1 Akem enyere Abọọñ amaadakka ke Kilkal adọọk akaa ke Bokịm anyʌñ akebo, "Ami ñkisịññe ndufo ke Iyib ñnyʌñ idat ndufo ndisịn ke isọñ a-ami ñkenwọñọke adinọ mme eteete ndufo. Ami ñkebo, ‘Tutu amama, ami ndiibiatta edioomo mmi ye ndufo, 2 ndin inaaha nte ndufo enam edioomo ye mbon idʌñ ami, ado ana ndufo ewuut mme akpokoro uwa ammọ.’ Ado ndufo emaetre utọñ ye ami. Ntak a-ndufo enamma ntom-o? 3 Ndin ami mmaanyʌñ mbo, ‘Ami ndiibịneke ammọ nsio ke iso ndufo; ammọ eyaedoñño afia inọ ndufo, mme abasi ammọ eyaenyʌñ edoñño mfịna inọ ndufo.’ "

4 Ke ini enyere Abọọñ amaaketañ mme ñkpọ ami anọ afịd mbon Isrel, ammọ emaebenne uyio etua ayịd, 5 ndin ammọ emaekoot itie ado Bokịm.* Ke itie ado ammọ emaewa uwa enọ Abọọñ.

6 Ke Yọsua amaakesuan mbon Isrel, ammọ emaedakka ekaa adikidat isọñ ado nnie, ammọ keedekeed emaekaa itie udeeme ammọ. 7 Mbon ami emaenam ñkpọ enọ Abọọñ ke afịd ayio uwem Yọsua ye ake mme ñkpisọñ e-ekekpeeneke uwem ekan anye e-ekenyʌññọ ekiit afịd ikpọ ñkpọ se Abọọñ akenam anọ Isrel.

8 Yọsua ayịn Nọn, ayịnufọk Abọọñ, amaakpa ke ini anye akesọññọ isua ikie mme duob. 9 Ndin ammọ emaebuuk anye ke udeeme isọñ ammọ, ke Timnad Heres* ke abio abod-abod ke Ifrem, anyọñ-anyọñ ukañ abod Kaas.

10 Ke afịd emana ado emaekebọ nduọkadudu ye mme eteete ammọ, emana mfen amaatịppe a-mmiikidiọọñọke Abọọñ me se anye akenam anọ Isrel. 11 Akema nditọ Isrel emaenam idiọọkñkpọ ke iso Abọọñ emaenyʌñ ekpono mme Baal. 12 Ammọ emaesịn Abọọñ, Abasi mme eteete ammọ, a-akesioho ammọ ke Iyib. Ammọ emaekeene enyʌñ ekpono nsio-nsio abasi mbon e-ekannake ammọ ekʌk. Ammọ ndin emaedemme iyadesịd Abọọñ 13 sia ammọ ekesịnne Abọọñ enyʌñ enam ñkpọ enọ Baal ye mme Astọred. 14 Ke iyadesịd ami ye Isrel Abọọñ amaayaak ammọ asịn ke ubọk mbon mbịme e-ekesuanna ammọ. Anye amaanyam ammọ asịn ke ubọk mme asua ke afịd ñkanñkʌk, a-ammọ imiikidikanna aba ke anwan. 15 Ini keed akeedodo Isrel akekaaha anwan, ubọk Abọọñ ikibaaha ye ammọ ndin emaekan ammọ, kpa naña anye akenwọñọ anọ ammọ. Ammọ ekeba ke ekamba mfiomo.

16 Akema Abọọñ amaasio mme abiideikpe,* e-ekenyaañake ammọ esio ke ubọk mbon mbịme. 17 Ado ammọ ikikpañña utọñ inọ mme abiideikpe ami, utu ke ado ammọ emaenam akpara ye mme isen abasi enyʌñ ekpono ammọ. Ammọ emaesọsọp ewọññọ iso ekpọñ usʌñ mme eteete ammọ, e-ekesuuhọ iwuod enọ ewʌhọ Abọọñ. 18 Ini keed akeedodo Abọọñ akesioho abiideikpe anọ ammọ, anye amaaba ye abiideikpe ado anyʌñ anyaaña ammọ asio ke ubọk mme asua adaña nte abiideikpe ado aduuho uwem, sia Abọọñ ikiduọkkọ adudu ke ntak aseeme ammọ ke idak mbon e-ekefiighe e-ekenyʌññọ esịn ammọ ke ukuud. 19 Ado abiideikpe ado amaakpa, mbon awo emaetịmme ekaa mme usʌñ a-akenekkeke adiọọk akan ake mme eteete ammọ, ke adikeene mme abasi mfen ñnyʌñ nnam ñkpọ nnọọ ammọ, ñnyʌñ ñkpono ammọ. Ammọ emaesịn edisaana mme ndiọi adinam ye nsọñiwuod ammọ ñyaak.

20 Ndin Abọọñ amaayat esịd ataa eti-eti ye Isrel anyʌñ abo, "Sia idịd ami emaebiat edioomo a-ami ñke anamma nnọ mme eteete ammọ ndin inyʌññọ ikpañ utọñ innọ miin, 21 ami ndiibịneke aba mme idịd ake Yọsua akekpaaha akpọñ nsịññe ke iso ammọ. 22 Ami ñyaadat ammọ ndomo Isrel idomo nse me ammọ eyaekeene usʌñ Abọọñ enyʌñ esaña ke anye kpa naña mme eteete ammọ ekenam." 23 Abọọñ amaayaak mme idịd ado esʌhọ; anye ikibịneke ammọ isịññe ini keed ke adiyaak ammọ nsịn ke ubọk Yọsua.