1 Ndin mbon Ifrem emaebịp Kidiọn, "Ntak a-afo anamma ntom ye ñnyịn-e? Nsoo ido nọ afo uduukukoodo ñnyịn ke ini afo akekaaha ekọñ ye Midian?" Ndin ammọ emaetañ ikọ ñnyanubọk ye anye adudu-adudu.

2 Ado anye amaabọọrọ ammọ ate, "Nsoo ke ami nnie ekemekke ediben ndomo ye ndufo? Nte aditañ kreb ke Ifrem ifọnnọ ikan ayọhọ idọk kreb Abiesa? 3 Abasi amaaben Ọreb ye Seeb, mme adaiwuod Midian, isịn ndufo ke ubọk. Nsoo ke ami ñkekan adinam e-ekpedatta edomo ye ndufo?" Ke ami, iyadesịd ammọ ye anye amaasuuhọ.

4 Kidiọn ye ideen amọ awo ikie ita (300) ami, i-inweek amaakekweeñe emaeka iso ebịne ediwuọ Yọdan enyʌñ eboiyo anye. 5 Anye amaabo mbon Sukọd ate, "Inọ udịmekọñ mmi uyo, sia idem amem ammọ, ndin ami nsʌk mbebịne Seba ye Salmuna, mme ndidem Midian."

6 Ado mme adaaha ke Sukọd emaebo anye, "Nte afo amemọmʌm Seba ye Salmuna kaña? Ntak añnyịn ikpinọọhọ mme udịmekọñ mfo uyo-o?"

7 Akem Kidiọn amaabọọrọ, "Sia adooho ntoro, Abọọñ amaayaak Seba ye Salmuna ansịn miin ke ubọk, ami ñyaawai abʌkidem ndufo ke ñkukịm ye mbaraekpe akpautatan."

8 Anye amaato do adakka akaa Peniel anyʌñ akenam ukem ebeeñe ado, ado mbon ado emaebọọrọ kpa naña mbon Sukọd ekebọọrọ. 9 Ndin anye amaabọọrọ mbon Peniel abo, "Ami mmaakan ntịme ñnyọñ ndi, ñyaawuut tọwa ami."

10 Idaha ado Seba ye Salmuna mmọdo ekeba ke Kakọ ye mbon ekọñ ekewakka ñkpọ nte awo tọsịn duob mme ition (15,000), afịd se ikisʌhọ ke atu mbon ekọñ ake edem usakkautịn; mbon ukama akañkañ tọsịn ikie keed mme edịb (120,000) emaeduọññọ. 11 Kidiọn amaadakka adọọk ke usʌñ mbon ukpeme enañ ke edem usakkautịn Noba ye Yokbeha anyʌñ akenwana ekọñ ye mbon ekọñ i-imiikinieghe idodanyen. 12 Seba ye Salmuna, mme ndidem Midian iba ado, emaefeeñe, ado anye amaabịne ammọ anyʌñ amuum ammọ, asuan afịd mbon ekọñ ammọ.

13 Akem Kidiọn ayịn Yoas amaasaña usʌñ a-aboiyoke Paas Heres anyọñ ekọñ. 14 Anye amaamʌm akparawa keed ke Sukọd anyʌñ abịp anye mbuume, ndin akparawa ado amaawet anyịñ mme adaaha ata mme duob mme itiaba ekedooho mme ñkpisọñ ke Sukọd anọ anye. 15 Akem Kidiọn amaadi anyʌñ adibo mbon Sukọd, "Se Seba ye Salmuna, a-ndufo ekennọọhọ ñnyọọ ebo, ‘Nte afo amemọmʌm Seba ye Salmuna kaña? Ntak añnyịn ikpinọọhọ udịmekọñ mfo e-ekoppo mmemidem uyo-o?’ " 16 Anye amaaben mme ñkpisọñ abio ado anọ ideen Sukọd ukpeebñkpọ ke adimia ammọ ufen ke ñkukịm ye mbaraekpe akpautatan. 17 Anye ñko amaanyʌñ awuut tọwa ke Peniel anyʌñ awot mbon abio ado.

