1 Mme owo ema eto Judia edi Antiọk ndien ema etọñọ ndikpep mme nditọ ete ñkpọ, ete, "Mbufo ikemeke ndibọ edinyaña tutu mbufo ena mbobi nte mbet Moses oyomde". 2 Pọl ye Banabas ema eduk ke ufiop eneni enyuñ efaña ye mmọ ebaña ñkpọ emi; do ema ebiere ete Pọl ye Banabas ye ubak owo ke Antiọk eka Jerusalem ekekut mme ada usuñ eken ebaña ikọ emi. 3 Ufọk Abasi ema esiọ mmọ edọñ, ndien nte mmọ ekesañade ebe ke Fonisia ye Sameria mmọ ema ebuk nte mme mmọ emi minaha mbobi ekewọñọrede etiene Abasi: mbuk emi ama ada akwa idara ọsọk kpukpru mme nditọ ete.

4 Ke ini mmọ ema ekesim Jerusalem, ufọk Abasi ema edara mmọ ye mme Ọbọsuru ye mme ada usuñ, emi mmọ eketiñde kpukpru se Abasi akanamde ye mmọ enọ. 5 Edi ubak mme andinim ke akpanikọ emi ekedude ke ñka mme Farisi ema edaha ke enyọñ edọhọ ete, "Enyene ndinim mmọ mbobi ñnyuñ ndọhọ mmọ enim mme mbet Moses". 6 Mme Ọbọsuru ye mme ada idaha ke ufọk Abasi ema esobo idem ọtọ kiet ndikere mbaña ikọ emi.

7 Ke ema ekeneni ebighi, Pita ama adaha ada ndien ọdọhọ ete, "Mme nditọ ete mi, mbufo emefiọk ete ke anyan ini emi ekebede Abasi ama emek mi oto ke otu mbufo ndikwọrọ Eti Mbuk emi nnọ mme mmọ emi minaha mbobi, man oto do mmọ ekop enyuñ enim ke akpanikọ. 8 Ndien Abasi emi ọdiọñọde esit mme owo, ama owut unyime Esie kabaña mme mmọ emi midighe Ju, ke edinọ mmọ Edisana Spirit, ukem ukem nte Enye ọkọnọde ñnyin. 9 Enye ikanamke ubahade ke ufọt ñnyin ye mmọ; enye ama anam esit mmọ asana koro mmọ ekenimde ke akpanikọ. 10 Ke ntre, nso idi ntak emi mbufo eyomde ndidomo Abasi idahaemi ke edidori mbiomo ke ibuot mmọ emi enimde ke akpanikọ, emi mme ete ete ñnyin mme ñnyin ke idem ñnyin mikemeke ndibiom? 11 Baba! ñnyin imenim ke akpanikọ; ndien enyaña ñnyin oto ke mfọn Ọbọñ ñnyin Jisọs kpa nte enyañade mmọ."

12 Ofuri otu ema edu ke ndobo uyo kadaña emi mmọ ekekopde se Banabas ye Pọl ekebukde ebaña kpukpru mme utibe ñkpọ ye mme ñkpọ ñkpaidem emi Abasi akanamde ebe ke mmọ ke otu mme mmọ emi midighe Ju.

13 Ke ini mmọ ema eketiñ ikọ ema, Jems ama etiñ ikọ ete, "Ekpañ utọñ enọ mi nditọ ete mi! 14 Saimọn ananam añwaña ke nditiñ nte Abasi ekebemde iso owut udọñ Esie kabaña mme mmọ emi midighe Ju ke edisio ke otu mmọ mme owo nnọ idem Esie. 15 Mme ikọ mme Prọfet esaña ekekem ye se itibede emi. Nte ñwed Abasi etiñde.

16 Ke emi ama ebe, ami ñyefiak ndi,

ami ñyetọñọ ntak mbọp ñwure ufọk Defid.

Ñyenyuñ mbọp mme ñwure esie,

ndien Ami ñyetọñọ ntak menede enye ñwuk.

17 Man oto do mme mmọ eken ke ererimbot ekpeyom Abasi

ye kpukpru mme mmọ emi midighe mme Ju

emi Ami mma ñkokot ndidi okim.

ntre ke Ọbọñ ọdọhọ enyemi akanamde ediọñọ ñkpọ emi

18 Mme ñkpọ emi emaekefiọk ke ata anyan ini."

19 Jems ama aka iso nditiñ ete, "Edi ekikere mi nte yak ñnyin ikufina mme mmọ emi midighe mme Ju, emi ewọñọrede etiene Abasi. 20 Utu ke oro eyak ñnyin iwet ñwed itiñ inọ mmọ ite yak mmọ ekudia udia ekededi emi edehede koro ekewade enọ mme ndem; mmọ etre ndisabade idem mmọ ke use; ekuta unam kiet ekededi emi ewotde ke edifiañade itọñ, ekunyuñ eta iyip unam. 21 Koro ema esikot mbet Moses ke ata anyan ini ke mme ufọk ukpepñkpọ kpukpru usen ikọ Abasi mme Ju, ndien ekwọrọ ikọ esie ke kpukpru obio."

