1 Abimelek ayịn Yerub-Baal amaadakka akaa abịne nditọeka eka amọ ke Sekem anyʌñ akebo ammọ ye afịd ubon eka amọ ate, 2 "Ibịp afịd mme amanaisọñ Sekem, ‘Anye akee ifọn ikan ye ndufo: adiyak afịd nditọ ideen Yerub-Baal ata mme duob ikara ndufo, me awo keed adikara?’ Itoiyo ke ami ndo abʌk ye iyiib ndufo."

3 Ke ini nditọeka amọ ideen eketañña afịd ami enọ mme amanaisọñ Sekem, ammọ emaenyịmme edikeene Abimelek, sia ammọ ekebo, "Anye awuana ñkpọ ye ñnyịn." 4 Ammọ emaenọ anye sekel silfa ata mme duob (70) e-ekedatta eto tembịd Baal-Berịd, ndin Abimelek amaadat ami akpe mbon ntịme ye mbon mbubịk, e-ekekappake edo mme nsaña amọ. 5 Anye amaakaa ufọk ete amọ ke Ọfra ndin ke anyọñ itiad keed anye amaawot afịd nditọete amọ awo ata mme duob, nditọ Yerub-Baal. Ado Yọtam, akpatre ayịn Yerub-Baal, amaabọkkọ afeghe akedịbe. 6 Akem afịd mme amanaisọñ Sekem ye Bed Milo emaebono ke idak ekamba eto ke adaaha Sekem adinam Abimelek adidem.

7 Ke ini ekedọkkọke Yọtam ebaña ñkpọ ami, anye amaadọọk aka ke iwuod Abod Kerisịm akebọñ ñkpo akoot ammọ abo, "Ikpañ utọñ innọ miin, mme amanaisọñ Sekem, mbaak Abasi ñko akpañ utọñ inọ ndufo. 8 Usen keed mme eto emaewuọ ekaa adiyet abọọñ adan nnọọ idem ammọ. Ammọ emaebo eto ọlif, ‘Do adidem ñnyịn.’

9 "Ado eto ọlif amaabọọrọ, ‘Nte a-afọn ami adikpọñ adan mmi, e-edatta ekpono mme abasi ye mme awo ñke kaara ke atu mme eto?’

10 "Mfen, mme eto emaebo eto fik, ‘Di do adidem ñnyịn.’

11 "Ado eto fik amaabọọrọ, ‘Nte a-afọn ami adikpọñ mfịd mmi, a-afọnnọ anyʌñ anem eti-eti, ndida ukara nnọ mme eto?’

12 "Akem mme eto emaebo fain, ‘Di do adidem ñnyịn.’

13 "Ado eto fain amaabọọrọ, ‘Nte a-afọn ami adikpọñ ukọd mmi, a-anọọhọ mme abasi ye mme awo inemesịd, ñke kaara ke atu mme eto?’

14 "Ke akpatre afịd mme eto emaebo mbaraekpe, ‘Di nyʌñ do adidem ñnyịn.’

15 "Mbaraekpe amaabo mme eto, ‘Adieke ke akpanikọ ndufo enekkeke eyem ediñyet miin adan nte adidem ndufo, idi inyʌñ idi idịbe ke idak mfuud mmi; ado adieke imiimaaha, yak ikañ awuọ ke mbaraekpe anyʌñ ata mme eto sida ke Lebanọn!’

16 "Nte ndufo emenam ami ke ido ukpono ye ke akpanikọ ke edinam Abimelek adidem? Nte ndufo emenam yak anen ye Yerub-Baal ye ufọk amọ? Nte ndufo emenam naña akpedot nọ enam ye anye? 17 Itoiyo ke ete mmi akenwana ekọñ inọọ ndufo anyʌñ aduọọk uwem amọ mbaak inyaaña ndufo asio ke ubọk Midian. 18 Ado mfịn ami ndufo emedakka eda enwana ye ufọk ete mmi. Ndufo emaewot nditọ amọ ata mme duob ke anyọñ itiad keed e-enyʌñ enam Abimelek, ayịn ifʌn awonwaan amọ ado adidem anọ mme amanaisọñ Sekem sia anye awuana ñkpọ ye ndufo. 19 Nte ndufo ekenam ami ke ido ukpono ye ke akpanikọ enọ Yerub-Baal ye ufọk amọ? Adieke akedoho ntoro, yak Abimelek ado idaara ndufo, ndufo ñko enyʌñ edo idaara amọ! 20 Ado adieke ndufo imiikinamma ado, yak ikañ awuọ ke Abimelek ita ndufo, mbọọñ ye mme amanaisọñ Sekem ye Bed Milo, yak ikañ anyʌñ awuọ ke ndufo, mme amanaisọñ Sekem ye Bed Milo, ata Abimelek."

