1 Ke ini Abimelek amaakeboiyo, awo Isaka a-akereke Tola ayịn Pua, ayịn Dodo, amaadakka ada adinyaaña Isrel. Anye akedʌñ ke Samia, ke abod-abod idʌñ Ifrem. 2 Anye amaadat Isrel usʌñ ke isua edịb mme ita; ndin mbemiso anye akpa, ndin emaebuuk anye ke Samia.

3 Andikikeene anye akedo Yai ke Kilied, a-akedatta Isrel usʌñ ke isua edịb mme iba. 4 Anye akenie nditọ ideen edịb mme duob, e-ekewatta dọñki edịb mme duob. Ammọ ekese ñkpọ ebaña abio edịb mme duob ke Kilied, a-adooho tutu mfịn akere Hafọd Yai. 5 Ke Yai amaakekpa, emaebuuk anye ke Kamọn.

6 Ini keed mfen mbon Isrel emaenam se idiọọk ke iso Abọọñ. Ammọ emaekpono Baal ye mme Astọred, ye mme abasi Aram, mme abasi Sidọn, mme abasi Mọb, mme abasi Amọn ye mme abasi Filistia. Ndin sia nditọ Isrel emaesịn Abọọñ inyʌññọ inam ñkpọ inọ anye aba, 7 Abọọñ amaayat esịd ye mbon Isrel. Anye amaayaak ammọ asịn ke ubọk mbon Filistia ye mbon Amọn, 8 e-ekesuakkake enyʌñ efiik ammọ eboom ke isua ado. Ke ufañ isua duob mme itiaita ammọ emaefiik nditọ Isrel ke edem usakkautịn Yọdan ke Kilied, ke isọñ mme Amọọ. 9 Mbon Amọn emaenyʌñ efrọ Yọdan ekaa ekenwana ye Yuda, Benyamin ye Ifrem. Isrel akeba ke ekamba mfịna. 10 Ndin nditọ Isrel emaeseeme enọ Abọọñ ebo, "Ñnyịn imiinam se idiọọk ye afo, imiduọọk Abasi ñnyịn inyʌñ inam ñkpọ Baal."

11 Ndin Abọọñ amaabọọrọ ammọ, "Ke ini mbon Iyib, Amọọ, Amọn, Filistia, 12 mbon Sidọn, mbon Amalek ye mbon Maon emaifiik ndufo, ndin ndufo emaeseeme ennọ miin eyem unwam, nte ami ñkiinyaañake ndufo nsio ke ubọk ammọ? 13 Ado ndufo emaentop miin eduọk e-enyʌñ ekenam ñkpọ mme abasi mfen, ndin ami ndiinyaañake ndufo aba. 14 Ikaa ikiiseeme inọ mme abasi a-ndufo ekemekke. Yak ammọ inyaaña ndufo ke ini ebaaha ke mfịna!"

15 Ado mbon Isrel emaebo Abọọñ, "Ñnyịn imiinam idiọọk. Nam ye ñnyịn se adodo a-afo akereke abo ke a-afọn, ado mbọk inyaaña ñnyịn idahami." 16 Ndin ammọ emaesioño mme isen abasi ke atu ammọ efep enyʌñ enam ñkpọ enọ Abọọñ. Akem anye ikiikanna adime ukuud Isrel aba.

17 Ke ini mbon Amọn ekenama nnaaekọñ ke Kilied adinwana ye Isrel, nditọ Isrel emaeboho itie keed enyʌñ enam nnaaekọñ ke Mispa. 18 Mme adaiwuod ke Kilied emaedọkkọ emọ-emọ ete, "Awo akeedodo a-adiidat usʌñ ke adinwana ye mbon Amọn ayaado adaiwuod anọ afịd mbon se idʌñọ ke Kilied."