Marcos 11

1 Nte mmọ ekesañade ekpere Jerusalem, mmọ ema edisim Betfek ye Betani ke obot Ọlif, Jisọs ama ọdọñ mbet Esie iba ebem mmọ iso eka,

2 Enye ama ọdọhọ mmọ ete, "Eka ndien ema enyuñ ededuk do, mbufo eyekut abak ayara enañ emi akananam owo midoroke ke enye, etat enye eda esọk Mi. 3 Ndien edieke owo kiet ekededi edibupde mbufo ntak mbufo enamde ntre, ekam edọhọ ete, Ete ufọk ñnyin oyom enye, ndien enye eyenọ efiak eda ediyak idahaemi."

4 Mmọ ema eka enyuñ ekekut abak ayara enañ mbiomo ke efak nte eyiride ekpere mben enyin usuñ ufọk, ndien nte mmọ ekeñwanade nditat, 5 ndusuk mme owo emi ekedade ekpere ema ebup mmọ ete, "Nsidi ntak emi mbufo etatde enañ oro?"

6 Mmọ ema etiñ ukem ukem nte Jisọs ọkọdọhọde mmọ ete ekpetiñ, do ndien ke mme owo oro ekenyime mmọ etat.

7 Ntre ema eda enañ oro esọk Jisọs ndien mme mbet Esie ema ebri ọfọñidem mmọ ke edem enañ oro, ndien Jisọs ama ọdọk etie ke edem Esie. 8 Ntem ke ediwak owo ekebri ọfọñidem mmọ ke ọkpọusuñ, ke adañaemi ndusuk mmọ eken ekesuande mme ñkọk eto emi ekesibede ke ikọt.

9 Mmọ emi ekebede iso ye mmọ emi ekekperede edem ema efiori ete,

"Itoro!"

"Itoro enyene Enye mi edide ke Enyiñ Ọbọñ."

10 "Itoro enyene Obio Ubọñ emi edidide, kpa Obio Ubọñ Ete ñnyin Defid!"

"Itoro ke ata ikpa enyọñ."

11 Ndien ntre ke Enye ama okoduk Jerusalem onyuñ ebe oduk ke itie ukpono Abasi, Enye ama emenerede enyin ese akanade, ese kpukpru ñkpọ ndien Enye ọkpọñ do koro ini ama ababiara, ndien Enye ama ọwọrọ aka Betani ye mbet Esie duopeba.