1 Akem afịd Isrel tọọñọ ke Daan tutu ke Beeseba ye ke isọñ Kilied emaedi ke itie keed enyʌñ eboho ke iso Abọọñ ke Mispa. 2 Mme adadusʌñ ke afịd esiin Isrel emaedat itie ammọ ke esob ikọd Abasi, awo tọsịn ikie inaañ (400,000) emaebọbọ mbọbọekọñ ye mme akañkañ. 3 (Mme ubon Benyamin emaekop ke mbon Isrel emaedọọk ekaa ke Mispa.) Akem mbon Isrel emaebo, "Idọkkọ ñnyịn naña ñkpọ ndịk ami aketịppe."

4 Ndin Lifai ado, ebe awonwaan e-ekewotto, amaabo, "Ami ye anwaan esa mmi ikidi ke Kibie ke Benyamin adina ke akonayio. 5 Ke akonayio ideen Kibie emaembịne miin enyʌñ ekanna ufọk ekʌk, eyem ediñwot miin. Ammọ emaenaa anwaan esa mmi ke ñkanubọk, tutu anye akpa. 6 Ami mmaaben anwaan esa mmi, mbak anye mbai-mbai ñnyʌñ mben mbai keedekeed nnọ esọk mme abio ke udeeme Isrel, sia ammọ ekenam ñkpọ asuenne ye mbubiam ñkpọ ami ke Isrel. 7 Idahami, afịd ndufo mbon Isrel, isio uyio indọkkọ miin item se ndufo ebiere edinam."

8 Afịd awo emaedaaña eda atọ keed ke uyio keed, ete, "Ñnyịn ndomokeed idiinyọññọ ufọk. Iyoo, ndomo awo keed ke atu ñnyịn idiinyọññọ ufọk amọ. 9 Ado idahami se ñnyịn idiinam Kibie ado ami: Ñnyịn iyaidọọk ikaa ikinwana ye anye ke naña ukañ abiide. 10 Ñnyịn iyaidat awo duob ke atu afịd ikie (100) ke afịd esiin Isrel, ye ikie keed (100) ke atu tọsịn keed (1,000), ye tọsịn keed (1,000) ke atu tọsịn duob (10,000), mbaak inie udia inọ mbon ekọñ. Amaakem, ke ini mbon ekọñ esịmme Kibie* ke Benyamin, anye ayaanọ ammọ se ammọ edot ke ñkpọ mbubiam ake ammọ enamma ke Isrel." 11 Ndin afịd mbon Isrel esoobo itie keed enyʌñ ediana keed enwana ye abio ado.

12 Mme esiin Isrel emaedọñ isʌñutom enọ afịd esiin Benyamin, ebo, "Nsoo utọ idiọọkñkpọ ndịk ke ekenam ami ke atu ndufo? 13 Idahami iyaak mbon ibak ami ke Kibie inọ ñnyịn nọ iwoot ammọ inyʌñ isioño idiọọkñkpọ ke Isrel."

Ado mme ubon Benyamin ikikpañña utọñ inọ emọ-emọ mbon Isrel ammọ. 14 Ubon Benyamin emaeto ke mme abio ammọ ediboho itie keed ke Kibie edinwana ye mbon Isrel. 15 Ini keed ini keed, ubon Benyamin emaemek mbon ukama akañkañ tọsịn edịb mme itiokeed (26,000) ke mme abio ammọ, edian ye mme akop idem ñkparawa ikie itiaba (700) ke atu mbon e-edʌñọke ke Kibie. 16 Ke atu afịd mbon ekọñ e-ekesioho, ikie itiaba (700) ekedoñño mme atufiin, ammọ keedekeed e-ekeme editop itiad etọ ided ba keed ifeppe.

17 Isrel, ke amaaboiyo Benyamin, ekebat mbon ukama akañkañ tọsịn ikie inaañ (400,000), afịd ammọ emaenie ukeme edinwana ekọñ.