21 Akem Yọtam amaafeghe akaa Bee akedʌñ ke udo sia anye amaakop ndịk abaña ayịnete amọ Abimelek.

22 Ke Abimelek amaakekara Isrel isua ita, 23 Abasi amaasịn usua ke ufọọd Abimelek ye mme amanaisọñ Sekem ndin ammọ emaenam abiaña ye Abimelek. 24 Abasi akenam ami nọ ato do aben idiọọk e-ekenamma nditọ Yerub-Baal ata mme duob (70) ke adiduọk iyiib ammọ, asio ayịneka ammọ Abimelek usiene ye mme amanaisọñ Sekem e-ekenwamma anye adiwoot nditọete amọ. 25 Ke ediwọt nsọñiwuod ye anye, mme amanaisọñ ideen Sekem emaesịn mme awo ke iwuod abod ke ikọd enyʌñ emuum mme awo emaana eyiip ñkpọ mbon awo se ikisaña ke usʌñ ado, ndin emaeben ami eketañ enọ Abimelek.

26 Ndin Kaal, ayịn awodeen Ebed, amaakaa akedʌñ ke Sekem ye ekpək amọ, ndin mme amanaisọñ ado emaenie mbuọdidem ke idem amọ. 27 Ke ammọ emaekewuọ eka inwañ fain enyʌñ ebok mme mfịd kreb, efiik ammọ, ammọ emaenam usọrọ ke tembịd abasi ammọ. Ke ini ammọ ekesʌkkọ edia enyʌñ enwọñ ñkpọ, ammọ emaesuuñọ Abimelek. 28 Akem Kaal ayịn Ebed amaabo, "Anie awo ado Abimelek, ntak añnyịn mbon Sekem ikpi isịneke ke idak amọ-ọ? Idooho anye ado ayịn Yerub-Baal, ndin idooho Sebuul ado udiana amọ? Inam ñkpọ inọ ufọk Hamọọ, ete Sekem! Ntak añnyịn ikpi inamma ñkpọ inọọ Abimelek-e? 29 Ubaha akpedooho ibon ami ekesịne ke idak ewʌhọ mmi! Ndin ami ñkpaadooro anye nsio. Ñkpaabo Abimelek, ‘Koot afịd mbon ekọñ mfo ewuọ edi!’ "

30 Ke ini Sebuul adaiwuod ukara abio ado akekoppo se Kaal ayịn Ebed aketañ, anye amaayat esịd eti-eti. 31 Anye amaadọñ mme isʌñutom anọ Abimelek ke ndịbe, abo "Kaal ayịn Ebed ye ekpək amọ emaedi ke Sekem enyʌñ etịmede abio ubaña fiin. 32 Ndin idahami, ama ado ke akonayio afo ye mbon mfo enie ediwuọ ñkedịbe ke ikọd. 33 Ke ndañ nsiere ke usakkautịn, idọọk abio inam ekọñ. Kaal ye mbon amọ emaewuọñọ edi ekọñ ye afo, dat ufañ ado wot ammọ."

34 Ndin Abimelek ye afịd udịmekọñ amọ emaewuọ ke akonayio enyʌñ ekedịbe itie a-akpereke Sekem ke ikpeghe inaañ. 35 Idaha ntoro Kaal ayịn Ebed amaawuọ akeda ke inua atob abio kpa ke ini Abimelek ye udịmekọñ amọ ekewuọñọke ke itie udịbe ammọ.

36 Ke ini Kaal akekịtte ammọ, anye amaabo Sebuul, "Se, mme awo esʌk esọiyọ ke mme abod edi!"

Sebuul amaanyʌñ abọọrọ, "Afo anam ndudue ke adikịt ndukpọñ abod nte mme awo."

37 Ado Kaal amaamaana abenne uyio abo, "Se, mme awo esʌk esọiyọ edi ke ufọọd etəkabod, ikpeghe keed asʌk ato adi ke ñkañ eto mbon useñkpọ."

