1 Mbon ami ado mme idịd se Abọọñ akekpọñ nọ edomo afịd mbon Isrel imiikinieghe ifiọk ibaña mme ekọñ ke Kenan 2 (anye akenam ami adikpeep mbon ubon Isrel i-imiikinieghe ifiọk ibaña ekọñ naña ekeme adinwana ekọñ): 3 Mme andikara ition ke Filistia, afịd mbon Kenan, mbon Sidọn, ye mbon Hif e-ekedʌñọke ke mme abod Lebanọn eto ke abod Baal Hemọn ekaa ke Lebo Hamad. 4 Ekekpọñ ammọ nọ edomo mbon Isrel ese me ammọ eyaesuuk iwuod enọ mme mbed Abọọñ, a-anye akenọọhọ mme eteete ammọ ke ubọk Moses.

5 Mbon Isrel ekedʌñọ ke atu mbon Kenan, mbon Hed, Amọọ, Peris, mbon Hif ye mbon Yebus. 6 Ammọ emaekoono nditọ ibaan ammọ edọ enyʌñ eben nditọ ibaan ammọ enọ nditọ ideen ammọ, enyʌñ enam ñkpọ enọ mme abasi ammọ.

7 Mbon Isrel emaenam idiọọkñkpọ ke iso Abọọñ; ammọ emaefre Abọọñ Abasi ammọ enyʌñ enam ñkpọ enọ mme Baal ye mme Asera. 8 Iyadesịd Abọọñ amaasak nte ikañ abaña Isrel ndin anye amaanyam ammọ asịn ke ubọk Kusan-Risataim adidem ke Aram Naharaim,* a-mbon Isrel ekesịneke ke idak enam ñkpọ enọ ke isua itiaita. 9 Ado ke ini ammọ eketuaha ekoot Abọọñ, anye amaasio andinyaaña anọ mbon Isrel, Otniel ayịn Kenas, etək ayịneka awodeen Kaleb, a-akenyaañake ammọ. 10 Sịbidịd Abọọñ amaadoro anye ke idem, ndin anye amaakappa ado abiideikpe* ke Isrel anyʌñ akaa ekọñ. Abọọñ amaaben Kusan-Risataim adidem ke Aram asịn ke ubọk Otniel, a-akekanna anye. 11 Ndin isọñ amaanie emem ke isua aba, tutu Otniel ayịn Kenas akpa.

12 Ini keed mfen mbon Isrel emaetịmme enam idiọọkñkpọ ke iso Abọọñ, ndin ke ntak a-ammọ ekenamma idiọọkñkpọ ami Abọọñ amaanọ Eklọn adidem ke Mọb adudu adikan Isrel. 13 Eklọn amaanam mbon Amọn ye mbon Amalek nọ ediana ye anye, ediinwana ye Isrel, enyʌñ eben Abio Ayob* enie. 14 Mbon Isrel emaesịne ke idak Eklọn adidem Mọb enam ñkpọ enọ ke isua duob mme itiaita.

15 Ini keed mfen mbon Isrel emaetua enọ Abọọñ, anye amaanyʌñ anọ ammọ andinyaaña, Ehud, atufiin, ayịn Kera aketooho ubon Benyamin. Mbon Isrel emaedọñ anye aben utịb ammọ adat asọk Eklọn adidem Mọb. 16 Ndin Ehud amaanam akañkañ anie iso iba a-akedooho ñkpọ nte kubid keed* ke unyọọñ, a-anye akebọppọ adian ke ifʌkkọ nnasia ke idak afọñ ammọ. 17 Anye amaaben etob akaa akenọ Eklọn adidem Mọb, a-akedooho ataa akponubom awo. 18 Ke Ehud amaakenọ utịb ado, anye amaasio mbon se ikiben utịb ado idi unyọñ. 19 Ado ke anye amaakewuọ itie mme ubobod itiad a-akpereke Kilkal anye ke idem amọ amaatịmme edem abịne Eklọn anyʌñ akebo anye, "Ke Ukpono Adidem, ami mmenie ndedịbe etob adunọọ fiin."

Ndin adidem amaabo nditọufọk amọ, "Inọ ñnyịn ufañ!" Ndin afịd ammọ emaewuọñọ.

20 Akema Ehud amaasaña akpere anye ke ini anye aketieghe ikpọọñ ke esịd ubeed ke anyọñ ebekpo amọ anyʌñ abo anye, "Ami mmenie etob a-atooho Abasi unọ fiin." 21 Ehud amaanyan ubọk ufiin amọ, adʌt akañkañ ke ifʌkkọ nnasia amọ anyʌñ akịm idịb adidem. 22 Ukeed itoikwa ye isoikwa emaetịkke edʌk anye idịb, ndin ekpa amọ amaawuọñọ. Ehud ikidʌttọ akañkañ ado isio, ndin akpọñ amaafʌk akañkañ. 23 Akema Ehud amaawuọ adi ke nsañandʌk ufọk, abet mme usʌñ ubeed anyọñ anyʌñ ayịt ammọ.

24 Ke anye amaakenyọñ, nditọufọk emaedi enyʌñ edikịt usʌñ ubeed nte ayeyịre. Ammọ emaebo, "Ana ado anye akeñ idem ke esịd ubeed ufọk adidem." 25 Ammọ emaebet tutu awuọ ini idem akebọkkọke ammọ, ado ke ini anye imiikiibeereke usʌñ ubeed, ammọ emaeben ñyịn ukpọhọde etat mme usʌñ ado. Ke ndo ke ammọ ekekịt abọọñ ammọ nte amaakeduọ ana ke isọñ akpa.

26 Ke ini ammọ ekesʌkkọ ebet do, Ehud amaawuọ anyọñ. Anye amaasaña abọhọ mme ubobod itiad anyʌñ afeghe anyọñ Seira. 27 Anye akekewuọ udo, anye amaafịt adukpoñ ke abod-abod abio Ifrem, ndin mbon Isrel emaesọiyọ ye anye eto ke mme abod, ke ini anye akeboiyoke iso anọ ammọ.

28 Anye amaanọ uyio ate, "Iñkeene miin, sia Abọọñ a-aben Mọb, asua ndufo, isịn ndufo ke ubọk." Ndin ammọ emaekeene anye esọiyọ enyʌñ ekeben itịkke Yọdan a-akesañake adʌk Mọb edat enie; ammọ ikiyakka awo ndomokeed afrọ aboiyo. 29 Ke ini ado ammọ emaewot mbon Mọb ñkpọ nte tọsịn duob (10,000), afịd ekedo mbon adudu ye ñkpọsọñ awo; ndomo awo keed ikibọkkọke. 30 Tọọñọ ke usen ado emaenam Mọb asịne ke idak Isrel, ndin isọñ anie emem ke isua anaañ.

31 Ke Ehud amaakema, Samka ayịn Anad amaawoot mbon Filistia ikie itiokeed (600) ke ikwa uwodenañ. Anye ñko amaanyaaña Isrel.