1 Usen keed Samsịn amaakaa Kasa, ke itie ado anye amaakịt akpara keed anyʌñ akena ye anye ke akonayio ado. 2 Emaedọkkọ mbon Kasa ete, "Samsịn mmọ mi!" Ammọ emaekanna itie ado ekʌk enyʌñ etie ebet anye ke afịd akonayio ke inuaatob abio. Ammọ ikinyekkeke idem ke afịd akonayio ado, sia ekebo, "Ke usiere ñnyịn iyaiwot anye."

3 Ado Samsịn amaanaa do tutu ke ufọọd akonayio. Ndin Samsịn amaadakka ada anyʌñ amʌm usʌñ inuaatob abio, adian ye abọọk iba, anyʌñ akpọk ammọ awịppe, eto ibiọñ ye afịd ñkpọ. Anye amaadịppe ammọ adoot ke mme afara amọ anyʌñ aben ammọ akaa ke iwuod abod adaaha ase Hibrọn.

4 Akekem koo, Samsịn amaatọọñọ ima ye awonwaan keed ke Itịkke Sorek, a-anyịñ amọ akedooho Delaila. 5 Mme andikara Filistia emaekaa ebịne awonwaan ado ekebo, "Se ise naña afo akpekan atap anye yak anye utemme fiin ndedịbe se isịne ke akpọsọñ adudu amọ ye naña ñnyịn ikpikan anye ubọk ndin ibọp anye inyʌñ isuuk anye inịm. Ñnyịn awo keedekeed iyaunọ fiin sekel* silfa ikie duob mme keed (1,100)."

6 Ndin Delaila amaabo Samsịn, "Ndọkkọ miin ndedịbe ñkpọ a-asịneke ke akpọsọñ adudu mfo ye naña ekpekan ubọp fiin enịm enyʌñ ukan fiin."

7 Samsịn amaabọọrọ anye ate, "Adieke awo ambọppọ miin ke ndisi idʌk utịgha itiaba ake awo imiinwanna yak asat, ami ñyaakappa mmem nte mme ideen mfen."

8 Ndin mme andikara Filistia emaedat ndisi idʌk utịgha itiaba ake awo imiinwanna yak asat esọk anye, ndin Delaila amaadat ammọ abọp Samsịn. 9 Mme awo emaekedịbe ke ubeed, ndin Delaila amaakoot anye, "Samsịn, mbon Filistia eyaumʌm fiin!" Ado anye amaakịp mme idʌk ado ñkeñe-ñkeñe nte idʌk akpekịppe ke ini ebenne ekpere edemeikañ. Ke ntoro awo ikidiọọñọke nte ndịbe adudu amọ ato.

10 Ndin Delaila amaabo Samsịn, "Afo amenam ami ndo ndisịme; afo amaasʌhọ nsu annọ miin. Idahami, ndọkkọ miin naña ekeme adubọp fiin."

11 Anye amaabo, "Adieke awo akeedodo ambọppọ miin nọ anekke asọñ ke mme ufa idʌk ake awo imiidatta ibọp ñkpọ akpa, ami ñyaakappa mmem kpa nte awodeen mfen."

12 Ndin Delaila amaadat mme ufa idʌk abọp anye. Akem, anye amaakoot mme ideen awo ekedịbeke ke ubeed, ate, "Samsịn, mbon Filistia eyaumʌm fiin!" Ado anye amaakịp mme idʌk ado asio ke ubọk amọ nte udʌk ukịm afọñ.

13 Akem Delaila amaabo Samsịn, "Awuọñọ ke afịd ini ami afo akesiñkama miin anam ndisịme anyʌñ asʌhọ nsu annọ miin. Ndọkkọ miin ndin naña ekeme adubọp fiin."

Samsịn amaabọọrọ, "Adieke afo adọkkọ ided iwuod mmi naña itiaba nte afọñ, akama abiaween amʌm anye yak asọñ, ami ñyaakappa mmem nte mme ideen mfen." Ndin ke ini anye akedaiyake, Delaila amaaben udọdọk ided itiaba ke iwuod amọ, adọk ammọ akịm adian ke afọñ 14 anyʌñ abọp anye awuuk abiaween.

Ini keed mfen anye amaakoot anye, "Samsịn, mbon Filistia eyaumʌm fiin!" Anye amaademme ke idab anyʌñ adʌt abiaween ye udọdọk ided, adiañña ye afọñ adịppe asio.

15 Ndin anye amaabo anye, "Afo anam die abo, ‘Ami mmuma fiin,’ ke ini afo umuutañña ndịbe ñkpọ unnọ miin? Ayọhọ akañ ita ado ami a-afo andatta miin anam ndisịme, unyʌññọ undọkkọ miin ndedịbe ñkpọ a-asịneke ke akpọsọñ adudu mfo." 16 Delaila amaakama akpọsọñ utañ ikọ ayịre anye ke usen ke usen tutu anye ikanna iyọ aba.

