1 Akem Samsịn amaasọiyọ akaa Timna anyʌñ akekịt abọikpa Filistia keed. 2 Anye amaakenyọñ idi, anye amaadọkkọ ete ye eka amọ, "Ami mmekịt awonwaan Filistia ke Timna; ndin idọ anye innọ miin nte anwaan mmi."

3 Ndin ete ye eka amọ emaebọọrọ ete, "Nte awonwaan se ekpedat ibaaha ke atu mbon se iwuana ñkpọ me ke atu afịd mbon ñnyịn? Nte ana afo aka ke atu mbon Filistia ammiifọọrọke edʌd akedat anwaan?"

Ado Samsịn amaabo ete amọ, "Dọ anye nnọ miin. Anye ado anye a-adotto ye ami." 4 (Ete ye eka amọ ikiidiọọñọke ke ami aketo Abọọñ, a-akeyemme ufañ adinam mbon Filistia ñkpọ; sia ke ini ado ammọ ekekaara Isrel.)

5 Samsịn amaasaña ye ete ye eka amọ akaa Timna. Idaha ammọ ekpereke inwañ fain Timna, ke ini anye idiikikpeññe anyen ñyịn ekpe amaakuun afeghe abịne anye. 6 Sịbidịd Abọọñ amaadi ke adudu adidoro anye ke idem ndin anye amaawai ekpe ado mbai-mbai ke ñkaña ubọk amọ nte anye akpewaiya ñyịn ebod. Ado anye ikidọkkọke ete ye eka amọ se anye akenam. 7 Ndin anye amaasọiyọ akaa anyʌñ akenie nneme ye awonwaan ado, ndin Samsịn ama anye.

8 Akekem koo, Samsịn amaatịmme akaa adinam ndọ ye anye, ndin anye amaawọññọ ada ase akpo ekpe ado, anyʌñ akịt eboho akwọọk ye adanakwọọk ke esịd. 9 Anye amaadat ubọk amọ akoi adanakwọọk anyʌñ adia naña anye akesañake ke usʌñ. Ke ini anye akesịmeke ete ye eka amọ, anye amaanọ ammọ ubaak, ndin ammọ ñko emaenyʌñ edia. Ado anye ikiidọkkọke ammọ ke ikidat anye ito akpo ekpe ado.

10 Ete amọ amaakaa adikịt awonwaan ado. Ndin Samsịn amaanam usọrọ ke itie ado, naña ido ñkparawa akesido. 11 Ke ini mme awo ekekịtte anye, ammọ emaemek awo edịb mme duob adido nsaña amọ.

12 Samsịn amaabo ammọ, "Yak ami idọkkọ ndufo ñke keed. Adieke ndufo ekemekke edinnọọ miin ibọọrọ ke ufañ usen itiaba u-usọrọ adiika iso, ami ñyainọ ndufo afọñidem linen edịb mme duob ye ukpʌhọ afọñ edịb mme duob. 13 Ado adieke ndufo imiikanna indọkkọ miin ibọọrọ, ana nte ndufo ennọ miin afọñidem edịb mme duob ye ukpʌhọ afọñ edịb mme duob."

Ammọ emaebo, "Idọkkọ ñnyịn ñke mfo. Nam ñnyịn ikop anye."

14 Anye amaabọọrọ,

"Aketo ke adia ñkpọ, ñkpọ se edia awuọ;

aketo ke akpọsọñ, inịññe ñkpọ awuọ."

Ke idak usen ita ammọ ikiikanna inọ ibọọrọ.

15 Ke ayọhọ usen inaañ, ammọ emaebo anwaan Samsịn, "Kpek ebe mfo nọ anye akappa ñke ado inọ ñnyịn, imiidooho ñnyịn iyaufọp fiin ye mbon ufọk ete mfo iwoot. Nte afo akiikoot ñnyịn adi mi nọ ediyịp inie ñnyịn?"

16 Ndin anwaan Samsịn amaatop idem adot Samsịn ke idem, atua, "Afo ansuasua miin! Afo unekkeke umma miin. Afo amaatop ñke anọ mbon mmi, ado afo ukusiaha ibọọrọ unnọ miin."

Anye amaabọọrọ, "Ami ñkappake ñke ado nnọ ete ye eka mmi, ndin ntak a-ami ñkpekappake unọ fiin-e?" 17 Ndin anwaan Samsịn amaatua ke afịd usen itiaba usọrọ ado. Akem ke ayọhọ usen itiaba Samsịn amaadọkkọ anye, sia anye amaakaa iso anyịk anye. Anye ke idem amọ amaakanna aketañ se ñke ado awuọñọ anọ mbon amọ.

18 Mbemiso utịn asop ke ayọhọ usen itiaba mbon abio ado emaebo anye,

"Nsoo ñkpọ inịññe ikan adanakwọọk?

Nsoo ñkpọ isọñ adudu ikan ekpe?"

Samsịn amaabo ammọ,

"Akpedo ndufo ikifʌññọ isọñ ye ñyịn umanenañ mmi,

ndufo ikpisiaha ñke mmi."

19 Ndin Sịbidịd Abọọñ amaadi ke adudu adidoro anye ke idem. Anye amaakaa Askelọn, akewot ideen ammọ awo edịb mme duob, abọi ammọ afịdñkpọ anyʌñ ayaak anọ mbon se ikikappa ñke ado. Ke ufiob iyadesịd, anye amaatịmme anyọñ ufọk ete amọ. 20 Ndin emaeben anwaan Samsịn enọ keed ke atu mbon ekesañake ye anye ke ini usọrọ ado.