1 Edi Sọl ke ọkọñwọñwọñọ ke ifiopesit ndiwot ikọt Abasi. Enye ama aka ebine akwa oku, 2 ndien okobup ñwed idiọñọ ndida ñka ke mme itie ukpepñkpọ mme Ju ke Damaskọs emi edinọde enye odudu ndimum mmọ emi etienede usuñ Ọbọñ do, iren ye iban, ñnyuñ nda mmọ ñka Jerusalem.

3 Ke enye ama ekekpere obio Damaskọs, ke ata edibabuat, uñwana ama oto ke enyọñ akan enye okuk. 4 Enye ama ọduọ ke isọñ ndien ama okop uyo ọdọhọde enye ete, "Sọl, Sọl, nsinam afo ọkọbọde Mi?"

5 Enye ama obup ete, "Afo edi anie Ọbọñ?" Uyo oro ama ọbọrọ enye ete, "Ami ndi Jisọs emi afo ọkọbọde.

6 Dahada idahaemi, saña duk esit obio ndien eyenam fi ọfiọk se anade nte afo anam."

7 Mme mmọ emi ekesañade ye Sọl ema eda do ikekemeke uyo ndisioro, mmọ ema ekop uyo edi ikekwe owo ndomokiet. 8 Sọl ama adaha ada ke enyọñ onyuñ atat enyin esie edi ikekemeke ndikut ñkpọ ndomokiet. Do mmọ ema emum enye ke ubọk enyuñ eda enye eduk Damaskọs. 9 Ke usen ita enye ikekemeke ndikut usuñ, ndien ke ini oro ñko enye ikediaha ñkpọ, ikonyuñ iñwọñke ñkpọ ndomokiet.

10 Anditiene Kraist kiet ama odu ke Damaskọs emi ekekerede Ananayas. Enye ama okut ñkukut emi Ọbọñ ọkọdọhọde enye ete, "Ananayas!" Enye, ama ọbọrọ ete, "Se ami mi Ọbọñ."

11 Abasi ama ọdọhọ enye ete, "Beñe idem ndien ka ke efak emi ekerede Nnen nnen, ndien ke ufọk Judas bup baña owo emi otode Tasọs emi ekerede Sọl. Enye odu ke akam idaha emi. 12 Ndien ke ñkukut enye ama okut eren owo emi ekerede Ananayas nte odukde edi ndien odori enye ubọk man enye ọtọñọ ntak okut usuñ."

13 Ananayas ama ọbọrọ ete, "Ọbọñ mme ediwak owo etiñ enọ mi ebaña owo emi ye kpukpru mme oburobut ñkpọ emi enye anamde ye ikọt Fo ke Jerusalem. 14 Ndien enye edi Damaskọs ye odudu emi otode mme ikpọ oku ndimum kpukpru mme mmọ emi ekotde enyiñ Fo."

15 Ọbọñ ama ọdọhọ enye ete, "Ka, koro enye edi ñkpọ utom emi ami mmekde ndida enyiñ Mi nsọk mme mmọ emi midighe mme Ju ye mme mbon mmọ, ye ke iso nditọ Isrel. 16 Ndien Ami ke idem mi ñyewut enye kpukpru ukut emi enye edibiomde ke ntak Mi."

17 Do ke Ananayas akaka, okoduk ufọk oro onyuñ odori Sọl ubọk ke ibuot, ndien enye ọdọhọ ete, "Eyen ete mi Sọl, edi Ọbọñ Jisọs emi okowutde fi idem ke usuñ ke ini afo ekedide mi ọdọñ mi, man oto do afo afiak okut usuñ onyuñ ọyọhọ ye Edisana Spirit."

18 Ke ndo ndo oro ñkpọ emi etiede nte ikpọk iyak ama ọwọrọ ke enyin Sọl ọduọ ndien enye ama ekeme nditọñọ ntak ñkut usuñ. Enye ama adaha ada ndien ema enim enye babtisim, 19 ndien ke enye ama akadia udia, odudu ama afiak oduk enye idem. Sọl ama adañ ñkpọ nte usen ifañ ye mme mbet ke Damaskọs. 20 Enye ama adaha ini kiet aka ke ufọk mbono mme Ju onyuñ ọtọñọ ndikwọrọ mbaña Jisọs, nte ke enye edi Eyen Abasi.

21 Idem ama akpa kpukpru mme mmọ emi ekekopde ukwọro ikọ esie, enyuñ ebup ete, "Nte emi idighe owo emi okowotde mme mmọ emi ekekotde enyiñ emi ke Jerusalem? Nte enye ikedighe mi ke ntak edimum mmọ ñnyuñ nda mmọ mfiak mbine Akwa Oku?"

22 Edi ukwọrọ ikọ Sọl ama etetim okop odudu, ndien mme idiọñọ esie, nte ke Jisọs edi Kraist ama ayaña mme owo ifiọk tutu mme Ju emi ekeduñọde ke Damaskọs ikekemeke ndibọrọ enye.

