1 Pọl ama aka Derbe ye Listra, ebiet emi enye okokutde Timoti, andinim ke akpanikọ kiet; eka esie ekedi andinim ke akpanikọ ñko emi ekedide ñwan Ju, edi ete esie ekedi Krik. 2 Kpukpru mme nditọ ete ke Listra ye ke Aikoniọm ema etiñ eti ikọ ebaña Timoti. 3 Pọl ama aduak ndida Timoti asaña ye enye, ke ntre enye ama enim enye mbobi ke ntak mme Ju emi ekeduñọde do, koro kpukpru mmọ ema ediọñọ ete ke ete Timoti ekedi owo Krik. 4 Nte mmọ ekesañade ke obio ke obio mmọ ema etiñ enọ mme andinim ke akpanikọ mme item emi mme Ọbọsuru ye mme ada idaha ufọk Abasi ke Jerusalem ekenọde enyuñ edọhọ mmọ enim mme item emi. 5 Ntre ke ekenam mme ufọk Abasi ekop idem ke mbuọtidem enyuñ ekọri ke ibat kpukpru usen.

6 Mmọ ema esaña ekanade ñkanñkuk Frikia ye Kalesia, koro Edisana Spirit ikenyimeke mmọ ekwọrọ ikọ Abasi ke ñkanñkuk Esia. 7 Ke ini mmọ ema ekesim adaña Misia, mmọ ema eñwana ndiduk ñkanñkuk Bitinia, edi Spirit Jisọs ikenyimeke mmọ eduk. 8 Ke ntre mmọ ema esuk eka iso iso ekebe Misia ndien esuhọde eka Troas.

9 Pọl ama okut ñkukut ke okoneyo, nte owo emi otode Masidonia nte adade onyuñ ekpe enye ubọk ete, "Di ke obio Masidonia di ñwam ñnyin!" 10 Ke Pọl ama okokut ñkukut emi, ñnyin ima itim idem ndika Masidonia, koro ñnyin ima ibiere ite ke Abasi okokot ñnyin ndikwọrọ Eti Mbuk emi nnọ mme mmọ emi edude do.

11 Ñnyin ima ikpọñ Troas ke nsuñikañ iwat nnen nnen man ika Samotres, ndien ke ndañ nsiere ñnyin ima ikisim Niapolis. 12 Ima ito do iduk ika obio Filipai, ọwọrọ iso obio ke Masidonia, emi onyuñ edide ebiet ukara mbon Rom. Ñnyin ima idu ñkpọ nte usen ifañ ke akwa obio oro.

13 Ke usen ikọ Abasi mme Ju, ñnyin ima iwọrọ ikpọñ esit obio esisit ika ke mben inyañ, ebiet emi ñnyin ikekerede ite ke iyekut itie ubọñ akam mme Ju. Ñnyin ima isuhọde itetie inyuñ itiñ ikọ Abasi inọ mme iban emi ekebohode do. 14 Kiet ke otu mme mmọ emi ekekopde ñnyin ekedi Lidia emi okotode Tiatira, emi ekesinyamde Ọfọñ mmọñ ibọñ. Enye ekedi eyen añwan emi okponode Abasi ndien Abasi ama atat esit esie ndikpañ utọñ nnọ se Pọl eketiñde. 15 Enye ye mme mbon ufọk esie ema ena babtisim. Do ke enye okokot ñnyin ete, "Edi ediduñ ke ufọk mi, edieke mbufo ema ekeyuhọ ete ke ami ndi ata andinim Ọbọñ ke akpanikọ" Enye ama eyire ñnyin eti eti, ikonyuñ iyomke mfaña ito ñnyin.

16 Usen kiet nte ñnyin ikakade ebiet ubọñ akam, ekpri eyen añwan emi ekedide ofin emi ekenyenede idiọk spirit emi akanamde enye etiñ mme ñkpọ emi editibede ke iniiso ama edisobo ye ñnyin. Enye esinam uwak okuk ọnọ ete ufin esie ke edibre idiọñ. 17 Eyen añwan emi ama etiene Pọl ye ñnyin ke ofiori ete, "Mme iren emi edi mme isuñutom Abasi Ete Andikoñ Ñkan! Mmọ etiñ enọ mbufo nte mbufo ekemede ndibọ edinyaña!"

18 Enye ama anam ntem ke ediwak mme usen, tutu etimede Pọl esim idahaemi enye ọkọwọñọrede onyuñ etiñ ikọ ye idiọk spirit oro, ete, "Ke Enyiñ Jisọs ami mmowuk fi nte yak ọwọrọ ọkpọñ enye!" Idiọk spirit emi ama ọwọrọ ọkpọñ enye ke ndo ndo oro.

19 Kadaña emi mme andinyene enye ekeyararede efiọk ete ke ifet unam okuk mmimọ okure mmọ ema emum Pọl ye Sailas enyuñ eduri mmọ ewọrọ ke iso mbon ukara ke añwa obio.