18 Akem anye amaabịp Seba ye Salmuna, "Nsoo utọ ideen ke ndufo ekewot ke Tabọ?"

Ammọ emaebọọrọ ete, "Ideen nte afo, ammọ keedekeed ekeba nte nditọ ideen mbọọñ."

19 Kidiọn amaabọọrọ, "Ammọ ekedo nditọeka mmi, mme nditọ ideen eka mmi. Kpa nte Abọọñ aduuho uwem, adieke ndufo ekpekesaanake uwem ammọ eyaak, ami ñkpiwotto ndufo." 20 Ke adikanna iso nse Yeta, akpan amọ, anye amaabo, "Wot ammọ!" Ado Yeta ikiidʌttọ akañkañ amọ isio, sia anye akedo etəkayịn, ndịk amaanyʌñ amʌm anye.

21 Seba ye Salmuna emaebo anye, "Di, nam ke idem mfo. ‘Naña awo aba, kpa ntoro ke adudu amọ aba.’ " Ndin Kidiọn amaawuọ adi anyʌñ awoot ammọ, anyʌñ akọññọ mme ñkpọ mbanaidem ke itọñ kamel ammọ.

22 Mbon Isrel emaebo Kidiọn, "Ikara ñnyịn: afo, ayịn awodeen mfo ye ayeyịn awodeen mfo sia afo amainyaaña ñnyịn asio ke ubọk mbon Midian."

23 Ado Kidiọn amaabọọrọ ammọ abo, "Ami ndiikarake ndufo, ayịn mmi idiinyʌññọ ikara ndufo. Abọọñ adiikara ndufo." 24 Ndin Kidiọn amaabo, "Ami mmenie ebeeñe keed, yak ndufo keedekeed ennọ miin ñkpahautọñ ke atu udeeme mbịme ndufo." (Akedo ido mbon Ismeel adisịne ñkpahautọñ kold.)

25 Ammọ emaebọọrọ ete, "Ñnyịn iyainọ ammọ ke inemesịd." Ndin ammọ emaebịt afọñ, ammọ keedekeed enyʌñ etop ñkpannuun kold ke atu mbịme amọ edoot. 26 Udob ñkpannuun kold a-anye akebeeñeke amaasịm sekel ikie efịd aba (1,700). Awo ikibatta ñkpọ mbanaidem, ukọkọñọ ñkpọ ye iduod-iduod adisịne ñkpọ a-mme ndidem Midian ekesịneke ye mme ñkpọitọñ ekesikọọñọ mme kamel ammọ ke itọñ. 27 Kidiọn amaadat mme kold ami anam afọñ aboditọñ, a-anye akenịmme ke Ọfra, abio amọ. Afịd Isrel emaenam akpara ke adikpono ñkpọ ado, ndin anye amaanyʌñ akappa ado afia anọ Kidiọn ye ufọk amọ.

28 Ntom ke ekenam Midian asuuk iwuod anọ mbon Isrel inyʌññọ idịppe iwuod aba. Ke ayio uwem Kidiọn, isọñ amaanie emem isua aba.

29 Yerub-Baal ayịn Yoas amaanyọñ idʌñ amọ akedʌñ. 30 Kidiọn ke idem amọ akenie nditọ ideen ata mme duob, sia anye amaadọ uwak ibaan. 31 Anwaan esa amọ, a-akedʌññọ ke Sekem, amaanyʌñ aman ayịn awodeen anọ anye, ndin anye amaasio ayịn ado Abimelek. 32 Kidiọn ayịn Yoas amaakpa ke ataa eti isua usọñ enyʌñ ebuuk anye ke udi ete amọ Yoas ke Ọfra ake Abiesa.

33 I-ikpeeneke Kidiọn akekpa ndin mbon Isrel emaetịmme esaña akpara ke adinam ñkpọ nnọọ Baal. Ammọ emaewuuk Baal-Berịd nte abasi ammọ, 34 ndin nditọ Isrel ikiitoiyoke Abọọñ Abasi ammọ, a-akesioho ammọ ke ubọk afịd mme asua ammọ ke afịd usʌñ. 35 Nditọ Isrel ñko emaetre edisuuk iwuod nnọọ ufọk Yerub-Baal (a-adooho Kidiọn) akpesʌkado nte anye akewaaha idem anam mme nti ñkpọ anọ ammọ.