1 Shira inzamba ku munwa!

Umwansi amanutse nk’inkona ku nzu y’Uhoraho

kuko abantu barenze kw’isezerano ryanje

bakagarariza ivyagezwe vyanje.

2 Abisirayeli barantakambira bavuga bati:

"Ewe Mana, turakwemeye!"

3 Ariko Isirayeli yataye ivyari vyiza;

nuko rero umwansi azomuhiga.

4 Biyimikiye abami batangishije inama;

batoranije abaganwa ntabahaye uruhusha.

Bakoresha ifeza n’inzahabu vyabo

mu gucura ibigirwamana

bizotuma bahona.

5 Yewe Samariya, terera kure ikigirwamana cawe c’inyana!

Uburake bwanje burarurumvye kubera vyo.

Uzogeza ryari kugendera mu bidatunganye?

6 Umwisirayeli ni we yakubumbiye iyo nyana,

ariko ni jewe Mana jenyene.

None rero izomenagurwa, ijanjagurike,

iyo nyana y’i Samariya.

7 "Babivye umuyaga,

bazokwimbura agashururu.

Ingano zabo nta ntete ziriko;

ntizizovamwo ifu.

Naho zokwera imbuto,

abanyamahanga ni bo bazozirira.

8 Abisirayeli baramizwe;

ubu iyo bari mu mahanga bameze nk’inkono itagira ikimazi.

9 Kuko baduze bakaja muri Ashuri,

bagiye kurya kw’indogoba yo mw’ishamba yangara yonyene.

Efurayimu yishoye ku bandi bagabo yikundiye.

10 Naho bishoye mu mahanga bakifatanya na benshi,

ngiye kubegeraniriza hamwe ndabacire urubanza.

Bazoremerwa cane

bari musi y’agacinyizo k’umwami ahambaye.

11 Naho Efurayimu yubatse ibicaniro vyinshi vyo gutanga ibimazi vy’ivyaha,

vyahindutse ibicaniro vyo gukora ivyaha.

12 Nabandikiye vyinshi mu vyagezwe vyanje,

ariko babiravye nk’ikintu c’icaduka.

13 Naho batanga ibimazi nk’ishikanwa bampaye,

kandi naho baheza bakarya inyama,

Uhoraho ntibamuhimbara.

Ubu nzokwibuka ibibi vyabo

ndabahanire ivyaha vyabo:

bazosubira muri Egiputa.

14 Abisirayeli bibagiye Umuremyi wabo

maze bubaka ibirimba bihambaye;

Abayuda bakomeje ibisagara vyabo.

Ariko nzotuma umuriro ku bisagara vyabo

uzotongora iminara yabo."