22 Do mme Ọbọsuru ye mme ada idaha ufọk Abasi, ye ofuri ufọk Abasi, ekebiere ndimek mme owo nto ke eboho oro ñnyuñ ndọñ mmọ eka Antiọk esaña ye Pọl ye Banabas. Mmọ ema emek Judas emi ekekotde Banabas, ye Sailas, owo iba emi mme nditọ ete ekekponode eti eti.

23 Mmọ ekenọ utọ ñwed emi ke ubọk mme mmọ oro:

Ñnyin mme Ọbọsuru ye mme ada idaha ufọk Abasi, mme nditọ ete mbufo,

Inọ ekọm esọk kpukpru mme nditọ ete emi etode ke emana mme mmọ emi midighe mme Ju emi edude ke Antiọk, Siria, ye Silisia.

24 Ñnyin ima ikop ite ke mme owo ke otu ñnyin ema ewọñọ eda enyuñ efina mbufo, enyuñ etimede mbufo ke se mmọ eketiñde; mmọ ikọbọhọ item ito ñnyin ke abaña edinam mmọ. 25 Ke ntre ñnyin ima isobo ọtọ kiet, inyuñ inyime ndimek mme asañutom nsio ndọñ utom nnọ mbufo. Mmọ edisaña ye mme ndima ufan ñnyin Banabas ye Pọl 26 Mmọ emi ema ekemen uwem mmọ enim ubiọñ ke ndinam utom Ọbọñ Jisọs Kraist.

27 "Ñnyin imọdọñ Judas ye Sailas inọ mbufo, mmọ eyetiñ enọ mbufo ke idem mmọ se ñnyin iwetde ke ñwed. 28 Edisana Spirit ye ñnyin imenyime nditre ndidori mbufo mbiomo efen ke ebede mme item emi edotde. 29 Ekudia udia emi ekewade enọ ndem, ekuta iyip unam; ekuta unam emi efiañarede itọñ ewot, esioño idem mbufo efep ke use. Mbufo eyenam ọfọn edieke mbufo edisioñode idem mbufo efep ke edinam mme ñkpọ emi. Etie suñ."

30 Ema esioño mme isuñutom emi edọñ ndien mmọ ema ekesim Antiọk ke ebiet emi mmọ ekekotde ofuri otu ikọt Abasi ebok enyuñ enọ mmọ ñwed oro. 31 Ke ini mme mmọ oro ema ekekot ñwed emi, mmọ ema eyọhọ ye idara kabaña etop idọñesit oro.

32 Judas ye Sailas emi ekedide mme prọfet ke idem mmọ, ema eda ini etiñ ikọ ye mme nditọ ete, enọ mmọ ikọ idọñesit ye odudu. 33 Ke mmọ ema ekebiat ini do ye mmọ, mme nditọ ete ema esio mmọ unyọñ ke emem, man mmọ efiak eka ebine mme mmọ emi ekedọñde mmọ. 34 Edi Sailas ama ebiere ndisuhọ do. 35 Pọl ye Banabas ema esuhọ do ke Antiọk. Mmọ ema ediana ye mme mmọ efen ndikpep ñkpọ ñnyuñ ñkwọrọ ikọ Abasi.

36 Ke esisit ini ama ekebe, Pọl ama ọdọhọ Banabas ete, "Yak ñnyin ifiak ika ikese mme nditọ ete ñnyin ke kpukpru mme ikpọ obio emi ñnyin ikọkwọrọde ikọ Abasi, inyuñ ise nte mmọ ekade iso". 37 Banabas ama oyom ndida Jọn Mak asaña ye mmọ ke isañ emi, 38 edi Pọl ikekereke nte ke enen ndikpada enye koro enye mikesañake ye mmọ tutu osim utit isañ mmọ, edi ama efehe ọkpọñ mmọ ke Pamfilia ọnyọñ. 39 Ọkpọsọñ eneni ama odu ke ufọt mmọ emi ekabaharede mmọ. Banabas ama ada Mak osio aka Saiprọs, 40 ke ini Pọl ekemekde Sailas ada adaha, ke mme nditọ ete ema ekeyak mmọ esin ke ubọk mfọn Abasi. 41 Enye akasaña ebe ke Siria ye Silisia, ndisọñọ mme ufọk Abasi idem.