1 Akripa ama ọdọhọ Pọl ete, "Emenọ fi ufañ nditiñ ikọ idem fo". Pọl ama eneñede ubọk esie onyuñ ọtọñọ ndikañ idem esie ntem:

2 "Edidem Akripa, ami ñkut idem mi nte owo mfọniso ke emi anamde ami ñkañ idem mi ke iso fo mfin emi ke kpukpru mme ñkpọ emi mme Ju etiñde edian mi. 3 Emi etim edi akpanikọ koro afo emetim ọfiọk ọfọn ekem kpukpru mme ido mme Ju ye mme mbume mmọ, ami mmebeñe fi ndikpañ utọñ nnọ mi ke ime."

4 "Kpukpru mme Ju ediọñọ usuñ emi ami ñkodude uwem toto ke uyen mi. Mmọ emediọñọ toto ke editọñọ nte ami ñkabiatde ofuri uwem mi ke obio emana mi ye ke Jerusalem. 5 Mmọ ediọñọ kpukpru ini, edieke mmọ ekpemade nditie ntiense mbaña, nte tọñọ ke ata akpa ami mma ndu uwem nte owo kiet ke otu ñka mme Farisi emi etiñde enyin eti eti ebaña ido ukpono. 6 Ndien idahaemi ami nda ke ikpe koro ami ñnyenede idorenyin ke eñwọñọ emi Abasi akanamde ọnọ mme eteete ñnyin. 7 Emi edi eñwọñọ emi ubon Isrel duopeba edoride enyin ebaña nte ñkekeme ndituaha ye Enyiñ Jisọs enamde ñkpọ ke ofuri esit enọ Abasi ke uwemeyo ye ke okoneyo. Ndien edi ke ntak idorenyin emi, Edidem Akripa, ke mme Ju edori mi ikọ. 8 Ntak emi edide ọkpọsọñ ñkpọ mbufo mme Ju ndinim ke akpanikọ nte ke Abasi ananam mme akpaña ñkpa eset-e?"

9 "Ami ke idem mi ñkekere ntre nte ke ana ami nnam kpukpru ñkpọ nte ñkekeme ndituaha ye Enyiñ Jisọs Eyen Nasaret. 10 Oro edi se ami ñkanamde ke Jerusalem. Ami ñkọbọ odudu nto mme ikpọ oku ndien ndọñ ediwak ikọt Abasi ke ufọk ñkpọkọbi, ndien ke ini ekebierede ikpe ñkpa enọ mmọ, ami mma ndiana do. 11 Ke ediwak ini nsinanam etuhọde mmọ ke kpukpru ufọk ukpepñkpọ, ñnyuñ ñwana nte ñkekekeme ndinam mmọ ekañ mbuọtidem mmọ. Esit ama ọdiọk mi ye mmọ eti eti tutu ami mma nsika ke mme esen idut ndisin mmọ ke ukut."

12 "Ekedi ke ntak emi ke ami ñkaka Damaskọs ye odudu ye ke uyo mme ikpọ oku. 13 Ekedi ke usuñ ke ufọt uwemeyo, Edidem Akripa, ke ami ñkokut unwana emi akayamade akan eyo, akayamade oto ikpa enyọñ akan mi okuk ye mme mbon emi ekesañade ye ami. 14 Kpukpru ñnyin ima iduọñọ ke isọñ, ndien ami mma ñkop uyo ọdọhọde mi ke usem mme Hibru ete, ‘Sọl, Sọl, nsinam afo ọkọbọde mi? Ọsọñ afo nditigha ñkukim.’ "

15 "Ami mma mbup nte, ‘Afo edi anie, Ọbọñ?’ Ndien Ọbọñ ama ọbọrọ ete, ‘Ami ndi Jisọs emi afo ọkọbọde.’

