1 Ke usen ition ema ekebe, Ananayas akwa oku ama aka Siseria asaña ye mme mbuot ye ọfiọk mbet kiet emi ekekotde Tetulọs, ndien mmọ ema eketiñ isọñ ikpe mmọ ye Pọl ke iso ada ibuot ukara. 2 Ke ini ekekotde Pọl oduk edi, Tetulọs ama etiñ isọñ ikpe esie ke iso Feliks ntem: "Eti andikara, eti ndausuñ fo amada anyan ini emem ọsọk ñnyin, ndien mme ediwak ukpuhọde emi edotde eda itie ke ufọn idut ñnyin.

3 Ñnyin imadara nti utom fo emi kpukpru ini ke kpukpru ebiet, ndien esit ñnyin ọyọhọ ye ekọm ọnọ fi. 4 Ami ñyomke ndida ini fo ediwak, ntededi ami mbeñe fi ndifọn ido ñnyuñ ñkpañ utọñ nnọ ibibio ikọ ñnyin." 5 Ñnyin imiyarade ikut ite ke owo emi edi esin ntime, emi anamde obom ye ndutime odu ke otu mme Ju ke ofuri ererimbot. Enye ada iso ọnọ ñka emi ekotde ñka mme Nasaren. 6 Enye onyuñ anam se enye ekekeme ndisabade itie ukpono Abasi ñnyin, do ke ñnyin ikemum enye. "Ñnyin ikebiere ndikpe ikpe ye enye nte mbet ñnyin edide.

7 Edi ada iso ekọñ Lisias ama edi ke odudu edibọ enye ke ubọk ñnyin. 8 Do ke Lisias ọkọnọ uyo ete mme mmọ emi enyenede ikọ ye enye edi ke iso fo. Edieke afo udubupde owo emi mbume, afo ke idem fo eyekeme ndikop nto enye kpukpru se ñnyin itiñde idian enye."

9 Do ke mme Ju efen ekediana ke se eketiñde edian Pọl nte ke kpukpru edi akpanikọ.

10 Ada ibuot ukara ama ọdọhọ enye etiñ ikọ, ndien Pọl ama ọdọhọ ete, "Ami mmọfiọk nte ke afo emedi ekpe ikpe idut emi ke ata ediwak mme isua, anam esit enem mi ndikañ idem mi ke iso fo.

11 Nte afo ekemede ndiduñọde mfiọk, ikewakke ibe usen duopeba, emi ekebede ke ami ñkaka Jerusalem ndituak ibuot nnọ Abasi. 12 Mme Ju ikekwe mi nenide eneni ye baba owo kiet ke itie ukpono Abasi, mme ndikut mi nte ñkanamde mme owo esin ntime ke ufọk ukpepñkpọ, mme ke ebiet efen ekededi ke obio. 13 Mmọ ikemeke ndiwut fi ñkpọ idiọñọ ndisọñọ kpukpru se mmọ etiñde edian mi.

14 Ami menyime mi ke iso fo nte: ke ami ñkpono Abasi mme eteete ñnyin ke editiene usuñ oro mmọ edọhọde ete ke edi nsu. Edi ami mmenim ñko kpukpru mme ñkpọ emi ewetde ke mbet Moses ye ke mme ñwed mme prọfet. 15 Ami ñnyene ukem idorenyin ke Abasi emi mme mmọ emi enyenede, nte ke kpukpru owo nti Ye ndiọi, eyeset ke ñkpa.

16 Ndien ami nnam ofuri ukeme mi kpukpru ini ndinyene edisana esit ke iso Abasi ye ke iso owo."

17 "Ke ami mma ñkọkpọñ Jerusalem ke ediwak isua, ami ñkaka do ndida okuk nsọk ikọt mi, ye ndinyuñ ñwa uwa. 18 Ekedi ke ini ñkanamde emi ke mmọ ekekut mi ke itie ukpono Abasi, ke mma ñkekure uwa edinam asana emi. Otu owo ndomokiet ikọduhọ do ye ami, ndien ndutime ndomokiet ikonyuñ iduhọ ñko. 19 Edi ubak mme Ju emi eketode ñkanñkuk Esia ema edu do, mmọ ke idem mmọ ekpenyene ndidi ke iso fo ndinọ ntọt mmọ edieke mmọ enyenede ñkpọ ndomokiet edian mi.

20 Yak mme irenowo emi edade mi etiñ mme nso ñkpọ ibet ke mmọ ekesua enọ mi ke ini ñkadade ke iso esop ukara, 21 ke mikọbọhọke ke ñkpọ kiet emi ami ñkefioride uyo ọsọñ ke ini ñkakade ke iso mmọ: ‘Mbufo ekpe mi ikpe mfin emi ke emi ami nnimde ke akpanikọ nte ke mme akpaña ñkpa eyetọñọ ntak eset edu uwem.’ "

22 Do ke Feliks emi ama ọkọfiọk ñkpọ ọyọhọ ọyọhọ abaña Usuñ Abasi, okosio ikpe oro enim, onyuñ ọdọhọ ete, "Ami ñyebiere ikpe mbufo ke ini ada iso ekọñ, Lisias, ama edisim." 23 Enye ama ọnọ mme mbon ukpeme emi ekekpemede Pọl uyo ete yak eka iso ndikpeme enye, edi enọ enye ubak ifet, ndien eyak mme ufan esie eda se inanade enye esọk enye.

24 Ke ñkpọ nte usen ifañ ema ekebe Feliks ama asaña ye ñwan esie Drusila, emi ekedide eyen añwan Ju edi. Enye ama ọdọñ eda Pọl edi ndien enye ama akpañ utọñ ọnọ enye nte enye eketiñde ikọ abaña mbuọtidem ke Kraist Jisọs. 25 Edi kadaña emi Pọl akakade iso nditiñ ñkpọ mbaña mfọnido, mfarakeidem, ye usen ikpe emi edidide, ndik ama omum Feliks ndien enye ama ọdọhọ ete, "Afo emekeme ndinyọñ idaha emi. Ami ñyetọñọ ntak ñkot fi ke mma ñnyene ifet."

26 Se ikedide ekikere esie ekedi mme Pọl eyenọ enye ubọk edem, ndien ke ntak emi enye ekenyene ndikot Pọl kubọk kubọk ñnyuñ ñnyene nneme ye enye. 27 Ke isua iba ama ekebe, owo emi ekekerede Pọkiọs Festọs ama ada itie Feliks nte ada ibuot ukara. Feliks okoyom ndinen iso ye mme Ju, oro anam enye ama ọkpọñ Pọl ke ufọk ñkpọkọbi.