18 Mbon Isrel emaedọọk ekaa ke Beteel* enyʌñ ekebịp Abasi. Ammọ ekebo, "Anie ke atu ñnyịn abiido akpa adidọọk ñkaa ñkenwana ye ubon Benyamin?"

Abọọñ amaabọọrọ abo, "Yuda ayaakaa akpa."

19 Ke ubakusen mbon Isrel emaedaaña eda enyʌñ enam nnaaekọñ ekpere Kibie. 20 Mbon Isrel emaewuọ ekaa edinwana ye ubon Benyamin enyʌñ edat itie ke iso ekọñ edinwana ammọ ke Kibie. 21 Mbon Benyamin emaewuọñọ ke Kibie ediwoot mbon Isrel tọsịn edịb mme iba (22,000) ke iso ekọñ ke usen ado. 22 Ado mbon Isrel emaenọ idem ammọ nsọọñọ idem ndin ini mfen etịmme edat itie ammọ ke itie a-ammọ e-ekedaahake idem ammọ akpa usen. 23 Mbon Isrel emaedakka edọọk ekaa ekeseeme ke iso Abọọñ tutu ndubiayio, ndin enyʌñ ebịp Abọọñ. Ammọ ekebo, "Nte ñnyịn itịmme idọọk ika ikinwana ye ubon Benyamin, emọ-emọ mbon Isrel ñnyịn?"

Abọọñ amaabọọrọ ammọ, "Idọọk ikaa ikinwana ye ammọ."

24 Akem mbon Isrel emaesịkke ekpere Benyamin ke ayọhọ usen iba. 25 Ini ami, ke ini ubon Benyamin ekewuọñọke ke Kibie edi edinam ikọ ye ammọ, ammọ emaewot mbon Isrel awo tọsịn duob mme itiaita (18,000) mfen, afịd ammọ ye akañkañ.

26 Akem afịd mbon Isrel, atu mbon ekọñ, emaedọọk ekaa ke Beteel, ndin ke itie ado ammọ emaesuuk etie eseeme ke iso Abọọñ. Ammọ emaetie utreudia ke afịd usen ado tutu ndubiayio enyʌñ enam ufọfọb uwa ye uwa ewuana enọ Abọọñ. 27 Ndin mbon Isrel emaebịp Abọọñ (Ke mme usen ado akebe edioomo Abasi mmọdo akeba, 28 ye Finehas ayịn Eliasa, ayịn Erọn, akesʌkkọ anam ñkpọ ke iso amọ.) Ammọ emaebịp, "Nte ñnyịn itịmme idọọk ika ikinwana ye ubon Benyamin, emọ-emọ mbon Isrel ñnyịn, mme ikuukaa?"

Abọọñ amaabọọrọ ate, "Ikaa, sia ñkpọñ ami ñyaayaak ammọ isịn ke ubọk."

29 Akem mbon Isrel emaenam nnaaekọñ ke ikọd ekanna Kibie ekʌk. 30 Mbon Isrel emaedakka edọọk ekaa ekenwana ye ubon Benyamin ke ayọhọ usen ita enyʌñ edat itie ammọ edinwana ye Kibie naña ekenam akpa. 31 Mme ubon Benyamin emaewuọ edi adisoobo ye ammọ ndin mbon Isrel emaedʌt ammọ ewuọ ekpọñ abio. Ammọ emaetọọñọ ediwoot mbon Isrel naña ekenam ke mme usen edem, ndin awo nte edịb mme duob emaekpañña ke usʌñ, ke akpọusʌñ a-akaaha Beteel mfen akaa Kibie. 32 Ke ini ubon Benyamin ekebooho, "Ñnyịn iyaikan ammọ nte ini akpa," mbon Isrel ekesʌk ebo "Iyak ñnyịn itịmme edem inyʌñ idʌt ammọ iwuọ ke abio ika ke mme akpọusʌñ."