17 Ndin anye amaadọkkọ Delaila afịd ñkpọ, abo "Akenaanam akadañ ndomokeed idʌkkọ iwuod mmi, sia ami ndo Nasariin e-ekeyaaha enọ Abasi tọọñọ ke idịb eka mmi. Adieke efatta ided ke iwuod mmi, adudu mmi ayañkpọñ miin, ndin ami ñyaakappa mmem kpa nte awodeen mfen."

18 Ke ini Delaila akekịtte abo ke anye amaidọkkọ imọ afịd ñkpọ, anye amaadọñ utom anọ mme andikara Filistia, "Itịmme idi ini keed mfen; anye andọkkọ miin afịd ñkpọ." Ndin mme andikara Filistia emaetịmme edi ye akʌk ke ubọk ammọ. 19 Ke Delaila amaakenam Samsịn adaiya ke ifʌkkọ amọ, anye amaakoot awo yak adifat anye udọdọk ided itiaba amọ asioño, ndin inweek amọ amaatọọñọ asuuhọ. Ndin adudu amọ amaakpọñ anye.

20 Akem anye amaakoot, "Samsịn, mbon Filistia eyaumʌm fiin!"

Anye amaademme ke idab anyʌñ akere. "Ami ñyaawuọ ñkaa naña ñkesiwuọ ñnyʌñ mfiọnnọ mbọkkọ." Ado anye ikiidiọọñọke ke Abọọñ amaakpọñ anye.

21 Akem mbon Filistia emaemʌm anye, etʌññọ anye naña anyen iba enyʌñ eben anye ekaa Kasa. Emaebọp anye ke ñkpọnọ brọns, enyʌñ enam anye nọ asikọk ñkpasi ke ufọk ñkpakọb. 22 Ado ided ke iwuod amọ amaamaana atọọñọ atịppe ke emaekefat.

23 Ndin mme adaiwuod ke Filistia emaesoobo idem adiwa ekamba uwa nnọọ Dakọn abasi ammọ ñnyʌñ ndia idaara, ete, "Abasi ñnyịn amaayaak Samsịn, asua ñnyịn, isịn ñnyịn ke ubọk."

24 Ke ini mme awo ekekịtte Samsịn, ammọ emaetooro abasi ammọ, ete,

"Abasi ñnyịn a-ayaak asua ñnyịn

isịn ñnyịn ke ubọk,

anye a-abiada isọñ ñnyịn

anyʌñ anam ñkpañña ñnyịn atọt."

25 Ke ini ammọ ekebaaha ke ekamba inemesịd, ammọ emaesio ñkpo ete, "Iben Samsịn idi yak adibre mbre inọ ñnyịn." Ndin ammọ emaekoot Samsịn esio ke ufọk ñkpakọb, anye amaanyʌñ abre mbre anọ ammọ.

Ke ini ekedaahake anye ekpere mme abai, 26 Samsịn amaabo ayịnufọk a-akemʌmmọ anye ubọk, "Ndaaha miin ke itie se ndiikan ntuuk mme abai e-emʌmmọ tembịd ekama, nọ ami ñkeme adiibere ke ammọ." 27 Idaha ntoro, tembịd amaayọhọ ye ideen ye ibaan; afịd mme andikara Filistia emaeba do, ndin ke anyọñ akọm ufọk ñkpọ nte awo tọsịn ita (3,000) ideen ye ibaan emaetie ese naña Samsịn asio mbre. 28 Akem Samsịn amaabọñ akam Abọọñ, "Abọọñ Andikara, ntoiyo miin. Mbọk, Abasi, nnọ miin adudu kpa ini keed mfen, ndin yak ndat ubọketa keed nsio mbon Filistia usiene ke anyen mmi iba." 29 Akem Samsịn amaasaña akemuum mme abai iba ekedaaha ke ufọọd tembịd akama. Ke abenne idem amọ adian ke ammọ, ubọk nnasia amọ ke keed, ubọk ufiin ke anye ako, 30 Samsịn amaabo, "Yak ami ñkpa ye mbon Filistia!" Ndin anye amaanək ke afịd inweek amọ, ndin tembịd amaawuuro afʌk mme andikara ye afịd mbon awo se ikidọñọ ke esịd. Ntoro ke anye akewot mbon awo se iwak ke ini anye akekpaaha akan ke ayio uwem amọ.

31 Akem mme nditọeka amọ ye afịd ufọk ete amọ emaekaa ekeben anye. Ammọ emaeben anye enyọñ enyʌñ ekebuuk anye ke ufọọd Sora ye Estaol ke udi Manoa ete amọ. Anye amaadat* Isrel usʌñ ke isua edịb.