1 Yefta awo Kilied akedo uko ke ekọñ. Ete amọ akedo awo Kilied; eka amọ akedo akpara. 2 Anwaan Kilied amaanyʌñ aman nditọ ideen anọ anye, ndin ke ammọ emaekekpoon iwuọñọ, ammọ emaebịne Yefta esio. Ammọ emaebo anye "Afo uduunieghe udeeme akpa ke ufọk ñnyịn, sia afo ado ayịn awonwaan mfen." 3 Ndin Yefta amaafeghe akpọñ nditọete amọ anyʌñ akedʌñ ke isọñ Tob, ke itie a-mme atịme-atịme ibon ekedianake ye anye enyʌñ ekeene anye.

4 Ke ini amaakeboiyo, ke ini mbon Amọn ekenwanake ye Isrel, 5 mme ñkpisọñ ke Kilied emaekaa ekeyem Yefta ke isọñ Tob adinwana ye mbon Isrel. 6 Ammọ emaebo Yefta "Dido adaiso inọọ ñnyịn, mbaak ñnyịn ikeme adinwana ye mbon Amọn."

7 Yefta amaabo mme adaaha Kilied, "Nte ndufo ikiinsuaha miin inyʌñ imbịne miin isio ke ufọk ete mmi? Nsoo ido yak ndufo edi embịne miin idahami, ke ini ndufo ebaaha ke mfịna?"

8 Mme ñkpisọñ ke Kilied emaebo Yefta, "Kpayeado, ñnyịn imiitịmme ubịne fiin idahami, di nọ ñnyịn ikinwana ye mbon Amọn, ndin afo ayaado adaiwuod inọ ñnyịn se idʌñọ ke Kilied."

9 Yefta amaabọọrọ mme adaaha Kilied abo, "Ndufo ekpendat miin nọ ñkenwana ye mbon Amọn ndin Abọọñ ayaak ammọ ansịn miin ke ubọk, nte ke akpanikọ ami ñyaasʌk ndo adaiwuod ndufo?"

10 Mme ñkpisọñ abio Kilied emaebọọrọ Yefta ete, "Abọọñ ado ntiense ñnyịn; ñnyịn idiitreke adinam se afo atañ." 11 Ndin Yefta amaakeene mme ñkpisọñ Kilied, ndin ammọ emaenam anye ado adaiwuod ye adaiso ekọñ ammọ. Anye amaatịmme atañ afịd mme ikọ amọ ke iso Abọọñ ke Mispa.

12 Ndin Yefta amaadọñ mme isʌñutom anọ adidem mbon Amọn ye mbuume: "Nsoo utọk ke afo anie ye ami nọ afo anwana ye idịd mmi?"

13 Adidem mbon Amọn amaabọọrọ isʌñutom Yefta ate, "Ke ini Isrel ekewuọñọke ke Iyib edọọk edi, ammọ emaeben isọñ mmi ke Anọn tutu ke Yabọk, tutu akewuọ Yọdan. Idahami yaak anye nnọ miin ke emem."

14 Yefta amaatịmme adọñ mme isʌñutom anọ adidem mbon Amọn, 15 abo:

"Ami ado se Yefta abo: Isrel ikidatta isọñ Mọb me isọñ mbon Amọn. 16 Ado ke ini ammọ ekewuọñọke ke Iyib edọọk edi, Isrel ekesaña eboiyo ke anaan esịm ke Ndad-Ndad Akpainyañ enyʌñ ekaa Kades. 17 Ndin Isrel emaedọñ mme isʌñutom enọ adidem Edọm, ebo, ‘Inọ ñnyịn unen adisaña mboiyo ke idʌñ mfo,’ ado adidem Edọm ikiinyịmmeke. Ammọ emaenyʌñ edọñ enọ adidem Mọb, anye ñko ikinyịmmeke. Ndin Isrel emaesọñ eba ke Kades.

18 "Akema ammọ emaesaña eboiyo ke anaan, ekekanna eboiyo ke mben Edọm ye Mọb, eboiyo ke ñkañ edem usakkautịn idʌñ Mọb, enyʌñ enam itie nnaa ke edem Anọn ñkañ uko. Ammọ ikidʌkkọ idʌñ mbon Mọb, sia Anọn akedo adaña ammọ.

19 "Ndin nditọ Isrel emaedọñ isʌñutom enọ Sihọn adidem mbon Amọọ, a-akekarake ke Hesbọn, enyʌñ ebo anye, ‘Yak ñnyịn iboiyo ke idʌñ mfo ika itie ñnyịn,’ 20 Sihọn, naña akeba, ikiinieghe mbuọdidem ke nditọ Isrel adiboiyo ke idʌñ amọ. Ke ntoro anye amaakoot afịd udịmekọñ amọ abon anyʌñ anam nnaaekọñ ke Yahas, anyʌñ anwana ye Isrel.