38 Ndin Sebuul amaabo anye, "Mmọ anye ñkpooninua mfo idahami, afo a-akebooho, ‘Anie ido Abimelek a-anaaha ñnyịn isịne ke idak amọ inam ñkpọ inọ anye?’ Nte idooho ideen ami ke afo akesak nsaha? Wuọ kaa ke nwana ye ammọ!"

39 Ndin Kaal adaiwuod amaaben mme amanaisọñ Sekem anyʌñ akenwana ye Abimelek. 40 Abimelek amaadubịnne anye ke afịd usʌñ tutu akesịm inuaatob, emaenyʌñ ewoot uwak awo naña ammọ efeeñeke. 41 Akem Abimelek amaadʌñ ke Aruma, ndin Sebuul amaabịne Kaal ye ekpək amọ asio ke Sekem.

42 Edemusen, mbon Sekem emaewuọñọ ekaa inwañ, ndin emaeben ekebʌk enọ Abimelek. 43 Ndin anye amaaben mbon amọ, abakka ammọ asịn ke ikpeghe ita anyʌñ anam ammọ edịbe ke ikọd ebet. Ke ini anye akekịtte ammọ nte ewuọñọ ke abio edi, anye amaadakka ada anwana ye ammọ. 44 Abimelek ye mme ikpeghe ekọñ e-ekebaaha ye anye emaesọsọp ewuọ ekedat itie ke inuaatob abio. Ndin ikpeghe iba emaenwana ye mbon e-ekebaaha ke inwañ enyʌñ ewoot ammọ. 45 Afịd usen ado Abimelek amaasọọñọ afiik anwan ke abio ado tutu adat anye anyʌñ awoot mme awo ke esịd. Ndin anye amaasobo abio ado anyʌñ asuan inʌñ ke esịd.

46 Ke ini ekekoppo ami, mme amanaisọñ e-ekebaaha ke tọwa Sekem emaewuọñọ ekaa akpọsọñ itie ke tembịd El-Berid. 47 Ke ini Abimelek akekoppo ke mme mbọọñ Tọwa Sekem emaekeboho do, 48 Abimelek ye afịd ideen amọ emaedakka edọọk ekaa ke Abod Salmọn. Anye amaadat ekịd anyʌñ akpịkke usʌk ñkọk eto, anyʌñ adịppe adoot ke afara amọ. Ndin anye amaanọ ideen amọ uyio ate, "Isọsọp! Inam se ndufo ekịt naña ami nnam!" 49 Ndin afịd mme awo emaekpịkke ñkọk eto enyʌñ ekeene Abimelek. Ammọ emaebok anye ke akpọsọñ itie enyʌñ esịn ikañ ke ini mme awo esʌkkọ edọñọ ke esịd. Ndin afịd mme awo ke tọwa Sekem, ñkpọ nte awo tọsịn keed ideen ye ibaan, emaekpañña ekọrọ.

50 Ñko Abimelek amaakaa Tebes akesuakka anye anyʌñ aben anye adat. 51 Ke esịd abio, asọñ idem tọwa amaaba, a-afịd ideen ye ibaan, afịd mme amanaisọñ abio ado ekefeeñeke ekedọñọ. Ammọ emaeyịt usʌñ esịn idem ammọ ke esịd enyʌñ edọọk ekaa ke akọm tọwa. 52 Abimelek amaakaa ke tọwa ado anyʌñ akenwana ye ammọ. Ado ke ini anye akesañake akpere anyenusʌñ tọwa adisịn ikañ ke esịd, 53 awonwaan keed amaatop udob itiad ukọkñkpọ tọwa adot ke iwuod Abimelek anyʌñ asuan anye ñkpọkpọrọ.

54 Ke usọp anye amaakoot akama ñkpọ ekọñ amọ abo, "Dʌt akañkañ mfo sio nyʌñ ñwot miin, mbaak ammọ edibo ‘Awonwaan akewot anye.’ " Ndin ayịnufọk amọ amaakịm anye ke ufọọd iba ndin anye amaakpa 55 Ke ini mbon Isrel ekekịtte ke Abimelek amaakpa, ammọ emaenyọñ ufọk.

56 Ntom ke Abasi akesio usiene ke ibak A-Abimelek akenamma ye ete amọ ke anye adikiwoot nditọete amọ awo ata mme duob (70). 57 Abasi amaanyʌñ anam mbon Sekem ekpe isob ke afịd ndiọi ido ammọ. Isuuñọ Yọtam ayịn Yerub-Baal amaadoro ammọ ke idem.