23 Ke ediwak usen ema ekebe, mme Ju ema ebok idem enyuñ ediomi nte ekpewotde Sọl, 24 edi Sọl ama okop abaña se mmọ ekeduakde ndinam. Ke uwemeyo ye okoneyo mmọ ema ekpeme mme inua otop obio man oto do ekeme ndiwot enye. 25 Edi ke okoneyo kiet mme mbet Sọl ema emen enye esin ke akpasa ndien esuk enye ke uruk eto ke odudu emi okodude ke ibibene.

26 Ke enye ama ekesim Jerusalem, enye ama añwana ndidian idem ye mme mbet, edi mmọ ema ekop ndik ebaña enye, koro mmọ ikenimke ke akpanikọ nte ke enye ke akpanikọ edi mbet ñko. 27 Edi Banabas ama ada enye ebine mme mbet. Enye ama etiñ ọnọ mmọ nte Sọl ke usuñ isañ okokutde Ọbọñ, ndien ke Ọbọñ ama etiñ ikọ ye enye, ye nte enye ọkọkwọrọde ikọ ke Damaskọs uko uko ke enyiñ Jisọs. 28 Do ke Sọl okodu ye mmọ onyuñ asaña nte enye amade ke Jerusalem, onyuñ etiñ ikọ uko uko ke enyiñ Ọbọñ. 29 Enye ama etiñ ikọ onyuñ eneni eneni ye mme mbon Ju emi eketiñde usem Krik, edi mmọ ema eñwana ndiwot enye. 30 Ke ini mme nditọ ete ekediọñọde ebaña ñkpọ emi, mmọ ema eda Sọl esuhọde eka Siseria enyuñ enam enye aka Tarsọs.

31 Ke ntre ufọk Abasi ke ofuri Judia, Kalili, ye Sameria ema ekut ini emem. Ema eka iso ndibọp ufọk Abasi ndien enye onyuñ ọkọri ke ibat owo oto ke odudu Edisana Spirit nte enye okodude uwem ke idak ndik Abasi.

32 Nte Pita akasañade akanade kpukpru ebiet, enye ama aka ekese ikọt Abasi ke Lida. 33 Do ke enye okosobo owo kiet emi ekekerede Anias emi ọkọdọñọde akpaubeñ ana ke isọñ ke isua itiaita.

34 Pita ama ọdọhọ enye ete, "Anias, Jisọs Kraist anam fi okop nsọñidem. Dahada nyuñ tim ñkpana fo." Ndo ndo oro Anias ama adaha ke enyọñ. 35 Kpukpru mme mmọ emi ekeduñde ke Lida ye Sarọn ema ekut enye, ndien mmọ, ema ewọñọde etiene Abasi.

36 Ke Obio Jọpa ñwan kiet ama odu emi ekekerede Tabita emi ekedide andinim Abasi ke akpanikọ. Enyiñ esie ke usem mme mbon Krik edi Dọkas. Enye akabiat ofuri ini esie ke edinam nti ido ye ke ediñwam mme ubuene. 37 Ke ñkpọ nte ukem ini oro, enye ama ọdọñọ onyuñ akpa. Ema eyet okpo esie mmọñ enyuñ ebri enye ke ubet kiet ke ufọk enyọñ. 38 Jọpa ikoyomke usuñ ikpọñ Lida eti; ndien ke ini emi mme mbet ke Jọpa ekekopde ete ke Pita okodu ke Lida, mmọ ema edọñ owo iba ebine enye ye etop emi, "Mbọk Sọp idem bine ñnyin" 39 Do Pita ama etim idem onyuñ etiene mmọ. Ke ini emi enye ekesimde do, ema eda enye eduk ubet ufọk enyọñ. Kpukpru mme ebekpa ema ekan enye esin, ke etuaña eyet, ke enyuñ ewewut enye mme ọfọñ idak idem ye mme ewura emi Dọkas ekekimde ke ini emi enye okodude uwem. 40 Edi Pita ama anam kpukpru mmọ ewọñọ ke ubet emi, ndien enye ama ọtọñọ edọñ onyuñ ọbọñ akam; ndien enye ama ọwọñọde ese okpo onyuñ ọdọhọ ete, "Tabita, daha ke enyọñ!" Enye ama atat enyin esie, ndien ke adaña emi enye okokutde Pita, enye ama adaha etetie. 41 Pita ama anyan ubọk onyuñ añwam enye ndidaha ke enyọñ. Do ke enye okokot mme andinim ke akpanikọ ye mme ebekpa onyuñ ayak enye ye uwem ọnọ mmọ.

42 Mbuk emi ama asuana akanade ofuri Jọpa ndien ediwak owo ema enim Ọbọñ Jisọs ke akpanikọ, 43 Pita ama adañ ke Jọpa ke ediwak mme usen ye ekim ikpa emi ekekerede Saimọn.