21 "Ado Abọọñ, Abasi Isrel, amaaben Sihọn ye afịd mbon ekọñ amọ asịn ke ubọk Isrel, ammọ emaenyʌñ ekan ammọ. Ndin Isrel amaadat afịd isọñ mbon Amọọ ekedʌññọ ke idʌñ ado, 22 edat afịd isọñ mbon Amọọ tọọñọ ke Anọn tutu akesịm Yabọk anyʌñ ato ke anaan akesịm Yọdan.

23 "Idahami sia Abọọñ Abasi Isrel, abịne mbon Amọọ asioño ke iso ikọd amọ Isrel, nsoo utọ unen ke afo anie adiitịmme ndat anye? 24 Nte afo ukpuudatta se abasi mfo Kemos unọọ fiin? Ke ukem-ukem ado, se adodo A-Abọọñ Abasi ñnyịn inọọhọ ñnyịn, ana ñnyịn idat inie. 25 Nte aba usʌñ a-afo afọnnọ akan Balak ayịn Sipọọ, adidem Mọb? Nte akenaanam anye a-atọhọ ye Isrel me anwana ye ammọ? 26 Ke ufañ isua ikie ita (300) ake Isrel ekedʌñọ ke Hesbọn, Arowa, ñkanñkʌk etək idʌñ ye afịd mme abio ke usʌñ Anọn, ntak a-afo uduukutịmmeke udat ammọ ke ini ado-o? 27 Ami unamma fiin idiọọk, ado afo amennam miin idiọọk ke adiitịppe ekọñ ye ami. Yak Abọọñ, Akpeikpe, abiide utọk ke ufọọd mbon Isrel ye mbon Amọn mfịn ami."

28 Adidem mbon Amọn, kpayeado, ikiikpañña utọñ inọ etob a-Yefta akedọññọ anọ anye.

29 Ndin Sịbidịd Abọọñ amaadoro Yefta ke idem. Anye amaafrọ ke Kilied ye Manase, aboiyo ke Mispa ke Kilied, ndin ke itie ado anye amaabịmme abịne mbon Amọn. 30 Akem Yefta amaanam akaaña anọ Abọọñ anyʌñ abo: "Adieke afo uduuyaak mbon Amọn unsịn miin ke ubọk, 31 se idodo adiiwuọ ke usʌñ ufọk mmi idiisoobo ye ami ke ami mmaakekan mbon Amọn adiinie Abọọñ, ndin ñyaawa anye nte ufọfọb uwa."

32 Akem Yefta amaadakka akaa akenwana ye mbon Amọn, ndin Abọọñ amaayaak ammọ asịn anye ke ubọk. 33 Anye amaabiat abio edịb tọọñọ ke Aroe tutu akewuọ ñkanñkʌk Minịd, adat akesịm ke Ebeel Keramịm. Ntom ke Isrel akesuuhọ Amọn.

34 Ke ini Yefta aketịmmeke anyọñ ufọk amọ ke Mispa, adiaha amọ amaawuọ adiisoobo ye anye, asʌk anek unek ke uyio mme ñkukwak! Anye akedo ukweeñe ayịn amọ. Ke amaaboiyo ke anye, Yefta ikinieghe ayịn awodeen me awonwaan mfen. 35 Ke ini anye akekịtte anye, anye amaawai afọñidem amọ anyʌñ atua ayịd ate, "Sai, iyoo, adiaha mmi! Afo amensuuhọ miin itie anyʌñ ambuuñ miin. Ami mmaanam akaaña nnọ Abọọñ a-mmiidiikanna mbiat."

36 Anye amaabọọrọ, "Ete mmi, afo amaanọ Abọọñ ikọ mfo. Nam ye ami kpa naña afo akenwọñọ, sia Abọọñ amaakesio usiene ye mme asua mfo, kpa mbon Amọn." 37 Anye amaabo, "Ado nam ebeeñe keed ami nnọ miin. Nnọ miin afiọñ iba yak ñkesaaña ke mme abod ñnyʌñ ntua ye mme ufan mmi, sia tutu amama ami ndiidọọhọ ndọ."

38 Yefta amaabo, "Afo amekeme adika." Ndin amaayaak anye akaa ke ufañ afiọñ iba. Anye ye mme ufan amọ emaedakka ekaa ke anyọñ abod eketua sia anye idiidọọhọ ndọ tutu amama. 39 Ke afiọñ iba emaekeboiyo, anye amaatịmme anyọñ abịne ete amọ, ndin anye amaanam ye anye naña anye akekaaña. Ndin anye ikidiọọñọke awodeen.

Ido mbon Isrel aketọọñọ mi, 40 nte ke kwa isua, ana ubọikpa Isrel ewuọ ke usen inaañ eka ekedia usọrọ adiitoiyo ayịn awonwaan Yefta awo Kilied.