20 Mmọ ema eda mmọ edi ke iso mme ekpe ikpe mbon Rom ete, "Mme iren emi edi mbon Ju ndien mmọ ke esin ntime ke obio ñnyin. 21 Mmọ ke ekpep mme ido uwem emi atuahade ye mme mbet ñnyin. Ñnyin idi mbon Rom ñnyin ikemeke ndinyime mme ndida mme ukpepñkpọ mmọ nsin ke edinam".

22 Mme otu owo ema ediana ke ndisin ntime ye Pọl ye Sailas, ndien ekpe ikpe ama ọdọhọ ete yak ewak mmọ ọfọñ ke idem enyuñ emia mmọ ke ikpa ukwak. 23 Ke ema ekemia mmọ eti eti ema, ema etop mmọ edọñ ke ufọk ñkpọkọbi enyuñ enọ mme ekpeme ufọk ñkpọkọbi uyo ete ekọbi mmọ esin enyuñ ekpeme mmọ nte ọfọnde. 24 Ke mme ekpeme ufọk ñkpọkọbi ema ekebọ uyo emi, mmọ ema enuk mmọ edọñ ke ata esit ubet ufọk ñkpọkọbi enyuñ ekọbi ukot mmọ edian ke ọkọ.

25 Ke ñkpọ nte ufọt okoneyo Pọl ye Sailas ke ekebọñ akam, enyuñ ekwọ ikwọ enọ Abasi, ndien mme mbon ñkpọkọbi eken ke ekekpañ utọñ enọ mmọ. 26 Ke edibabuat, akamba unyek isọñ ama ada itie emi ekenyeñede ufọk ñkpọkọbi tutu esim itiat idak isọñ esie. Ke ndo ndo oro kpukpru mme usuñ ema ebeñede, ndien mme ñkpọkọbi kpukpru owo ema ekpoho. 27 Ekpeme ufọk ñkpọkọbi ama edemere, ndien ke ini enye okokutde mme usuñ ufọk ñkpọkọbi nte ebonode iñwañ enye ama ekere ete ke kpukpru mbon ñkpọkọbi ema ewọñọ efeñe, do ke enye okosio akañkañ esie ke efọk ndien oyom ndiwot idem esie.

28 Edi Pọl ama ofiori ke ọkpọsọñ uyo ete, "Kunọ idem fo unan! Ñnyin kpukpru mmọ mi."

29 Ekpeme ufọk ñkpọkọbi ama ọdọhọ eda ikañ edi, efehe oduk esit ufọk ndien ọkọduọ Pọl ye Sailas ke ukot ke ñnyekidem. 30 Ndien enye ama ada mmọ ọwọrọ añwa onyuñ obup ete, "Mme ete, ami ndinam nso, man enyaña mi?"

31 Mmọ ema edọhọ enye ete, "Nim Ọbọñ Jisọs ke akpanikọ ndien eyenyaña fi ye ofuri ufọk fo".

32 Do mmọ ema ekwọrọ ikọ Abasi enọ enye ye kpukpru mmọ eken ke ufọk esie. 33 Kpa ke ini okoneyo oro ekpeme ufọk ñkpọkọbi ama ada mmọ, onyuñ eyet mme unan mmọ, ndien enye ye ofuri ufọk esie ema ena baptisim ini kiet. 34 Enye ama ada Pọl ye Sailas ọdọk aka ufọk esie onyuñ ọkọnọ mmọ udia edia. Enye ye ofuri ufọk esie ema eyọhọ ye idara koro enye omonim Abasi ke akpanikọ idaha emi. 35 Ke ndañ nsiere ke usen ubọk ekpe ikpe ama ọdọñ mbio utom esie eka ebine ekpeme ufọk ñkpọkọbi ekedọhọ enye ete, "Yak mme iren oro enyọñọ" 36 Do ekpeme ufọk ñkpọkọbi ama etiñ ọnọ Pọl ete, "Mme ekpe ikpe enọ uyo ete yak eyak fi ye Sailas, Mbufo emekeme ndinyọñ ke ifure."

37 Edi Pọl ama ọdọhọ mme isuñ mme ekpe ikpe ete "Owo ikobiomke ñnyin ikpe idiọkñkpọ ndomokiet edi mmọ ema emia ñnyin ke añwa, ndien ñnyin idi mbon Rom, kpa ye oro mmọ ema esin ñnyin ke ufọk ñkpọkọbi. Ndien idahaemi mmọ eyom ndinam ñnyin inyọñọ ke ndibe? Baba! Yak mme ekpe ikpe mbon Rom ke idem mmọ edi edisioño ñnyin."

38 Mme isuñutom ema eketiñ mme ikọ emi enọ mme ekpe ikpe, ndien ke ini mmọ ekekopde ete ke Pọl ye Sailas ekedi nditọ Rom, ndik ama anam mmọ. 39 Do mmọ ema eka ekekpe Pọl ye Sailas ubọk, enyuñ eda mmọ ewọrọ ke ufọk ñkpọkọbi ndien ema ebeñe mmọ ndikpọñ obio. 40 Pọl ye Sailas ema ekpọñ ufọk ñkpọkọbi ndien eka ke ufọk Lidia. Do ke mmọ ekesobo ye nditọ ete, etiñ ikọ idọñesit enọ mmọ, ndien mmọ ekekpọñ obio oro.