1 Mme Ọbọsuru ye mme nditọ ete ke ofuri Judia ema ekop ete ke mme mmọ emi midighe mme Ju enyime ikọ Abasi. 2 Kadaña emi Pita akakade Jerusalem, mme mmọ emi ekedọhọde ete enim mme mmọ emi midighe Ju mbobi ema esua enọ enye, 3 enyuñ edọhọ ete, "Afo ama oduk esit ufọk owo emi minaha mbobi okonyuñ adia udia ye enye." 4 Do Pita ama etiñ ọnọ mmọ ofuri se ikadade itie ete, 5 "Ami ñkọbọñ akam ke obio Jọpa, ndien ami mma ñkut ñkukut. Ami mma ñkut nte ñkpọ ọkọsuhọrede edi emi ekebietde akwa afia ọfọñ emi ekesukde ke ituñ esie mbinañ eto enyọñ, ndien ama atuak ada mi ke iso. 6 Ami mma ntim nse esit esie ndien ami mma ñkut mme unam, urukikọt ye mme inuen enyọñ. 7 Ndien ami mma ñkop uyo ọdọhọde mi ete, ‘Daha ke enyọñ, Pita wot ta.’ " 8 "Edi ami mma ndọhọ nte, ‘Baba Ọbọñ! Koro baba ndedehe unam ndomokiet akananam idukke mi inua.’ " 9 "Uyo oro ama ọtọñọ ntak etiñ ikọ oto enyọñ, ete, ‘kubat baba ñkpọ ndomokiet ke ndek emi Abasi ama akanam asana.’ 10 Emi eketibe ñkpọ nte ikata mbemiso ọfọñ oro ye kpukpru se ikesinede ke esit afiak ọdọk ke ikpa enyọñ." 11 "Kpasuk ke ndo ndo oro mme owo ita emi ekedọñde enọ mi eketode Siseria ema edisim ufọk emi ami ñkodude. 12 Edisana Spirit ama ọdọhọ mi nsaña ye mmọ ñka ñkusin mfaña. Nditọ ete itiokiet emi eketode Jọpa ema esaña ye ami ñko eka Siseria, ndien ñnyin kpukpru ima ikoduk ufọk Kọneliọs. 13 Enye ama etiñ ọnọ ñnyin nte imọ ikokutde enjel adade ke ufọk imọ emi ọkọdọhọde imọ ete, dọñ owo aka Jọpa okokot owo emi ọyọhọ enyiñ esie edide Saimọn Pita. 14 Enye eyetiñ mme ikọ ọnọ fi emi edinamde afo ye ofuri ufọk fo ebọ ubọhọ." 15 "Ndien kadaña emi ami ñkakade iso nditiñ ikọ, Edisana Spirit ama ọsuhọde edidoro mmọ ke idem kpa ukem ukem nte okodorode ñnyin ke editọñọ. 16 Do ke ami ñketi se Ọbọñ eketiñde ete, ‘Jọn ekenim babtisim ke mmọñ, edi eyenim mbufo babtisim ye Edisana Spirit.’ 17 Etiñ añwaña nte ke Abasi ama ọnọ mme idut efen oro ukem enọ emi Enye ọkọnọde ñnyin ke ini emi ñnyin ikenimde Ọbọñ Jisọs ke akpanikọ. Ami ñkedi anie ke ini oro, ndiñwana ndibiọñọ Abasi?"

18 Ke ini mmọ ema ekekop emi, mmọ ema etre ndisua nnọ mmọ edi ekabade etoro Abasi, enyuñ edọhọ, ete, "Ke ntem Abasi ọmọnọ mme mmọ emi midighe Ju ñko ifet nditua ñkpọfiọk ñnyuñ ndu uwem!"

19 Ema esuan mme andinim ke akpanikọ oto ukọbọ emi akadade itie ke ini emi ekewotde Stifin. Ediwak mmọ ema esaña ekesim anyan ebiet nte Fonisia ye Saiprọs ye Antiọk, eka iso nditiñ Eti Etop emi nnọ mme Ju ikpọñ. 20 Edi ubak mme andinim ke akpanikọ, mme iren emi eketode Saiprọs ye Sairen, ema eka Antiọk ekekwọrọ etop emi enọ mme mmọ emi midighe mme Ju ñko, etiñ enọ mmọ Eti Mbuk emi abañade Ọbọñ Jisọs. 21 Odudu Abasi ama odu ye mmọ, ndien ata ediwak owo ema enim ke akpanikọ enyuñ ewọñọde etiene Abasi.

22 Mbuk emi ama okoduk ufọk Abasi ke Jerusalem utọñ, do mmọ ema esio Banabas edọñ aka Antiọk. 23 Ke ini enye ekesimde do, ndien onyuñ okut nte Abasi ọkọdiọñde mme mmọ oro, enye ama adara eti eti onyuñ ekpe ye mmọ ete yak mmọ enyene mbuọtidem enyuñ enam akpanikọ ye Ọbọñ ke ofuri esit mmọ, 24 Banabas ekedi eti owo, ama ọyọhọ ye Edisana Spirit ye mbuọtidem. Ema eda ediwak owo esọk Ọbọñ.

25 Do Banabas ama aka Tarsọs ndiyom Pọl. 26 Ke ini enye ama okokut Pọl, enye ama ada enye edi ke Antiọk ndien mmọ mbiba ema etie do ofuri isua kiet enyuñ eka iso ndikpep kpukpru owo emi enimde ke akpanikọ ñkpọ. Ekedi ke Antiọk ke ekekot mme anditiene Kraist ke akpa edikot mme Kristian (mme mbiet Kraist).

27 Ke ukem ini oro ubak mme prọfet ema esuhọde eto Jerusalem eka Antiọk. 28 Kiet ke otu mmọ emi ekekerede Akabọs ama adaha ada ndien ke odudu Edisana Spirit ama ayarade ete ke akwa akañ ọmọñ esim ofuri isọñ. (Emi eketibe ini emi Klaudiọs ekedide ada ibuot ukara). 29 Mme mbet ema ebiere ete ke mmimọ kiet kiet iyenọ nte mmimọ ikekeme ndida ñnwam nditọ ete mmimọ emi edude ke Judia. 30 Mmọ ema enam ntre, ndien ema enọ okuk emi mmọ eketipde esọk mme ada idaha ufọk Abasi ebe ke ubọk Banabas ye Sọl.