33 Afịd mbon Isrel emaedakka ekpọñ itie ammọ enyʌñ ekedat mme itie ke Baal Tama, ndin mbon Isrel e-ekenaaha ke ikọd emaewuọ ekpọñ itie ammọ ke edem usobutịn Kibie.* 34 Akem tọsịn duob (10,000) mme anie ukeme ñkparawa Isrel emaewuọ ekaa iso ekenwana ye Kibie. Anwan ado amaasọñ tutu ubon Benyamin ikidiọọñọke ke nsobo anekke akpere. 35 Abọọñ amaakan Benyamin ke iso Isrel, ndin ke usen ado mbon Isrel emaewot awo tọsịn edịb mme ition ye ikie keed (25,100) ke ubon Benyamin, afịd emaebọbọ akañkañ ekọñ. 36 Ndin mme ubon Benyamin emaekịt ke ekan mmimọ.

Akem mbon Isrel emaeyaak ufañ enọ Benyamin, sia ammọ ekedot anyen ke mbon a-ammọ ekenịmme nọ edịbe ke ikọd ekpere Kibie. 37 Mbon e-ekedịbeke ke ikọd emaewịppe ewuọ edọñọ Kibie, esuana enyʌñ edọñọ abio ndin emaewot afịd awo ke akañkañ. 38 Mbon Isrel emaedioomo ye mbon e-ekedịbeke ke ikọd ke ana nte ammọ enam ekamba ntuhube nsʌñikañ awuọ adọọk ke abio, 39 ndin amaakem mbon Isrel eyaebọọrọ ke anwan.

Ubon Benyamin emaetọọñọ ediwoot mbon Isrel (ñkpọ nte edịb mme duob), ndin ammọ emaebo, "Ñnyịn iyaikan ammọ kpa naña akedo ke akpa ekọñ." 40 Ado ke ini eboho nsʌñikañ aketọọñọke adakka awuọ ke abio, ubon Benyamin emaekanna enyʌñ ekịt afịd abio naña adọọk anyọñ ke nsʌñikañ. 41 Akem mbon Isrel emaebọọrọ ke anwan, ndin ubon Benyamin emaekop ekamba ndịk, sia ammọ emaediọọñọ ke nsobo amaadisịm mmimọ. 42 Ndin ammọ emaefeeñe ke iso mbon Isrel ekaa ke ñkañ anaan, ado ammọ ikikanna ibọkkọ ekọñ ado. Ndin mbon Isrel e-ekewuọñọke ke abio edi emaekpeeñe ammọ do. 43 Ammọ emaekanna ubon Benyamin ekʌk, ebịne ammọ ikinyʌññọ isọsọñ ammọ adikan ammọ ubọk ke nsakiso Kibie ke edem usakkautịn. 44 Mbon ubon Benyamin awo tọsịn duob mme itiaita (18,000) ekeduọññọ, afịd ammọ ekedo mbon uko ke ekọñ. 45 Naña ammọ ekekanna iso efeeñe ekaa ke anaan ke itiad Rimọn, mbon Isrel emaekpeeñe awo tọsịn ition (5,000) eboon ke mben usʌñ. Ammọ esọọñọ efiik ubon Benyamin tutu ekesịm ke Kidọm enyʌñ emaana ewoot awo tọsịn iba (2,000) edian.

46 Ke usen ado mbon ukama akañkañ Benyamin awo tọsịn edịb mme ition (25,000) ekeduọññọ, afịd ammọ ekedo mbon uko ke ekọñ. 47 Ado awo ikie itiokeed (600) emaekanna iso efeeñe ekaa anaan ke itiad Rimọn, itie ake ammọ ekedʌññọ ke afiọñ inaañ. 48 Mbon Isrel emaetịmme ekaa Benyamin enyʌñ ekesịn akañkañ ke afịd mme abio, ye mme unam ye afịd ñkpọ mfen ammọ ekekịtte. Afịd mme abio a-ammọ ekesañake, ammọ emaekịm ikañ esịn.