama isezerano ry’urukundo, ntiwirengagize ibi bihe bigoye vyadushitseko, n’abami bacu n’abarongozi bacu, ku baherezi bacu no ku bavugishwa n’Imana bacu, kuri ba sogokuruza no ku bantu bose, kuva mu gihe c’abami b’i Ashuri gushika uwu musi. 33 Mu vyatubayeko vyose, wamye uri uwugororotse; wakoze mu bwizigirwa, ariko tweho twakoze ibibi. 34 Abami bacu, abaturongora, abaherezi bacu na ba sogokuruza ntibitondeye Ivyagezwe vyawe; ntibashize umutima ku mabwirizwa yawe canke ku mburi wabarungikiye. 35 No mu gihe bari bakiri mu bwami bwabo, bakinezererwa ukugira neza kwawe kwari kuri bo bakiri mu gihugu kinini kandi cimbuka wabahaye, ntibagukorera canke ngo bahindukire bave mu nzira zabo mbi.

36 Ariko raba, uwu musi turi abagurano, abagurano mu gihugu wahaye ba sogokuruza kugira ngo barye ivyamwa n’ibindi vyiza cimbuka. 37 Kubera ivyaha vyacu, ivyimburwa vyaco vyinshi bija ku bami waduhaye ngo batuganze. Ni bo batuganza twe n’amasho yacu uko bishakiye. Natwe turi mu gahinda kenshi.

38 Ku bw’ivyo, turasezeranye isezerano kandi tuzoryandika, kandi abarongozi bacu, Abalewi bacu n’abaherezi bacu bashireko amazina yabo n’ibidodo vyabo."