16 ‘Idahaemi daha da ke ikpat fo. Ami mmewọrọ ñwut fi idem ndimek fi nte eyen utom mi; afo enyene nditiñ nnọ mmọ efen se afo okutde oto Mi mfin ye se Ami ndiwutde fi ke ini iso. 17 Ami ñyenyaña fi nsio ke ubọk mme mbon Isrel ye eke mme mmọ emi midighe mme Ju emi ndidọñde fi nnọ mmọ. 18 Afo enyene nditat mmọ enyin ñnyuñ ñwọñọde mmọ ke ekim nsin ke uñwana, ye ke odudu Setan nnọ Abasi, man otodo oto ke mbuọtidem mmọ ke Ami mmọ ekpenyene edifen ke mme idiọkñkpọ mmọ ñnyuñ nda itie mmọ ke otu mme mmọ emi Abasi emekde.’ "

19 "Ke ntem, Edidem Akripa, ami ñkọsọñke ibuot nnọ ñkukut emi ñkọbọde nto enyọñ. 20 Akpa, ke Damaskọs, ye ke Jerusalem, ndien ke ofuri idut mme Ju, ye ke otu mme mmọ emi midighe mme Ju, ami ñkọkwọrọ nte: ke ana mmọ etua ñkpọfiọk ke idiọkñkpọ mmọ enyuñ ewọñọde etiene Abasi, ndien enam mme ñkpọ emi ediwutde nte ke mmọ ekabade esit. 21 Ekedi ke ntak emi ke mme Ju ekemum mi ke ñkanubọk kadaña emi ami ñkodude ke itie ukpono Abasi, enyuñ eñwana ndiwot mi. 22 Edi tutu esim idem usen mfin emi edi Abasi añwam mi, ndien ami nda mi nnọ kpukpru owo ñkpri ye ikpọ ikọ ntiense emi ukem ukem. Se ami ntiñde edi ukem ukem ñkpọ emi mme prọfet ye Moses eketiñde ete ke eyetibe, 23 nte ke ana Andinyaña okut ukut onyuñ edi akpa owo emi edisetde ke ñkpa, ndisian mbaña uñwana edinyaña nnọ mme Ju ndien nnọ mme mmọ emi midighe mme Ju."

24 Nte Pọl akakade iso ndinyaña idem esie ke uto usuñ emi, Festọs ama aduat enye ete, "Afo amadama, Pọl! Akwa ifiọk fo ọmọñ anam fi adama."

25 Pọl ama ọbọrọ ete, "Ami ndamake, andikara! Mme ikọ emi ntiñde edi akpanikọ onyuñ edi nnen nnen. 26 Edidem Akripa, ami mmekeme nditiñ ikọ ye afo uko uko koro afo ọmọfiọk abaña mme ñkpọ emi. Ami mmọfiọk nte ke afo ama okut mmọ kiet kiet, koro ñkpọ emi iketibeke ke ndibe. 27 Edidem Akripa, nte afo emenim mme prọfet ke akpanikọ? Ami mmọfiọk nte ke afo emenim."

28 Do ke Akripa ọkọdọhọ Pọl ete, "Nte afo emekere ete ke utọ ibibio ini emi afo emekeme ndinyik mi ndi owo Abasi?" 29 Pọl ama ọbọrọ ete, "Mme edi ke ibibio mme anyan ini, akam mi ke iso Abasi edi yak afo ye mme mmọ eken emi ekpañde utọñ enọ mi mfin emi edi se ami ndide, ke esiode ñkpọkọbi emi efep."

30 Do Edidem, ada ibuot ukara, Benis, ye kpukpru mme mmọ eken ema edaha ke enyọñ, 31 ndien ke mmọ ema ekekpọñ ebiet oro mmọ ema etiñ ye kiet eken ete, "Owo emi inamke baba ñkpọ kiet emi enye odotde ñkpa mme ndisin enye ke ufọk ñkpọkọbi."

32 Ndien Akripa ama ọdọhọ Festọs, ete, "Akpana esana owo emi eyak edieke enye mikpenamke ebeñe emen ikpe esie eka iso Andikara ofuri Rom."